Ձեր վստահելի աղբյուրը

Աշխատանքի և սոցիալական հարցերի, Առողջապահության նախարարություններն ու  «Բարի մամա» հասարակական կազմակերպությունը այսօր իրենց համագործակցության սկիզբը դրեցին, որի միջոցով կփոձեն կանխարգելել առողջական խնդիրներ ունեցող երեխաների մուտքը մանկատուն և ապահովել նրանց ընտանիքում ապրելու իրավունքը։

Մինչև փոխըմբռնման եռակողմ հուշագրի ստորագրման արարողությունը՝ Աշխատանքի և սոցիալական հարցերի նախարար Զարուհի Բաթոյանը կարևորելով երեխայի՝ ընտանիքում ապրելու իրավունքը, հայտնեց, այսօր 600-ից ավելի երեխա ապրում է մանկատներում, որոնցից 450 առողջական խնդիրներ կամ հաշմանդամություն ունեն։

«Այս խնդիրը լուծելու համար, երեխայի ապրելու իրավունքը ապահովելու համար առաջին հերթին մենք վստահ ենք, որ պետք է սկսել կանխարգելման միջոցառումներից։ Այսինքն՝ նախ պետք է աջակցել ընտանիքներին, որպեսզի երեխաները չհայտնվեն մանկատանը, քանի որ այնտեղ հայտնվելուց հետո շատ ավելի դժվար է նրանց ընտանիք վերադարձնելը։ Այստեղ շատ կարևոր է համագործակցությունը, համակարգված աշխատանքը, քանի որ իսկապես բոլոր կառույցները և ինչպես նաև հասարակության մեծամասնությունը ցանկանում է, որ երեխան ապրի ընտանիքում և կարևորում է այս խնդիրը»,- ասաց Բաթոյանը։

Նախարարը նշեց նաև, որ կան լուրջ դժվարություններ ու բացեր, որոնք պետք է լուծել սերտ համագործակցության միջոցով։

Զարուհի Բաթոյանը նաև տեղեկացրեց, որ նախարարությունը նաև աստիճանաբար ավելացնելու է ընտանիքներին տրամաբրվող աջակցության ծավալները, ծառայությունների տեսակները, որպեսզի ընտանիքն իրեն միայնակ չզգա։

Արդեն հինգ տարի երեխաների մուտքը մանկատուն կանխարգելելու դժվարին գործը ստանձնած «Բարի մամա» ՀԿ նախագահ Մարինե Ադուլյանն ասաց. «Այս հուշագրի միջոցով, կարծես թե թղթին ենք հանձնում ոչ միայն այն երեխաների, որոնց մենք արդեն աջակցել ենք, այլ նաև նրանց, ովքեր կարող են և իրավունք ունեն մեծանալ ընտանիքում։ Այս հուշագրի միջոցով արդեն ավելի համակարգված կկատարենք բոլոր աշխատանքները»։

Հարցին, թե հիմնականում ինչ հիմնավորմամբ են ծնողները լքում երեխաներին՝ նա ասաց, որ երբ երեխան ծնվում է հաշմանդամությամբ, ծնողներն առաջին հերթին բախվում են այն խնդրին, որ իրենց չեն տալիս իրենց երազած երեխային. «Սրան էլ ավելանում են կողքից խորհուրդները, որ թողեք երեխային ձեզ ավելի լավ կլինի, մենտալիտետն ու սոցիալական խնդիրները,  ծնողները չեն կարողանում հաղթահարել այս փորձությունը և արդյունքում երեխան հայտնվում է հաստատությունում»։

Մարինե Ադուլյանը հավելեց, որ «Բարի մամա»-ի կամավորների շնորհիվ ծնողները ձեռք են բերում բարեկամ, որն իրենց կողքին է լինում ցանկացած պահի, ցանկացած օր ու ժամի։