Դուք ձախողել եք, հարգելի գործընկերներ. Դավիթ Խաժակյանը՝ Երևանի քաղաքապետին
«Աղբահանության հարցում Դուք ձախողել եք, հարգելի գործընկերներ, դրա համար էլ կառավարությունը միջամտեց այդ գործին»,- այս մասին այսօր Երևանի ավագանու նիստում հայտարարեց «Լույս» խմբակցության ղեկավար Դավիթ Խաժակյանն՝ անդրադառնալով հրատապության ռեժիմով նիստի օրակարգ մտած աղբահանության հարցին:
Հիշեցնենք, որ այդ հարցին անդրադարձել էր նաև «Բարգավաճ Հայաստան» խմբակցության ղեկավար Միքայել Մանրիկյանը:
«Մեր խմբակցությունը կիսում է մեր գործընկերոջ դիտարկումը: Քննարկվեց մի բան, որ ինչպես Դուք եք ասում, ամբողջ աշխարհը գիտեր, բայց հրատապության ռեժիմով օրակարգ մտավ աղբահանության մասին հարցը: Հաճախ մեզ՝ ընդդիմադիր ներկայացուցիչներին, երբ առարկություններ ենք ներկայացնում, ասում են՝ չեք թողնում այս գործն այսպես անենք, չեք ուզում որ այդ հարցը լուծվի, խոչընդոտում եք։ Բնականաբար, կան հարցեր, որոնք ավելի մանրամասն քննարկվել են, բայց ես ուզում եմ 3 հասցե ասել. Արցախի 4-րդ նրբանցքի 8 և 10, Արզումանյան 10 և 17, Նազարբեկյան 48։ Այս հասցեների հետ կապված հարց է հնչել և մենք ակնկալել ենք Ձեր հետևողականությունը այս խնդիրների լուծման կապակցությամբ։ 6 ամիս անցել է, մենք ձեզնից լսում ենք միայն դիտարկումներ, որ շուտով կլինի, համաձայնությունը ձեռք ենք բերել, բայց այդ վթարային շենքերը շարունակում են նույն վիճակում մնալ»,- ասաց Դավիթ Խաժակյանը:
Նա նշեց, որ եթե վթարային շենքերչի բնակիչները համաձայն չեն քաղաքապետարանի առաջարկություններին, դա չի նշանակում, որ նրանց պետք է թողնել «փլատակների» տակ:
Դավիթ Խաժակյանի խոսքով՝ նախորդ իշխանությունների ժամանակ մարդիկ ասում էին, որ եթե կոռուպցիա չլինի, այդ իշխանությունները չլինեն, ապա ամեն ինչ իր տեղը կընկնի: Ըստ նրա՝ կոռուպցիան ծանրաքարշ արգելակ է քաղաքի զարգացման համար, սակայն վերջինիս հաղթահարումն անհրաժեշտ, բայց ոչ բավարար պայման է քաղաքի զարգացման համար։
«Այսօրվա խնդիրները բխում են նախորդ ընտրությունների տրամաբանությունից, քանի որ ընտրությունները վերածվեցին սևի ու սպիտակի, խորհրդարանն արձակելու մանդատի ընտրությունների, որի արդյունքում ձևավորվեց 57 հոգանոց խմբակցություն։ Հետագայում խորհրդարանն արձակվեց, ընտրվեց նոր խորհրդարան, իսկ քաղաքը մնաց այն քաղաքային իշխանության հույսին, որը ձևավորվեց որպես կողմնակի էֆեկտ խորհրդարանի արձակման գործընթացին», - ասաց «Լույս» խմբակցության ղեկավարը:
Ըստ նրա՝ նախընտրական շրջանի այդ հռետորաբանությունը վարչապետ Նիկոլ Փաշինյանի ընտրած բանաձևն էր, որը կյանքի կոչվեց սեպտեմբերի 23-ի ընտրություններին:
«Բայց ամեն ինչ իր գինն ունի։ Երբ փորձում ես ամեն ինչ ստանալ շատ և միանգամից, խնդիրներ են առաջանում։ Եվ այդ գինը մենք տեսանք օրեր առաջ կառավարության նիստում, երբ շուրջ 40 րոպե քննարկվում էր մի հարցը, որը բացառապես քաղաքային իշխանության տիրույթում է: 6 ամիս անց արձանագրում ենք, որ աղբահանության հարցում Դուք ձախողել եք, հարգելի գործընկերներ, դրա համար էլ կառավարությունը միջամտեց այդ գործին: Եթե 6 ամիս հետո միայն մեկնարկ ենք տալիս այդ հարցի լուծման, մենք խնդիր ունենք այդ տրամաբանության հետ»,- ընդգծեց Դավիթ Խաժակյանը:
«Լույս» խմբակցության ղեկավարը նշեց, որ քաղաքային իշխանությունները ձախողվել են նաև համայնքային տուրքերի դրույքաչափերի հավաքագրման հարցում:
«Մի շարք համայնքային տուրքերի դրույքաչափեր մի քանի ամիս առաջ բարձրացվեցին, որին մենք դեմ էինք: Դրանք բարձրացվեցին այն հիմնավորմամբ, որ պետք է մեծացվեն բյուջետային մուտքերը, որպեսզի նաև քաղաքի հնարավորությունները մեծանան: Տեղեկացնում եմ Ձեզ, որ քաղաքապետարանը թերհավաքագրել է համայնքի եկամուտներն առաջին եռամսյակի համար: Առավել ապշեցուցիչ է, որ առաջին եռամսյակում հավաքագրվել է շուրջ 50 մլն դրամ պակաս՝ նախորդ տարվա համեմատ»,- ընդգծեց նա՝ հավելելով, որ տուրքերը բարձրացնում են՝ ավելի շատ գումար հավաքելու ակնկալիքով, բայց վերջում պարզվում է, որ ավելի քիչ գումար է հավաքվել:
Ըստ նրա՝ եթե հավաքագրման տեմպերը այդպես շարունակվեն, ապա չեն կարողանալու բյուջեն պատշաճ կերպով կատարել:
Դավիթ Խաժակյանը նշեց նաև, որ իրական ցուցանիշները քողարկելու նպատակով Երևանի քաղաքապետը մարտի 29-ին կայացրել է որոշում՝ ակնկալվող դրամական մուտքը 145 մլն դրամով նվազեցնելու վերաբերյալ, որպեսզի վերջում ասեն, թե բյուջեն 100%-ով կատարվել է:
Նրա խոսքով՝ այս թերհավաքագրումը քաղաքի համար խնդիրներ է առաջացնելու, չեն լուծվելու մի շարք խնդիրներ:
Արձագանքելով Դավիթ Խաժակյանի ելույթին՝ քաղաքապետ Հայկ Մարությանը միայն ասաց. «Ես ձեզ հետ համաձայն չեմ, պարոն Խաժակյան, անցնենք առաջ»:
Հարակից հրապարակումներ`
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ