Ձեր վստահելի աղբյուրը

2017 թվականի մայիսին Երևանի ավագանու ընտրություններին մասնակցող «Ելք» կուսակցությունների դաշինքի համամասնական ցուցակը գլխավորող Նիկոլ Փաշինյանը քարոզարշավի շրջանակում՝ ապրիլի 22-ին լրագրողների հետ զրույցում հայտարարեց, որ իր քաղաքապետ ընտրվելու պարագայում մինչև 2022 թվականը կբացվի առնվազն մետրոյի մեկ կայարան։ Խոստումն ընդգրկված էր նաև «Ելք»-ի նախընտրական ծրագրում։ 

2017-ին Փաշինյանը քաղաքապետ չընտրվեց, բայց ուղիղ մեկ տարի անց վարչապետ դարձավ։ 2018-ի աշնանը Փաշինյանի գլխավորած կուսակցության կողմից առաջադրված թեկնածուն՝ Հայկ Մարությանը ընտրվեց Երևանի քաղաքապետ։ Ենթադրեցինք, որ մետրոյի կայարանը հիշյալ հայտարարության տրամաբանությամբ պատրաստ կլինի 2023 թվականին։

Սակայն քաղաքապետարան ուղղված գրավոր հարցերի պատասխանները տխրեցրեցին։

«Պարոն Մարության, Դուք քաղաքապետ ընտրվեցիք 2018 թվականին, հինգ տարի անց հնարավոր համարո՞ւմ եք մետրոյի նոր կայարանի բացումը։ Այս պահին այդ ուղղությամբ ռեալ ի՞նչ քայլեր են իրականացվում»,-հարցն ուղղեցինք Երևանի քաղաքապետին։

Քաղաքապետարանից պատասխանեցին. «Քանի որ մետրոպոլիտենի Աջափնյակ կայարանի և կամրջի կառույցը պլանավորվում է իրականացնել առանց պետական բյուջեի ներդրման, քաղաքապետարանը մշակել է ծրագիր, որի շնորհիվ վերը նշված աշխատանքները կիրականացվեն  ներդրողների միջոցներով:

Վերջին 2 ամիսների ընթացքում իրականացվում են բանակցություններ կառուցապատողների հետ, որի նպատակն է վերջնականապես ընտրել այն կառուցապատողին, որը կձեռնարկի ծրագրի կատարումը՝ ամենանպաստավոր պայմաններով:

Զուգահեռաբար համալրվում  են նախագծային նյութեր և կատարվում են հետազոտություններ, նախագծային առաջադրանքի կազմման համար»։

Գրավոր պատասխանում նաև նշվում է, որ  2019 թվականի ընթացքում պլանավորվում է ավարտել նախագծային փաթեթի ողջ համալիրը, իսկ 2020 թվականին սկսել շինարարական աշխատանքները, ներառյալ կամրջի և մետրոպոլիտենի կայարանի շինարարության աշխատանքները:

«Ինժեներական ենթակառուցվածքի կառուցումը պլանավորվում է կատարել զուգահեռ շինարարական աշխատանքների հետ, որպեսզի շինարարական աշխատանքների ավարտին մետրոպոլիտենի նորակառույց կայարանը գործի սահմանված կարգով՝ ներգրավվելով ընդհանուր համակարգի մեջ»,-նշել էին քաղաքապետարանից։

Բանավոր հարցին, թե մոտավոր հաշվարկներով ե՞րբ  է նախատեսվում աշխատանքների ավարտը, քաղաքապետարանի հասարակայնության հետ կապերի վարչությունից ասացին, հստակ չէ, ամեն ինչ կախված է ներդրողների թվից, ներդրումների ծավալից, գումարների հոսքից ու այլ հարցերից։

Ասել կուզի, շատ ներդրողներ լինեն, շուտ կվերջացնեն, չլինեն՝ չեն էլ կառուցի։

Ի դեպ, քաղաքապետի թեկնածու Փաշինյանը կայարանի կառուցումը պատկերացնում էր ոչ թե ներդրողների, այլ վարկային ծրագրի միջոցներով՝ «Քաղաքային զարգացման վարկային ծրագրի» շրջանակում: 2017-ի մայիսի 5-ին ֆեյսբուքյան իր ուղիղ եթերում նա մասնավորապես հայտարարել էր.

«Նորագավիթ թաղամասը շրջանցող և դեպի Շիրակի փողոց ձգվող նոր ավտոճանապարհն առաջիկա տարիներին պետք է Շիրակի փողոցով հասնի Կարմիր բլուր և Կարմիր բլուրի վրա կառուցվի մոտ 200-250 մետր երկարությամբ կամուրջ, որը Կարմիր բլուրի հատվածը կմիացնի Մալաթիա-Սեբաստիա համայնքին: Այնուհետև նախատեսվում է այդ ճանապարհը շարունակել մինչև Աշտարակի խճուղի: Կարծում եմ, որ այդ կամրջի կառուցումը, ըստ էության, այս փուլում նպատակահարմար չէ, որովհետև այդ ճանապարհը կարող է գործել հետևյալ կերպ` գալ հասնել Շիրակի փողոց, այնտեղից դուրս գալ Արտաշեսյան փողոց, միանալ Երևանյան լճի պատնեշի վրա կառուցված կամուրջին, իսկ այնտեղից էլ Իսակովի պողոտայով միանալ փողոցին: Այսինքն, ստացվում է, որ արդեն գոյություն ունեցող կամրջից մեկ կիլոմետր ներքև ցանկանում են նոր կամուրջ կառուցել: Կարծում եմ, որ դա բացարձակապես նպատակահարմար չէ, հատկապես, երբ դրա կառուցումը նախատեսվում է Երևանի ամենահին վայրերից մեկի` Կարմիր բլուրի վրայով: Գտնում եմ, որ այդ կամուրջի միջոցները կարելի է ներդնել մետրոյի կայարանը շահագործման հանձնելու վրա»։

Հետաքրքիր է, մեկ տարի անց ի՞նչ փոխվեց։ Ի դեպ, Մալաթիա-Սեբաստիա վարչական շրջանում կամուրջների կառուցման ակտիվ աշխատանքները շարունակվում են։