Ձեր վստահելի աղբյուրը

«Հայաստանը ոչ մի նոր բան չի ասում։ Չի ասում ձևաչափ փոխել, այլ վերադառնալ այն կետին, որը կար 1994 թվականի Բուդապեշտյան գագաթաժողովը»,- Փաշինյան-Ալիև սպասվելիք հանդիպման թեմայով քննարկմանն ասաց ՀՀ ԱԳ նախկին փոխնախարար, դիվանագետ Արման Նավասարդյանը։ 

Նրա խոսքով, եթե Մինսկի խումբը և մյուս եվրոպական բարեկամներն իրոք ուզում են լինել արդար, օբյեկտիվ, թող մի հատ հետ նայեն, տեսնեն, թե ինչ է կատարվել 20-րդ դարի պատմության ընթացքում այն իրադարձություններում,  պետությունների հետ, որոնց բախտը, ճակատագիրը որոշվել էր երրորդ երկրի առանց նրա մասնակցության։

«Չի կարելի նման արատավոր ճանապարհով գնալ։ Հիմա Հայաստանի իշխանությունն ասում է՝  պետությունը, ժողովուրդը ներկա գտնվի իր ճակատագրի հետագա հարցերի լուծմանը, ասում են՝ դա չի կարելի։ Այսօր ոչ մի կետ չկա, որի վրա հնարավոր լինի հենվել, չընդունել այն, ինչ առաջարկում է  հայկական կողմը»,- ասաց Ա.Նավասարդյանը։

Նա հիշեցրեց, թե  Բաքուն քանի անգամ և ինչ ձև է ուզել փոխել բանակցային ձևաչափը՝ սկսած ՆԱՏՕ շրջանակների տեղափոխման հարց, ՄԱԿ, այլ երկրների ներգրավում և այլն։

Քննարկմանը ներկա Միջազգային և անվտանգության հարցերի հայկական ինստիտուտի հիմնադիր, քաղաքագետ Ստյոպա Սաֆարյանն ասաց, որ երկու առանցքային խեղաթյուրում է տեղի ունեցել՝ բանակցային ֆորմատի և հակամարտության էության, սահմանման խեղաթյուրումներ։
 
«Սերժ Սարգսյանը, երբ հասկացավ, թե որքան են այս խեղաթյուրումները ճակատագրական նշանակություն ունեցել Հայաստանի համար, փորձեր կատարեց շտկելու, բայց  դա նրան թույլ չէին տալու»,- նշեց նա։

Ս. Սաֆարյանի խոսքով, Հայաստանը տարբերվող մի բան է սկսել. «Նախկինում սպասում էինք, թե համանախագահներն ինչ առաջարկներ են բերելու, հայտարարություններ են անելու, որոնց ասենք՝ կամ համաձայն ենք, կամ ոչ։  Հայաստանը հիմա քայլեր է անում, իր քայլերով ուղղակիորեն պարտադրելով բոլորին՝ սկսած Ադրբեջանին, վերջացրած ԵԱՀԿ Մինսկի խմբի համանախագահներից, դիրքորոշում հայտնել։ Եթե Մինսկի խմբի ներսում որևէ անդորր խախտվել է, վախեցել են ֆորմատի վերականգնումից, մտածում են՝ բա Ալիևին ոնց են համաձայնեցելու, դա Հայաստանի խնդիրը չէ։ Մինսկի խումբը նոր չէ, որ ճգնաժամի մեջ է։ Այս կտրվածքով Հայաստանի արտաքին քաղաքականությունը այժմ դրական իմաստով ձեռնոց նետող քաղաքականություն է, չի պատրաստվում Հայաստանի շահերի հաշվին բավարարել որևէ այլ երկրորդական շահ»։

ԱԺ «Իմ քայլը» խմբակցության անդամ, պատգամավոր Սոս Ավետիսյանն ասաց, որ երբ բանակցություններ են ընթանում, կարևոր է ճշգրտել, թե ինչի շուրջ են  բանակցում։

«Շատ կարևոր է ճշգրտումը։ Պրոցեսը հիվանդացել է, դրա բուժման նպատակով է արվում։ Եթե դու բանակցում ես զուտ բանակցելու համար, բայց նաև պատերազմ ես տանում, նշանակում է,  որ թուլացել ես ինչ-որ տեղ քո բանակցություններում, որովհետև չես  ճշգրտել  այն խնդիրները, որոնք կան։ Արցախի վերադարձը բանակցային ֆորմատի այս ճշգրտումներից մեկն է»,- ասաց նա։