Ձեր վստահելի աղբյուրը

«2016-2018 թվականները ներառյալ Վանաձորի համայնքային բյուջեն ունեցել է մոտ 40 տոկոս աճ։ Այս տարի էլ նախատեսված է 14-15 տոկոս աճ»,-Երևանում լրագրողների հետ զրույցում ասաց Վանաձորի քաղաքապետ Մամիկոն Ասլանյանը։

Նա թվային տվյալներ հրապարակեց, կատարած աշխատանքները թվարկեց՝ 300-400 մլն դրամի ասֆալտապատման աշխատանքներ  են իրականացրել Լոռու մարզկենտրոնում, խաղահրապարակներ են նորոգել, քաղաքի զարգացման ծրագրեր են մշակել։

Ասլանյանն ասաց, իր ընտրվելուց հետո քաղաքապետարանում կրճատումներ են եղել, դրա արդյունքում դժգոհություններ հնչել են, սակայն աշխատանքը չի տուժել։

«Երկու տարվա ընթացքում որևէ խնամի, ծանոթ, նույնիսկ ազգականի աշխատանքի ընդունած չկամ»,-ասաց Ասլանյանը։

Քաղաքապետը նշեց, համայնքը պարտքեր չունի, իսկ քաղաքապետարանի աշխատակիցները տարեկան մեկ անգամ պարգևավճար են ստանում իրենց աշխատավարձի չափով։

Ինչ վերաբերում է Վանաձորում փողոցային առևտրի արգելքին, հանրապետության մեծությամբ երրորդ քաղաքի ղեկավարը տեղեկացրեց, մինչև տարեվերջ կկարողանան խնդրին լուծում տալ։ 

«Մենք պետք է կարողանանք մեր միջոցներով հարմարեցված տեղանք ստեղծել, որպեսզի քաղաքացին կարողանա իր առևտուրը կազմակերպել։ Այդ քաղաքացիները բացի ընտանիք պահելուց նաև վարկային պարտավորություններ ունեն, մենք էդ մարդկանց միանգամից եկամուտից կտրելով,կկանգնեցնենք խնդիրների առաջ»,-ասաց Մ. Ասլանյանը։

ՏԻՄ ղեկավարին հիշեցրեցին վարչապետ Նիկոլ Փաշինյանի գրառման մասին, ըստ որի՝ «հիմա Վանաձորի «Գլորիա» և «Սարտոն» կարի ֆաբրիկաներում առկա է 200 թափուր աշխատատեղ՝ 120 հազար դրամ և ավելի մաքուր աշխատավարձով», ապա հարցրեցին՝ մարդիկ ինչո՞ւ չեն ուզում աշխատել։

«Վարչապետը շատ ճիշտ ստատուս է գրել։ Իտալիայում բնակվող մեր համաքաղաքացու ջանքերով է, որ կարի արտադրության ոլորտում 2400 աշխատատեղ կա։ Հիմա գործարարը ցանկանում է իր արտադրությունն ընդալայնել, մենք միշտ կարի մասնագետների պակաս ունենք։ Այստեղ խնդիրը քաղաքացիների նախասիրության ու նաև մասնագիտական որոշ հմտություններ ունենալու մեջ է, որովհետև հիմնականում Եվրոպայի պատվերով են կարում»,-պատասխանեց քաղաքապետ Ասլանյանը։

Մանրամասները՝ տեսանյութում։