Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում շարունակվում է «Սասնա ծռեր» խմբի 10 անդամների գործով հերթական դատական նիստը։  Այսօր հարցաքննվեց տուժող Էլեն Վարդանյանը։ Նա նշեց, որ  ապրում է ՊՊԾ գնդի անմիջապես դիմացի տանը, լուսադեմին ձայներից արթանցել են, տեսել են խառնաշփոթ իրավիճակ է, ոստիկանական մեքենաներ, «գռուզավիկ մեքենա» դարպասների մոտ։ Նա նշեց, որ տանը կային անչափահաս երեխաներ, շատ վախեցած էին, իրենց մոտ է անընդհատ գտնվել։

«Հաջորդ օրը ժամը 5-6-ին տարածքը լքել եմ, որովհետև երեխաները ուժեղ սթրեսի մեջ էին կրակոցների ձայնից»,- ասաց տուժողը։

Դատավորի հարցին, թե ինչո՞ւ եք տուժող ճանաչվել, նա ասաց. «Զանգել են ինչ, կանչել են,  ասել են, որ պատուհանը բաց է, տուն են մտել, պետք է տունը խուզարկվի։  Մտել են, նայել են, ոչինչ չեն գտել, ոչ մի բան չեն հայտնաբերել։ Մեզ թողել են ներս ենք մտել։  Երբ մենք ներս մտանք, ներսի պահարանը գետնին էր թափթփված, սառարանից բաներ էին բացակայում»։

Է. Վարդանյանն ասաց, որ  տանը չեն գտել  պլանշետն ու հեռախոս,  գումար չի բացակայել։ Մեղադրողի հարցին ի պատասխան նա նշեց, որ բողոք, պահանջ չունի։

Դատարանը Մեսրոպ Մակյանի նախագահությամբ բավարարեց մեղադրող Պետրոս Պետրոսյանի միջնորդությունը՝ դատարանում լսել ՊՊԾ գնդի գրավման օրերին սպանված ոստիկան Յուրի Տեփանոսյանի հոր՝ Վահրամ Տեփանոսյանի, հարցազրույցները լրագրողների հետ, որոնք հանձնվել էին ձայնասկավառակներով,  նրան ներգրավել որպես վկա ու կանչել հարցաքննության։ 

Նշենք, որ Վ. Տեփանոսյանն ասել էր, որ «Սասնա ծռերի» անդամներից չեն իր որդու սպանողը, այլ ոստիկանները։

Այսօր հարցաքննվեց նաև ՊՊԾ գնդի գրավման օրերին սպանված ոստիկան Յուրա Տեփանոսյանի քավորը` Տրգրան Գրիգորյանը: Նա մասնակցել է Հ. Տեփանոսյանի դիակի դատաբժշկական փորձաքննությանը։

«Մասնակցել եմ դիահերձմանը։ Գլուխը բացելուց հետո լեզվի մեջից հանել են պատրոնը»,- նշեց նա:

Նա նշեց, որ տեղեկություններ ունի, որ Տեփանոսյանին վերևից «խփել է սնայպերը»։ Մեղադրողի հարցին, թե որտեղի՞ց այդ տեղեկությունները, ասաց. «Այնտեղ խոսում էին։ Նստած ա եղել մեքենայի հետևի նստատեղի ձախ կողմում։ Իրենց ասելով, բացի նրանից,  մեքենայում ևս երեք հոգի եղել է»:

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։