«Պետերբուրգյան» լույսերից դժգոհ համագյուղացիների դեմ համայնքապետը բողոք է ներկայացրել ոստիկանություն
Արարատի մարզի Այգեստան ու հարակից այլ գյուղերի ազատամարտիկները մտադիր են իրենց զինակից ընկերների պատիվն ու արժանապատվությունը պաշտպանելու համար միանալ երկուշաբթի օրը նախատեսված հանրահավաքին։
Panorama.am-ի հետ զրույցում գյուղի երեք բնակիչներ պատմեցին, որ գյուղապետ Սոկրատ Հովսեփյանը բողոք է ներկայացրել ոստիկանություն, թե իբր համագյուղացիներից երկուսը, ովքեր ազատամարտիկներ են, կոտրել են փողոցները լուսավորող լամպերը, ինչպես նաև գերեզմանների տարածքում գտնվող ջրի փականը (վինտիլը):
Գյուղացիները՝ Մերուժան Վարդանյանը, համայնքի ավագանու անդամ Պարգև Սարգսյանը, Արմենակ Վարդանյանն առանձին-առանձին զրույցներում ասացին, որ ամեն ինչ սկսել է մոտ 5-6 ամիս առաջվանից, երբ վեց հոգով գնացել են գյուղապետի մոտ ու դժգոհել, որ իրենք գյուղի նախկին լուսավորության համակարգն են ուզում։ Ըստ նրանց, նախկինում երկաթե սյուները բարձր են եղել, գյուղապետը դրանք մի քանի տարի առաջ կտրել է, կարճացրել, իսկ մեկ մետր բարձրությամբ մնացած սյունների վրա լամպեր է դրել։ Գյուղապետը դրանք գյուղացիներին ներկայացրել է որպես պետերբուրգյան լույսեր։ Թե ինչ է արել կտրած սյունները, գյուղացիները հստակ չեն ասում, հույս են հայտնում՝ քննությունը կպարզի։
«Մենք վեց հոգով ենք մտել գյուղապետի մոտ։ Հիմա ինքը մեզանից՝ Արմոյին ու Արտուշին զրպարտում է, իբր նրանք ասել են, որ իրենք Այգեստանի լույսերն ենք ուզում, մեզ պետերբուրգյան լույսերը պետք չեն, իբր ասել է՝ դրանք իրենք կջարդեն։ Էդ ինքն է պետերբուրգյան դրել անունը։ Բայց նման բան չի եղել, Արտուշն ասել է, մեզ մեր լույսերը վերադարձրեք»,-ասաց Պարգև Սարգսյանը, ով համայնքի ավագանու անդամներից է։
Նա նկարագրում է, դրանք այնքան ցածր են, որ կողքով անցնող երեխայի պայուսակն էլ կարող է կպնել ու կոտրվել։
Մի քանի օր առաջ՝ ոստիկանության օպերներն են եկել, Պարգև Սարգսյանին, Արմենակ Վարդանյանին, Արտուշ Մկրտչյանին ու Հակոբ Հասրաթյանին տարել են բաժին, հայտնել են բողոքի ու իրենց մեղսագրվող արարքների մասին, գյուղացիներն էլ ասել են՝ նման խոսակցություն չի եղել։ Այսօր բաժին է գնացել նաև հինգերորդ գյուղացին՝ Սամվել Մկրտչյանը պատմելու խոսակցությունը, վեցերորդը Հայաստանում չէ։
«Հարցը բաժին տանելը չէ, ինչքա՞ն պետք է այսպես շարունակվի։ Արտուշն էդ մարդը չի էլի։ Ոչ ուզում ենք գյուղապետը դատվի, ոչ բան, ոչ էլ հրաժարականն ենք պահանջում, աշխատում է, թող նորմալ աշխատի, աջ ու ձախ վիրավորում է գյուղացիներին, որակում պլանքաշներ։ Իմ երեխեն եկել է, ինձ հարցնում է, պապա, խոսում են, որ պլան ես ծխում, բայց ես ծխախոտ անգամ չեմ ծխում։ Ես չեմ ուզում գնամ ոստիկանություն, ասեմ՝ զրպարտում են»,-ասաց Պ. Սարգսյանը։
Ոստիկանություն տարվածներից ազատամարտին ու ապրիլյան քառօրյա պատերազմին մասնակցած Արմոն (Արմենակ Վարդանյան) էլ ասաց, գյուղապետն իր պատվի հետ է խաղում։
«Ասում է՝ գյուղի լույսերն ենք ջարդում, վինտիլ ենք ջարդում։ Բա իմ սրբավայրն է դա, պիտի վինտիլը ջարդեմ, որ ջուրը լցվի ընկերոջս գերեզմանի քարի տա՞կ։ Շանտաժ է անում, ամեն ինչ անում է, որ գնանք իրեն կոպտենք, խփենք, որ գնա էլի բողոքի, մենք շատ զուսպ ենք»,-ասաց նա։
Գյուղացիներն այս ու այլ խնդիրների, այդ թվում մանկապարտեզի շենքի մի մասը վաճառելու, մասին հայտնել են թե պետական վերահսկողական ծառայությանը, թե Արարատի մարզպետին։
«Բայց մենք չգիտենք, թե ինչ արդյունք է ունեցել մեր հանդիպումը, հո չե՞նք կարող ամեն անգամ գնալ մարզպետի մոտ։ Բայց եթե հարցին լուծում չեղավ, մենք հասնելու ենք մինչև վարչապետի մոտ»,-ասաց Արմենակ Վարդանյանը։
Նախկին դատախազ, այսօր գյուղապետ Սոկրատ Հովսեփյանը Panorama.am-ի հետ զրույցում ասաց՝ գյուղացիները «կլյաուզա» են անում։ Նշեց՝ ինքը սյուները ոչ թե կտրել է, այլ դրանք գազի խողովակներ են եղել, կտրատել են մինչև 2 մ երկարությամբ ու տեղադրել են։
«Իրենք իմ դեմ բողոքեցին, վերջին երկու տարում երեք քրեական գործ բացեցին, հետո դրանք կարճվեցին՝ հանցակազմի բացակայության հիմնավորումով։ Դիտավորյալ են անում։ Արտուշն ասեց՝ ես քանդելու եմ։ Հիմա ես բողոքել եմ ոստիկանություն, համայնքային գույքը գողանալու և փչացնելու մասին եմ հայտնել։ Բողոքել են, ջհանդամին բողոքեն, հո ես իրենցից չե՞մ վախենում»,-նշեց գյուղապետը։
Հովսեփյանն էլ ասում է՝ գյուղացիների դուրը չի գալիս, որովհետև պահանջում է հարկերը վճարել։ Հարցրեցինք, վրե՞ժ է լուծում գյուղապետը, պատասխանեց՝ «Նրան ովքե՞ր են, որ ես վրեժ լուծեմ։ Հիմա եթե ես բողոքել եմ, հայտարարություն եմ տվել, որ գյուղում գողություն է եղել, թող գնան, ասեն, մենք չենք արել։ Էն օր ասում են՝ եթե բիբար չես կերել, ինչի՞ ես մրմռում, ինչի՞ ես քեզ վրա վերցնում։ Թող գնան ասեն՝ Հովսեփյան Սոկրատը ճիշտ չի ասում»։
Համայնքի ղեկավարի խոսքով, եթե գյուղացիները համարում են, իրենց պատիվն ու արժանապատվությունը արատավորել են, ապա կարող են դիմել դատարան։