Սաթիկ Սեյրանյան. Ստիպված եմ բարձրաձայնել, որովհետև այլ ելք չկա
«Միության նախագահի պաշտոնը ստանձնելիս պատկերացնում էի, թե ինձ ինչեր են սպասվում, սակայն չէի մտածում, որ վիճակն այդքան վատ է»,-լրագրողների հետ ընթացող հանդիպմանը հայտարարեց Ժուռնալիստների միության նախագահ Սաթիկ Սեյրանյանը։
Նրա խոսքով, պաշտոնավորումից ի վեր ինքն ավելի շատ զբաղված է տեխնիկական, վարչական, իրավական, վերանորոգման հարցերով։ Հերթը բուն գործունեությանը չի հասնում։
Նախորդ ամիսներին միության շենքում տարածքներ վարձակալած տնտեսվարողների հետ բանակցություններն արդյունք չեն տվել։
«Ինձ ճիշտ հասկացեք, բարոյական առումով այս ամենի մասին բարձրաձայնելն ինձ համար դժվար է։ Բայց ստիպված եմ բարձրաձայնել, որովհետև այլ ելք չկա»,-ասաց նա։
Բանախոսը հայտարարեց, իրենք բացահայտել են, որ տարածքների զգալի մասն այլևս միությանը չեն պատկանում, ժամանակին կնքվել են «ստրկատիրական, նվաստացուցիչ» պայմաններով պայմանագրեր, որոնց լուծումը մեզ շատ բարդ ճանապարհ է խոստանում։
Նա մանրամասնեց, միության շենքը գտնվում է Երևանի կենտրոնում, Պուշկին 3 ա հասցեում՝ կոմերցիոն առումով բավականին լավ տեղում։
«Շենքում կան վարձակալներ՝ «Ֆոտոլուր» գործակալությունը, Հելսինկյանը, «Էլզա Գրիգ» անունով մի ընկերություն, «ավագանրդ Քլաբ» ընկերությունը, Լրատվամիջոցների աջակցության հիմնադրամը, «168 ժամ»-ը և Արամայիս Հարությունյան Ա/Ձ-ն է նաև այնտեղ գործունեություն ծավալում»,-ասաց նա։
Սեյրանը հիշեցրեց, օրեր առաջ քաղաքապետարանը բարձրաձայնում էր, թե օպերային հարակից տարածքներն ինչ էժան ու «նվաստացուցիչ» պայմաններով են տրվել վարձակալության, ապա հայտարարեց՝ Հայաստանի ժուռնալիտների միությունում ավելի վատ վիճակ է։
«Վարչության նիստում քննարկվել ու որոշում է կայացվել մյուսների, այդ թվում «168 ժամ»-ի պայմանագիրը պետք է փոփոխության ենթարկվի։
Բայց մենք լուրջ խնդիրներ ունենք երեք կազմակերպությունների հետ, որոնք վարձակալել են առաջին հարկի ու նկուղային տարածքները։ «Էլզա Գրիգ» ընկերությունը մինչև 2080 թվականը վարձակալել է 798.6 քմ 400 հազար դրամով, որի մեջ ներառված են հարկերը, գույքահարկն ու համատիրության վճարները պետք է միությունը կատարի։ Միայն այդ տարածքի գույքահարկը տարեկան կազմում է 567 հազար դրամ։ Ստացվում է 1 քմ-ն այդ ընկերությանը տրվել է 501 դրամով»,-նման տվյալներ հրապարակեց միության նախագահը։
«Էլզա Գրիգ» ընկերությունն այդ տարածքը տվել է ենթավարձակալության՝ այլ տնտեսվարողների։ Երբ փորձել են վարկ վերցնել «խայտառակ վիճակում» գտնվող շենքի վերանորոգման համար, բանկը պահանջել է, որ վարձակալները նոտարով հավանություն տան։ Այդ ժամանակ կարողացել են ծանոթանալ ենթավարձակալության պայմանագրերից մեկին։
«Պարզվեց, որ 798.6 քմ-ից ընդամենը մի հատվածը վարձակալության է տրվել 3 մլն 800 հազար դրամով։ Կողքի հատվածը, որի վրա գրված էր տրվում է վարձով, զանգահարեցինք, ներկայացանք որպես քաղաքացի, ճշտեցինք վարձի չափը։ Ասացին 5500 դոլար»,-շարունակեց թվարկել միության նախագահը։
Սեյրանյանն ասաց՝ փորձել է խոսել «Էլզա Գրիգ» ընկերության սեփականատիրոջ հետ։ Ասաց՝ ճանաչված հեղինակություն է Խդոյի Գրիշ մականունով։
«Ծանր խոսակցություն եղավ։ Մենք նաև Պետգույքից ենք մասնագետ հրավիրել, տարածքն են գնահատել, Կադաստրից ենք հրավիրել, չափագրումներ են արել։ Երբ մենք մեր պայմանները դրեցինք, ասացինք՝ չի կարող մինչև 2080 թվականը վարձակալության պայմանագիր լինել։ Ասաց՝ դու ինձ ուզում ես քցել։ Ես էլ ասացի՝ թույլ չեմ տա, որ ինչ-որ մեկը միությանը քցի։ Միակ ճանապարհը մնում է դատարանը»,-հայտարարեց միության նախագահը։
Նա նշեց, 764 քմ տարածք՝ միության դահլիճը տրամադրվել է «Ավանգարդ քլաբ» ընկերությանը, այնտեղ կազմակերպվել են համերգներ, «Վիտամին ակումբ»-ի ներկայացումները, այսինքն կարելի էր օգտագործել։
«Հիմա խայտառակ վիճակում է, ավերակ, առնետանոց, ջրեր են հոսում։ Վարձակալությամբ տրվել է մինչև 2112 թվականը 480 հազար դրամով, գույքահարկն ու համատիրության վճարները միության վրա։ Մենք հիմա չգիտենք՝ ինչպես վարվել։ Ինչպես օպերայի հարակից տարածքների սրճարանների դեպքում, նրանք պաշտպանված են պայմանագրով, որը խայտառակ պայմանագիր է»,-ասաց նա։
Նա խնդրի լուծման համար դիմեց բոլոր ԶԼՄ-ների ու լրագրողների աջակցությանը, ասաց՝ միությունը կարող է ստանալ ֆինանսական մեծ միջոցներ, անկախ այն բանից, թե ով կլինի նախագահը, ցուցաբերել օգնություն լրատվամիջոցներին, բայց այսօր նման հնարավորություն չունի։
Սեյրանյանն ասաց, որ միության գույքային հարկերը հասել են մոտ 3.5 մլն դրամի։ Նախկինում ստեղծագործական միությունները դիմել են քաղաքապետարան, պարտքերը ներվել են։
«Եթե միությունը վերադարձնի այս տարածքները կարող է հարկերն էլ վճարել, վերանորոգում իրականացնել, լրագրողներին էլ օգնություն ցուցաբերել։ Հայաստանի ժուռնալիստների միությունը 21-րդ դարում ունի մի հատ պայթած համակարգիչ, որով ոչինչ անել հնարավոր չէ, պայման չկա, աշխատասենյակումս մի վայրկյան չեմ նստել, պայման չկա, հոսանքալարեր են»,-ասաց նա։
Դատական գործընթաց ենք սկսել նաև Արամայիս Հարությունյան Ա/Ձ-ի հետ, որը տարածքներ է վարձակալել մինչև 2030 թվականը՝ 138 քմ-ն վարձակալել է 50 հազար դրամով, հոսթել է գործում, տերն էլ նախկին ոստիկան։
«Իր հետ ընդհանրապես բարդ է առնչվելը, նամակագրությամբ ենք շփվում»,-ասաց նա։
Համեմատության համար Սաթիկ Սեյրանյանը նշեց, «Ֆոտոլուր» գործակալությունը 2-րդ հարկում՝ այսինքն ոչ կոմերցիոն նշանակության տարածքում 36 քմ տարածքը վարձակալել է 80 հազար դրամով, գույքահարկն էլ ինքն է վճարում։
Իր խմբագրած «168 ժամ» թերթն էլ 215 հազար դրամ է վճարում, 1 քմ-ի համար 2 հազար 96 դրամ։ Հելսինկյան ընկերությունը վճարում է 95 հազար դրամ է վճարում՝ 3947 դրամ 1 քմ-ի համար։
Միության հետ համագործակցող փաստաբան Աղավնի Մադոյանն ասաց, կնքված պայմանագրերում բացակայում է վարձակալի ու վարձատուի իրավունքների ու պարտականությունների արդարացի հավասարությունը։
«Վարձակալն իրավունք ունի երկու ամիս առաջ գրավոր տեղեկացնելով լուծել պայմանագիրը, իսկ վարձատուն նման իրավունք չունի։ Միակ նախապայմանը վարձավճարը չվճարելն է»,-մանրամասնեց նա՝ ավելացնելով, որ միության վարչության որոշ անդամների ստորագրությունները կեղծված են։
Մադոյանն ասաց, հաղորդում են ներկայացրել հանցավորության մասին, քրեական գործ է հարուցվել՝ լիազորությունների չարաշահման ու փաստաթղթերի կեղծման հատկանիշներով։