Ձեր վստահելի աղբյուրը

Գործադիրի այսօրվա նիստում ընդունվեց ԱԺ «Լուսավոր Հայաստան» խմբակցության ներկայացրած օրենսդրական նախաձեռնությունը «Վարչական իրավախախտումների վերաբերյալ Հայաստանի Հանրապետության օրենսգրքում լրացում կատարելու մասին» օրենքի նախագծի իրավակարգավորումների վերաբերյալ։

ՀՀ արդարադատության նախարար Արտակ Զեյլնալյանը ներկայացնելով նախագիծն՝ ասաց, որ առաջարկվում է վարչական պատասխանատվություն սահմանել լիցենզիա չունեցող անձանց կողմից վարկային ծառայությունների գովազդումը լրատվության միջոցների, սոցիալական ցանցերի, էլեկտրոնային հաղորդակցման ցանկացած այլ միջոցների օգտագործմամբ։

ՀՀ վարչապետ Նիկոլ Փաշինյանը, դիմելով զեկուցող ՀՀ արդարադատության նախարար Արտակ Զեյնալյանին, ասաց. «Մեր գործընկերների մտահոգությունը հետևյալն է՝ տարբեր տեղերում գովազդվում են վարկեր, փողեր, պարտքեր, որի արդյունքում առաջանում են խնդիրներ, մարդիկ «տոկոսի տակ» են ընկնում և այլն: Մեր գործընկերներն առաջարկում են, որ այն կազմակերպությունները, որ լիցենզիա չունեն և նման ծառայություն են առաջարկում, այդ գովազդի համար ենթարկվեն վարչական տույժի, բայց մեր օրենսդրությամբ կա հնարավորություն, որ առանց լիցենզավորման նման օրինական ծառայություն մատուցվի: Այստեղ խնդիրը կա, բայց մենք ԿԲ-ի հետ քննարկել և կարևորել ենք քաղաքացիների ֆինանսական գրագիտության բարձրացումը: Շատ դեպքերում պետք է ուսումնասիրել՝ գովազդի սահմանափակում պե՞տք է անել, թե՞ ոչ, օգտակա՞ր է, թե՞ ոչ, բայց պետք է  ծրագրեր իրականացնենք՝ քաղաքացիների ֆինանսական գրագիտությունը բարձրացնելու առումով, որ մարդիկ կարողանան հստակ հաշվարկել՝ ինչպիսի պարտք արժե վերցնել, ինչպիսի գործունեության համար, և լավ կլինի, որ դրանք միտված լինեն արդյունքներ, ոչ թե հետևանքներ ունենալու»:

Վարչապետի խոսքով՝ գործադիրի առաջարկությունն այն է, որ այս փուլում գոնե հարկավոր է գնալ քաղաքացիների ֆինանսական գրագիտությունը բարձրացնելու ուղղությամբ:

ՀՀ կենտրոնական բանկի նախագահ Արթուր Ջավադյանը հայտնեց, որ քաղաքացիների ֆինանսական գրագիտության բարձրացման ուղղությամբ բազմաթիվ ծրագրեր են իրականացնում, մանրամասն աշխատում են ԿԳՆ հետ, վերապատրաստում են անցել բավական մեծ թվով ուսուցիչներ՝  մոտ 12 000, ֆինանսական գրագիտության մեկամսյակ են անցկացնում բոլոր մարզերում, և այս տարի էլ, ինչպես նախորդ տարի, իրականացվելու են միջոցառումներ, հավաքներ, կլոր սեղաններ, բոլոր բուհերում, ուսումնական կազմակերպություններում աշխատում են անցկացնել սեմինարներ, հեռուստատեսությամբ և տարբեր այլ մեդիամիջոցներով:

Ինչ վերաբերում է նախագծին, Արթուր Ջավադյանն ասաց, որ այս նախագծում առաջարկն այն է, որ ոչ միայն գովազդի, այլև նշված գործողության համար՝ առանց լիցենզավորման գործունեություն ծավալողները, շատ խիստ պատժվեն առաջին անգամ 2 մլն դրամով, եթե կրկնվի՝ 4 մլն դրամով:

«50 հազար դրամը շատ ավելի քիչ գումար է։ Կան արդեն հարուցված քրեական գործեր՝ ոչ լիցենզավորված գործունեություն իրականացնելու համար։ 50 հազար դրամը, չեմ կարծում, որ բավարար կանխարգելիչ միջոց է», - նշեց ԿԲ նախագահը:

Նիկոլ Փաշինյանը ԿԲ նախագահից հետաքրքրվեց՝ հիմա նախագծին կո՞ղմ են, թե՞ դեմ, Արթուր Ջավադյանն ասաց, որ կողմ են: 

ՀՀ փոխվարչապետ Մհեր Գրիգորյանը հետաքրքրվեց՝ եթե բուն գործունեության տեսակի հետ խնդիր չունեն, ապա գովազդի հետ ինչո՞ւ են խնդիր առաջացնում, գուցե գործունեությունը արգելեն և դրա համար սահմանեն վարչական պատասխանատվություն:

«Սա եղավ կուրսայինների պատմությունը, որ բուն ֆունկցիայի հետ խնդիր չունենք, բայց գովազդն արգելում ենք: Ես կարծում եմ՝ այդ գործունեությունն ինքնին պրոբլեմ է, պրոբլեմ եղել է և լինելու է, պետք է արգելել այդ գործունեությունը, դրան չենթարկվելու դեպքում պատասխանատվության ենթարկել այդ անձանց»,- ասաց փոխվարչապետը:

Արթուր Ջավադյանը նշեց, որ ԼՀԿ խմբակցությունն առաջարկել է համապատասխան տուգանքներ նման գործունեություն իրականացնողների համար, իրենք նախագծի վերաբերյալ արել են առաջարկներ, որոնք ընդունվել են նախագծի հեղինակների կողմից, ուստի այդ տեսքով ներկայացված նախագծին կողմ են: 

«Գրավոր տեքստում գրված է, որ բացասական եզրակացություն պետք է տալ, բայց ձեր բանավոր խոսքում ասում եք՝ շատ էլ լավ նախագիծ է։ Այստեղ կարող եմ կռահել, որ գործ ունենք հին իներցիայի հետ, քանի որ նախագիծը ներկայացված է ընդդիմության կողմից, ուրեմն պետք է մերժել։ Եթե դա է, ուրեմն շատ վատ իներցիա է», - ասաց Նիկոլ Փաշինյանը:

Այսպիսով, Կառավարությունն այս նախագիծն ընդունեց։ Վարչապետ Փաշինյանն էլ հավելեց․ «Քանի որ մեր Կառավարության 90 տոկոսը նույն կառավարման համակարգն է, պաշտոնապես ասում եմ՝  որևէ նախագիծ եթե ներկայացրել է ընդդիմությունը, դա դեռ չի նշանակում, որ այն պետք է մերժվի։ Այս պահից արձանագրենք այդ գործելակերպի ավարտը»: