«Ազգությամբ ադրբեջանցի գործիչների այս վարքագիծը հղի է ազգամիջյան բախումների վերաճման»
Սամցխե-Ջավախքի և Քվեմո-Քարթլիի հայկական հասարակական կազմակերպությունների խորհուրդը հայտարարությամբ է հանդես եկել Միքայել Ավագյանի վերաբացված կիսանդրու շուրջ վերջերս ծավալված իրադարձությունների կապակցությամբ: Այս մասին գրում է Jnews կայքը։
«Օրեր առաջ Ախալքալաքի շրջանի Բուղաշեն գյուղում բարերարների միջոցով վերաբացվեց գյուղի արժանավոր զավակ, Խորհրդային Վրաստանի իրավապահ համակարգի օրինապաշտ ներկայացուցիչ, 1990 թվականից` Հայաստանի Հանրապետության սահմանների պաշտպանության, այնուհետև նաև Արցախի ազատագրման գործում իր նշանակալի ներդրումն ունեցած հետախույզ Միքայել Ավագյանի կիսանդրին, որը բուռն արձագանք գտավ ինչպես Ադրբեջանի պետական ու հասարակական-քաղաքական, այնպես էլ Վրաստանի որոշ շրջանակների մոտ: Նշյալ շրջանակները, միահամուռ կերպով Միքայել Ավագյանին ներկայացնելով որպես «ահաբեկիչ», պահանջում են Վրաստանի իշխանություններից ապամոնտաժել հուշարձանը: Վրաց որոշ ընդդիմադիր շրջանակներ, տուրք տալով ադրբեջանական քարոզչամեքենայի կեղծիքներին, ձգտելով բորբոքել վրաց հասարակությանը և նրանց տրամադրել իշխանությունների դեմ, հայտարարում են, թե, իբր, Միքայել Ավագյանը հանդես է եկել ոչ միայն Արցախում և «ահաբեկել» ադրբեջանցիներին, այլև հանդիսացել է աբխազական պատերազմի մասնակից և պայքարել Վրաստանի տարածքային ամբողջականության դեմ: Վրաց որոշ ընդդիմադիր շրջանակների, նրանց թվում նաև ազգությամբ ադրբեջանցի գործիչների այս վարքագիծը հղի է ազգամիջյան բախումների վերաճման և Վրաստանում անկայունության ստեղծման վտանգով:
Սամցխե-Ջավախքի և Քվեմո-Քարթլիի հայկական հասարակական կազմակերպությունների խորհուրդը, այս ամենը որակելով որպես
-Ադրբեջանի կողմից Վրաստանի ներքին գործերին միջամտելու ակնհայտ դրսևորում,-Վրաստանի ընդդիմադիր շրջանակների և ազգությամբ ադրբեջանցի գործիչների և Ադրբեջանի պետական ու հասարակական-քաղաքական շրջանակների միահամուռ ջանքերով նախաձեռնված հակահայկական սադրանք,-ակնհայտորեն Վրաստանի պետության և պետականության դեմ ուղղված գործողություններ,-տարածաշրջանում հայկական գործոնի դուրսմղմանը և Վրաստանի` Ադրբեջանից քաղաքական ու տնտեսական հողի վրա կախյալ վիճակի խորացմանը ուղղված ծրագիր,
հայտարարում է.
-Միքայել Ավագյանը հանդիսացել է Խորհրդային Վրաստանի իրավապահ համակարգի ներկայացուցիչը Աբխազիայում մինչև 1990 թ., ով պաշտպանել և ներկայացրել է Վրաստանի պետական շահերը տվյալ Ինքնավար Հանրապետությունում: Այդ իմաստով Մ. Ավագյանի հիշատակը հարգանքի է արժանի ոչ միայն հայ ժողովրդի, այլ նաև մեր պետության` Վրաստանի կողմից:
-Միքայել Ավագյանը, 1990 թ. տեղափոխվելով Հայաստանի Հանրապետություն, իր գործուն մասնակցությունն է ունեցել սկզբից ՀՀ սահմանների պաշտպանությանը, այնուհետև` արցախյան գոյապայքարին, Արցախի ժողովրդին սպառնացող ցեղասպանական բռնությունների դեմ, կատարել է հանձնարարականներ և զոհվել այդ գործողությունների ժամանակ` 1994 թ.:
-Միքայել Ավագյանը 1990-1994 թթ. գտնվելով ՀՀ-ում և Արցախում` որևէ կերպ չէր կարող մասնակցել վաց-աբխազական պատերազմին, և այդ մասին տարածված լուրերը վրաց ընդդիմադիրների ու ադրբեջանական քարոզչամեքենայի հիվանդ երևակայության արդյունք են,
-Վրաստանի` հիմնականում ընդդիմադիր լրատվամիջոցների և հասարակական-քաղաքական շրջանակների հանրայնացրած տեղեկությունները սպասարկում են հարևան Ադրբեջանի շահերը և որևէ ընդհանուր աղերս չունեն իրականության հետ,
-Վրաստանի մայրաքաղաքում այս օրերին տեղի ունեցող գործողություններն իրենց ամբողջության մեջ ուղղված են Վրաստանի պետության և պետականության դեմ,
-գնահատելի են Վրաստանի իշխանությունների ջանքերը, որոնք ուղղված են հրահրված խնդիրը քաղաքակիրթ տարբերակով լուծելուն, ներքին և արտաքին սադրանքները չեզոքացնելուն:
Սամցխե-Ջավախքի և Քվեմո-Քարթլիի հայկական հասարակական կազմակերպությունների խորհուրդը դատապարտում է Վրաստանի ներքին գործերին միջամտելու դրսևորումները, որոշների՝ քաղաքական նպատակներով երկիրը և տարածաշրջանը ապակայունացնելու փորձերը և այս ծանր օրերին իր զորակցությունն է հայտնում Վրաստանի իշխանություններին», – գրում է Սամցխե-Ջավախքի և Քվեմո-Քարթլիի հայկական հասարակական կազմակերպությունների խորհուրդը:
Հունվարի 20-ին Ախալքալաքի շրջանի Բուղաշեն գյուղում վերաբացվել է Արցախյան ազատամարտիկ Միքայել Ավագյանի վերանորոգված կիսանդրին: 1994 թ.-ին կառուցված հին հուշարձանը վնասվել էր և գյուղի բարերարը, Միքայել Ավագյանի ազգականը միջոցներ էր հատկացրել՝ նոր հուշարձանի համար: Նոր հուշարձանի բացումը տեղի է ունեցել պաշտոնական անձանց ներկայությամբ, ինչպես տեղական իշխանություններից, այնպես էլ դիվանագիտական կորպուսից:
Հարակից հրապարակումներ`
- Վրաստանում ադրբեջանցիները պահանջում են ապամոնտաժել Միքայել Ավագյանի արձանը
- Վրաստանի ադրբեջանական համայնքը հանրահավաք է անցկացնելու Միքայել Ավագյանի կիսանդրու ապամոնտաժման պահանջով
- Ջավախքում Արցախյան պատերազմում զոհված ազատամարտիկի հուշարձանը քննարկվել է Վրաստանի խորհրդարանում
- Վրաստանի ԱԳՆ. Աժիոտաժն անտեղի է
- Ջավախքում Արցախյան պատերազմում զոհված ազատամարտիկի հուշարձանի բացումը սկանդալ է առաջացրել
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին