Ձեր վստահելի աղբյուրը

«Ես նախագահ Արմեն Սարգսյանին ընդունում եմ որպես Հանրապետության նախագահ, ով ունի սահմանադրությամբ և օրենսդրությամբ իրեն վերապահված լիազորություններ»,- այս մասին այսօր լրագրողների հետ հանդիպման ժամանակ ասաց ՀՀ վարչապետ Նիկոլ Փաշինյանն՝ անդադառնալով հարցին, թե ինչո՞ւ  ՀՀ նախագահը չմասնակցեց Արցախում տեղի ունեցած Անվտանգության խորհրդի նիստին և արդյոք վարչապետը Արմեն Սարգսյաանին ընդունում է որպես նախկին իշխանությունների կադր։

Նրա խոսքով՝  փոխադարձ հարգանքով են վերաբերում նախագահին վերապահված լիազորություններին: «Մենք այդ թեմաներով մի քանի անգամ քննարկումներ ենք ունեցել և շատ հստակ արձանագրել ենք, թե ինչպիսին է այսօր իրավիճակը և ինչպիսին են սահմանադրական կարգավորումները»,- նշեց վարչապետը:

Ինչ վերաբերում է Արմեն Սարգսյանի՝ Անվտանգության խորհրդի նիստին չմասնակցելուն՝ Նիկոլ Փաշինյանը նախ ասաց, որ ինքն ԱԽ նիստի նախորդ առավոտյան է գնացել Ստեփանակերտ, և ողջ օրվա ընթացքում քննարկումներ են ունեցել տարբեր ֆորմատներով, քանի որ անհրաժեշտ էր ճշգրիտ գործողություն անել՝ ի՞նչ պետք է անենք, ինչպե՞ս, ի՞նչ շրջանակում և ի՞նչ ֆորմատով:

«Դա որոշվել է միայն նախորդ օրը ուշ երեկոյան։ Այնտեղ կային բազմաթիվ հարցեր, ես չեմ կարող հիմա փակագծերը բացել, և այն ժամանակ, երբ հստակ որոշվել է, թե ինչ պետք է տեղի ունենա, այդ ժամանակ ես ինքս վերցրել եմ հեռախոսը և զանգել եմ Արմեն Սարգսյանին: Ցավոք սրտի, չի հաջողվել  կապ հաստատել՝ չգիտեմ ինչ պատճառով, քանի որ այդ պահին իմ սովորական գործիքները ձեռքիս տակ չէր, որ ես հանձնարարեի արագ միացնել և այլն: Անվտանգության խորհրդի քարտուղարին հանձնարարել եմ, որ Հանրապետության նախագահի հետ կապվի և հրավիրի Անվտանգության խորհրդի նիստին։ Այդտեղ մի ուրիշ սկանդալ էլ կա՝ ուղղաթիռային, քանի որ Պաշտպանության նախարարը հանդիպում ուներ, հաջորդ օրը առավոտյան պետք է ուղղաթիռով գար, ես նաև Անվտանգության խորհրդի քարտուղարին խնդրել եմ՝ փոխանցի, որ ուղղաթիռով առավոտյան Պաշտպանության նախարարի հետ խնդրում ենք, որ ինքը գա և ներկա լինի, բայց հետո չիմացա, ճիշտն ասած,  առիթ չեմ ունեցել քննարկելու, թե ի՞նչ է պատահել, ինչո՞ւ չեկավ: Բայց սա է իրականությունը»,- ասաց Նիկոլ Փաշինյանը:

Վարչապետը՝ ԱԽ կազմի ընդլայնման մասին
«Անվտանգության խորհրդի կազմն ընդլայնելու հետ կապված որևէ խնդիր չեմ տեսնում»,- ասաց վարչապետ Նիկոլ Փաշինյանը՝ պատասխանելով ԱԽ կազմն ընդայնելու մասին հարցին:

Վարչապետը հայտնեց՝ առաջին փուլով աշխատում են, որ ԱԺ նախագահը ընդգրկվի ԱԽ կազմում: «Հիմա մենք աշխատում ենք այդ օրենսդրական փաթեթի վրա: Իրավաբանությունն ասում է, որ Սահմանադրության «Անվտանգության խորհուրդ» բաժինը գրված է «Կառավարություն» ենթավերնագրի ներքո: Այսինքն՝ Անվտանգության խորհուրդը կառավարության կառույց է:

Օրենքի նախագիծը գրում են, գալիս են ու հանգում այս խնդրին: Եթե ԱԺ նախագահին դարձնում ենք ԱԽ անդամ, նշանակում է, որ ԱԺ նախագահի կարգավիճակն իջեցնում ենք, քանի որ վարչապետն է Անվտանգության խորհրդի ղեկավարը, այս համակարգով Ազգային ժողովի նախագահին «մտցնում» ենք կառավարության կառուցվածքի մեջ»,- նշեց վարչապետը:
Նույնը, ըստ նրա, ՀՀ նախագահի դեպքում է. « Ինձ համար որևէ խնդիր չկա: Ընդհակառակը, եթե այդպիսի ենթատեքստեր փնտրենք այս ամենի մեջ, ինձ համար ավելի լավ կլինի: Բայց այստեղ իրավունքի, լեգիտիմության խնդիր կա»:

Նիկոլ Փաշինյանի խոսքով՝ Սահմանադրությամբ կան նման խնդիրներ, որոնց կարգավորման վրա աշխատում են և փորձում են հասկանալ, թե ինչ լուծումներ կան: «Հիմա մեր գտած լուծումն այն է, որ ՀՀ նախագահն ու ԱԺ նախագահը ԱԽ նիստերին կարող են մասնակցել հրավիրյալի կարգավիճակով: Ինձ համար շատ ավելի լավ կլինի, որ բոլոր նիստերին մասնակցեն և ՀՀ նախագահը, և ԱԺ նախագահը»,- նշեց վարչապետը: