Ձեր վստահելի աղբյուրը

«Հայկական առողջապահական ազգային խորհուրդ» ՔՀԿ կոալիցիան, որն իր մեջ ընդգրկում է առողջապահական ոլորտը կարգավորող 15 (տասնհինգ) հասարակական կազմակերպություններ, իր մտահոգությունն է հայտնում ՀՀ-ում «Գարդասիլ-4» պատվաստանյութի կիրառման ծրագրի կապակցությմաբ։

«Հայկական առողջապահական ազգային խորհուրդ»  ՔՀԿ կոալիցիայի կառավարման խորհրդի նախագահ Գևորգ Գրիգորյանը հայտարարություն է տարածել, որտեղ ասված է. «Այս առիթով «Հայկական առողջապահական ազգային խորհուրդ» ՔՀԿ կոալիցիայի  նախագահ Գևորգ Գրիգորյանը դիմել է ՀՀ ԱԺ նախագահ Արարատ Միրզոյանին, Առողջապահության և սոցիալական հարցերով մշտական հանձնաժողովի նախագահ Նարեկ Զեյնալյանին, «Իմ քայլը», «Բարգավաճ Հայաստան» և «Լուսավոր Հայաստան» խմբակցությունների ղեկավարներին` խորհրդարանական լսումներ կազմակերպելու, խնդիրը համակողմանի քննարկելու և լուծումներ տալու նպատակով։

Խորհրդարանական լսումների անհրաժշտությունն առաջացել է  այն պատճառով, որ լրատվամիջոցներում շրջանառվում է Առողջապահության նախարարի հրամանը 14-45 տարեկան անձանց շրջանում «Գարդասիլ-4» պատվաստանյութի կիրառման վերաբերյալ, որը տարիքային այս խմբի դեպքում հակասում է Գարդասիլ-4-ի ընդհանուր բնութագրում, FDA ցուցումներում և  2016-2020 թվականների իմունականխարգելման ազգային ծրագրում առկա տարիքային սահմաններին։

Հայաստանի Հանրապետության Ազգային ժողովի նախագահ Արարատ Միրզոյանին, Մշտական հանձնաժողովի նախագահ Նարեկ Զեյնալյանին, «Իմ քայլը» խմբակցության  ղեկավար Լիլիթ Մակունցին, «Բարգավաճ Հայաստան» խմբակցության ղեկավար Գագիկ Ծառուկյանին, «Լուսավոր Հայաստան» խմբակցության ղեկավար Էդմոն Մարուքյանին

Հարգելի՛ լիազոր մարմնի ներկայացուցիչներ,

«Հայկական առողջապահական ազգային խորհուրդ» քաղաքացիական հասարակական կազմակերպությունների կոալիցիան,  որն իր մեջ ընդգրկում է առողջապահական ոլորտը կարգավորող 15 (տասնհինգ) հասարակական կազմակերպություններ, իր մտահոգությունն է հայտնում ՀՀ-ում «Գարդասիլ-4» պատվաստանյութի կիրառման ծրագրի կապակցությամբ։

Համացանցում հայտնվել են հրապարակումներ և տեսանյութեր, որոնց համաձայն Առողջապահության նախարարը 2019 թվականի հունվարի 29-ին ստորագրել է մի հրաման, ըստ որի «Գարդասիլ-4» պատվաստանյութը պետք է կիրառվի 14-45 տարեկան անձանց շրջանում` Տե՛ս հղումը։

2016 թվականի մարտի 17–ին կառավարության որոշմամբ ընդունվել է 2016-2020 թվականների իմունականխարգելման ազգային ծրագիրը, ըստ որի «Գարդասիլ-4» պատվաստանյութը ծրագրված է կատարել միայն 13 տարեկան աղջիկներին: Տե՛ս  հղումը։

Ըստ FDA-ի վերջին հրապարակման (թարմացվել է 02/05/2018) Գարդասիլ-4-ը ցուցված է 9-26 տարեկան անձանց:

Տե՛ս հղումը։

Նշեմ, որ 2017 թվականին ԳԱՎԻ հիմնադրամի կողմից Հայաստանի Հանրապետությանը նվիրած «Գարդասիլ-4» պատվաստանյութի պիտանելիության ժամկետն ավարտվում է 2019 թվականի հոկտեմբերին, իսկ այդ խմբաքանակն ամբողջությամբ չի իրացվել։ Սակայն, ի պատասխան մեր հարցմանը ԱՆ-ն նշել է, որ 2019 թվականին գնելու է «Գարդասիլ-4»-ի նոր խմբաքանակ` յուրաքանչյուր սրվակը 4,5$-ով (շուկայական արժեքը մոտ 100$):

Խնդրահարույց են նաև նախկինում հայտարարված սքրինինգային ծրագրերի կատարման թերացումները, որոնք բերել են ՀՀ-ում արգանդի վզիկի քաղցկեղի դեպքերի հաճախության ավելացման։

Արդեն սկսվել է «Գարդասիլ-4»-ի պատվաստման իրազեկման փուլը (Տե՛ս https://www.shanttv.com/programs/buj-info/videogallery/programs/program223.html – 23-րդ րոպեից)։ Ավելին, թեև նախարարի հրամանը չի հրապարակվել, սակայն արդեն շատ երիտասարդներ ստացել են այդ պատվաստանյութը (անվճար), ինչը հրապարակվել է ֆեյսբուքյան տիրույթում (Տե՛ս  հղումը)։

Հաշվի առնելով «Գարդասիլ-4» պատվաստանյութի կիրառման նկատմամբ հանրային դժգոհությունը և բժշկական մասնագիտական ոչ միանշանակ վերաբերմունքը, 2017-2018թթ ԳԱՎԻ հիմնադրամի կողմից նվիրաբերած խմբաքանակի քչաթիվ կիրառումը, բժիշկների, իրավաբանների, հետաքննող լրագրողների և ծնողների կողմից բարձրաձայնվող խնդիրները, բազմաթիվ անհամապատասխանությունները նախարարի հրամանի և «Գարդասիլ-4» պատվաստանյութի ընդհանուր բնութագրի միջև, հարցի կարևորությունը և հանրային հնչեղությունը՝ առաջնորդվելով ՀՀ Սահմանադրության 88-րդ, 113-րդ հոդվածներով և «Ազգային ժողովի կանոնակարգ» ՀՀ սահմանադրական օրենքի 125-րդ հոդվածով, խնդրում ենք հրավիրել խորհրդարանական լսումներ` խնդիրը համակողմանի քննարկելու և լուծումներ տալու նպատակով։

Խնդրում ենք սույն գրության պատասխանն ուղարկել օրենքով սահմանված ժամկետներում»։