Ձեր վստահելի աղբյուրը

Օրերս տեղեկություն տարածվեց, որ Բրիտանիայի միակ սեռափոխության կլինիկայի 5 աշխատակիցներ ազատվել են աշխատանքից՝ մտահոգություններով, որ 3 տարեկան փոքր երեխաների նկատմամբ իրականացվում են անհարկի գենդերային միջամտություններ։ Այս մասին գրել է The Times-ը։ Թեմային անդրադարձել են բրիտանական մի շարք առաջատար լրատվականներ՝ Daily Mail, The Sun։

Լոնդոնում ու Լիդսում տեղակայված Գենդերային ինքնության զարգացման ծառայության ազատված աշխատակիցները մտահոգված են, որ երեխաների մոտ սխալ ախտորոշվում է գենդերային դիսֆորիա, ընկճախտ։ Մտավախություններ կան, որ որոշ գեյ երեխաներ, որոնք սեռական ինքնության հետ խնդիրներ են ունենում, սխալ ախտորոշվում են որպես տրանսգենդեր։

The Times-ը խոսել է մասնագետների հետ, որոնք անհանգստացած են, որ երիտասարդներից ոմանց նկատմամբ ճնշումներ են գործադրվում՝ սեռափոխություն իրականացնելու՝ հոմոֆոբիկ ծաղրանքների ենթարկվելուց հետո։

Բոլոր 5 աշխատակիցները եղել են թիմի անդամ, որոնք որոշում են՝ արդյոք երեխաներին պետք է տալ հորմոնային դեղահաբեր՝ նրանց սեռական հասունացումը կանխելու համար: Նշվում է, որ այնուհետ 16 տարեկանում երեխաներին տրվում են խաչաձև սեռական հորմոններ՝ կախված, թե նրանք ցանկանում են զարգանալ որպես աղջիկ, թե տղա։

Առնվազն 18 աշխատակից ազատվել է աշխատանքից վերջին 3 տարիներին, նշելով, որ առանց բավարար ստուգումների երեխաների մոտ ախտորոշում է կատարվում։ Մասնագետներից մեկն անգամ ասել է, որ կլինիկայում շատերը մնում են միայն այն պատճառով, որ կանխեն ավելի շատ երեխաների նման բուժումը։

Պարզվում է, վերջին տարիներին կլինիկա այցելությունները շատացել են. 2010թ.-ին այն եղել է 94՝ նախորդ տարի հասնելով 2519-ի, որոնց մեջ ամենափոքրիկը եղել է 3 տարեկան։

«Վերջին 2 տարիներին այս աշխատանքում ինձ պահում էր զգացումը, որ հսկայական թվով երեխաներ վտանգի մեջ են։ Ես այնտեղ էի՝ պաշտպանելու երեխաներին վնասից»,-ասել է ազատված մասնագետներից մեկը։

Փորձագետները մտավախություն ունեն, որ երեխաների բուժումն իրականացվում է առանց ուսումնասիրելու սեռականության հետ կապված խնդիրների հիմքերը։

Օքսֆորդի համալսարանի Ապացուցողական բժշկության կենտրոնի պրոֆեսոր Կառլ Հենեգհանն ասել է, որ բուժումները «չկարգավորված կենսափորձեր են եղել երեխաների վրա», ախտորոշումներն էլ չեն ունեցել անգամ մեկ ապացույց։

Գենդերային ինքնության զարգացման ծառայությունը հերքել է այս պնդումներն ու ասել, որ իրականացվել են ուշադիր ախտորոշումներ։