Ձեր վստահելի աղբյուրը

«Տնտեսական մրցակցության պետական պաշտպանության հանձնաժողովի ներկայիս գործունեությունը խնդրահարույց է, և կառավարությունը խնդիրները վերացնելու համար ԱԺ արտահերթ նիստի օրակարգ է ընդգրկել «Տնտեսական մրցակցության պաշտպանության մասին ՀՀ օրենքում լրացումներ և փոփոխություններ կատարելու մասին» օրենքի նախագիծը»,- այս մասին այսօր խորհրդարանի արթահերթ նիստում նշեց հիմնական զեկուցող Արդարադատության նախարար Արտակ Զեյնալյանը՝ «Տնտեսական մրցակցության պաշտպանության մասին» ՀՀ օրենքում լրացումներ և փոփոխություններ կատարելու մասին» ՀՀ օրենքում փոփոխություն կատարելու մասին  և «Հանրային ծառայությունները կարգավորող մարմնի մասին» ՀՀ օրենքում փոփոխություններ և լրացումներ կատարելու մասին» ՀՀ օրենքում փոփոխություն կատարելու մասին օրենքների նախագծերի փաթեթն առաջին ընթերցմամբ ընդունելու մասին հարցի քննարկման ժամանակ։

Զեյնալյանի խոքով՝ նույն օրենքի եզրափակիչ ու անցումային դրույթներում կա մի ձևակերպում, որի համաձայն, Հանձնաժողովի առաջին կազմը ձևավորվում է հետևյալ կերպ՝ հանրապետության նորընտիր նախագահի կողմից պաշտոնը ստանձնելու օրվանից հետո մեկ տարվա ընթացքում ԱԺ-ն վարչապետի առաջարկությամբ նշանակում է հանձնաժողովի նախագահ և վեց անդամներին. «Հանրապետության նախագահը իր պաշտոնը ստանձնել է 2018-ի ապրիլի 9-ին, հետևաբար այդ ժամկետը վրա է հասնում 2019-ի ապրիլի 9-ին ու այս դրույթը չի իրականացվել։ Հաշվի առնելով, որ ձևավորվել է Ազգային ժողով ու կառավարություն, գործադիր իշխանությունը հնարավորություն չի ունեցել ներկայացնել սրանք։ Գործադիր իշխանությունը այս իրավակարգավորման մեջ տեսել է խնդիրներ ու կան տարակարծություններ», - հայտարարեց Զեյնալյանը։

Նախարարն ասաց, որ փոփոխությամբ իրենք առաջարկում են ժամկետը երկարաձգել մինչև այս տարվա հունիսի 30-ը։

«Լուսավոր Հայաստան» խմբակցության պատգամավոր Մանե Թանդիլյանը Զեյնալյանից հետաքրքրվեց. «Ինչո՞ւ եք այն բերում արտահերթ, երբ ակնհայտ էր, որ ժամկետների մեջ չեք տեղավորվում»:

Նախարարը պատասխանեց. «Ձեզ մոտ դա տպավորություն է և չի համապատասխանում իրականությանը։  Երբ որ այն բացահայտվել է, երբ որ հնարավոր է եղել ներկայացնել ԱԺ-ին, այդ ժամանակ էլ ներկայացվում է»։

Այնուհետև Թանդիլյանն արձագանքեց. «Արդեն 4 ամիս է, ինչ նոր ԱԺ-ն ձևավորվել է, և այս քննարկումը արդեն տեղի է ունեցել։ Բերել արտահերթ նիստին նման կարգավորում, նշանակում է՝ ժամանակին չանդրադառնալ խնդրին։ Հույս եմ հայտնում, որ կառավարությունն այլևս նման բացթողումներ չի ունենա»: