Ձեր վստահելի աղբյուրը

«Միայն առաջին և գործող անվտանգության ռազմավարության ընդունման տարեթիվը ՝ 2007  թվական, ինքնին արդեն բան է ասում»,- «Հայաստանը վերանայում է ազգային անվտանգության ռազմավարությունը. ի՞նչը և ինչպե՞ս փոխել հիմնարար փաստաթղթում» թեմայով քննարկմանն ասաց Միջազգային և անվտանգության հարցերի հայկական ինստիտուտի ղեկավար, քաղաքագետ Ստյոպա Սաֆարյանը։

ՀՀ Անվտանգության խորհուրդը սկսել է աշխատել Հայաստանի ազգային անվտանգության ռազմավարության հայեցակարգի փոփոխությունների ուղղությամբ։

Ս. Սաֆարյանի խոսքով, եթե դիտարկեն, թե  2007 թվականից հետո այս տարածաշրջանում, դրանից դուրս, հարևանությամբ ինչ ֆորսմաժորներ, մարտահրավերներ, իրավիճակ է առաջացել, կարող են ասել, որ գործ ունեն իսպառ չգործող փաստաթղթի հետ։

«Գործող փաստաղթութը չի արտացոլում ժամանակակից մարտահրավերները։ Եթե այդ փաստաթղթից որևէ բան, որ կարող է ակտուալ լինել, լավագույն դեպքում ներքին անվտանգությանը և արժեքներին վերաբերող  հատվածը կարող է լինել»,- նշեց քաղաքագետը։

Քաղաքագետ, միջազգային հարաբերությունների փորձագետ Սուրեն Սարգսյանի խոսքով,  Հայաստանը նոր ռազմավարության անհրաժեշտություն ունի։

«Հեղափոխությունից մեկ տարի է անցել, չգիտեմ՝ Անվտանգության խորհուրդն ինչով է մեկ տարի զբաղվել, որ նոր է  սկսել անվտանգության ռազմավարությունը մշակել։ Հավանաբար, մի քանի ամիս էլ կմաշկվի, իշխանափոխությունից երկու տարի անց լավագույն դեպքում նոր կունենանք ռազմավարություն»,- ասաց նա։

Քաղաքագետը  կարևորեց Հայաստանի ռազմավարության թարմացումը, նշեց, որ դրանում ներկայացված մարտահրավերները չպետք է անձնական կարծիքով ձևավորված մարտահրավերներ լինեն։

«Ենթադրենք, Անվտանգության խորհրդի քարտուղարը  որոշի, որ Հայաստանի մեծագույն մարտահրավերը Ռուսաստանն է կամ Բակո  Սահակյանի նախագահության շարունակությունը, ինչպես ինքը բազմիցս ասել է։ Պետք է  լինեն լուրջ մասնագիտական քննարկումներ, լինեն առաջարկություններ, պետության առաջ ծառացած խնդիրներին կարողանան հստակ լուծում տալ, այլ ոչ թե լինի դեկլարատիվ բնույթի կամ անձնական մոտեցումներով պայմանավորված փաստաթուղթ»,- նշեց Սուրեն Սարգսյանը։

Քննարկմանը ներկա «Մոդուս Վիվենդի» վերլուծական կենտրոնի նախագահ Արա Պապյանը ընդգծեց, որ պետք է  մասնագիտական մոտեցում։

«Պետք է  տեսնենք, թե ինչպիսի նոր մարտահրավերներ  կան կամ հների դեպքում ինչպիսի խորացումներ կան, դրանց համարժեք դիմակայելու, չեզոքացնելու  հնարավորությունները պետք է նայել, մի փոքր էլ կանխատեսում անել՝ ունենալով տարբերակներ»,- նշեց նա։

Ա. Պապյանի կարծիքով,  մի փաստաթղթով հնարավոր չէ դա անել, պետք է լինի ռազմավարության բաց մաս, որի  մեջ հիմնական սկզբունքները շարադրված լինեն, փակ փաստաթուղթ ավելի կոնկրետ գործողությունների շարադրանքով՝ ըստ սցենարների,  որպեսզի դառնա գործող փաստաթուղթ։

«Կարևոր է, որ քննարկումներին ոչ միայն ներգրաված լինեն մասնագետներ, այլ իրենց կարծիքը հաշվի առնեն»,- ասաց Արա Պապյանը։