Ձեր վստահելի աղբյուրը

«Տնտեսական փոփոխությունները, որ տեղի են ունենում  Հայաստանում և դեռ պետք է տեղի ունենան, մեզ համար բացարձակ առաջնահերթություն են»,- այս մասին այսօր Արարատում ընթացող «Իմ քայլը հանուն Արարատի մարզի» ներդրումային համաժողովին ասաց ՀՀ վարչապետ Նիկոլ Փաշինյանը:

Նրա խոսքով՝  տնտեսական փոփոխություների ամենակարևոր նախադրյալն այն փիլիսոփայությունն ու գաղափարախոսությունն է, որը դրված է դրանց  հիմքում:

Նիկոլ Փաշինյանը նշեց, որ այդ գաղափարն ու գաղափարախոսությունն անվանվում են «անհատական ջանք», «անհատի վերափոխում»:

«Շատ կարևոր է հասկանալ, որ սա ուղիղ շարունակությունն է այն քաղաքական փոփոխությունների, որ Հայաստանում տեղի ունեցավ: Հեղափոխությունից առաջ փիլիսոփայությունը հետևյալն էր՝ ի՞նչ կարող է անել ՀՀ  քաղաքացին: Այս հարցի պատասխանը բոլորիս հայտնի է. ՀՀ քաղաքացին, ըստ էության, ոչ մի բան չէր կարող անել կամ եթե կարող էր անել, շատ սահմանափակ,  այն էլ` որոշակի թույլտվությամբ, թողտվությամբ, հովանավորությամբ: Իսկ այդ համակարգում ովքե՞ր էին, որ կարող էին անել ինչ-որ բան: Նրանք էլիտայի ներկայացուցիչներն էին, համարյա կիսաաստվածներ, որոնք կարող էին որոշել մարդկային ճակատագրեր, որոշել ամեն ինչ, անել ամեն ինչ, սահմանափակված չէին ոչնչով: Նրանք, ըստ էության, կիսաաստվածային կարգավիճակ ունեին Հայաստանում»,- ասաց  վարչապետը:

Մինչդեռ, ըստ նրա, հեղափոխությունից հետո փոխվել է այդ հարցերի պատասխանը, թե ինչ կարող է անել ՀՀ քաղաքացին:

«Քաղաքացին կարող  է անել ամեն ինչ, նրա ոչ մի հնարավորություն սահմանափակված չէ՝ պայմանով, որ մենք խոսում ենք ստեղծարար փոփոխությունների, օրինական գործողությունների մասին, երբ օգտվում են սեփական ազատություններից, բայց հարգում են ուրիշների ազատությունը:  Հենց այդ փիլիսոփայական փոփոխությունն է, որ տեղի է ունեցել Հայաստանում, որ մեր երկիրն այսօր դարձրել է աշխարհի առաջատար ժողովրդավարական երկրներից մեկը: Այս փիլիսոփայական փոփոխությունը Հայաստանը հիմա դարձնում է և պիտի դարձնի աշխարհի առաջատար  տնտեսական երկրներից մեկը»,-ընդգծեց Նիկոլ Փաշինյանը:

Ըստ վարչապետի՝ այսօր Հայաստանում որևէ քաղաքացի որևէ օրինական գործունեությամբ սահմանափակված չէ: Խնդիրն, ըստ նրա, միայն կայանում է նրանում, որ նախկինից եկած շատ իներցիոն գործընթացներ խանգարում են մարդկանց: Մասնավորապես, մարդիկ երբեմն չեն ուզում հավատալ  իրենց տեսածին, լսածին, և շարունակում են երբեմն ունենալ համաձայնեցումների՝ «դաբրոների» կարիք. «Տնտեսական որևէ ներդրման ցանկություն ունեցող մարդկանց մեծ մասն ուզում է անձամբ հանդիպել և համաձայնեցնել  իր գործողությունները երկրի ղեկավարության հետ: Իհարկե, մենք պատրաստ ենք, դա մեր աշխատանքն է՝ քաջալերել, բոլոր մարդկանց լսել, բայց, այնուամենայնիվ, պետք է հասկանալ, որ օրն ունի 24 ժամ, շաբաթը` 7 օր: Այդ իներցիան մեզ այսօր խանգարում է»:

Նիկոլ Փաշինյանի խոսքով՝ կառավարության հիմնական խնդիրն այնպես անելն է, որ որևէ մեկը տնտեսական գործունեության համար չունենա կառավարության կարիքը:

«Կառավարության առաքելությունը հետևյալն է՝   մարդիկ ամենօրյա կյանքում հնարավորինս ավելի քիչ ունենան կառավարության կարիքը, հնարավորինս ավելի քիչ ունենան պետական մարմինների հետ շփվելու, նրանցից թույլտվություն ստանալու կարիքը: Կառավարության հիմնական խնդիրը ոչ թե մարդկանց ղեկավարելն է, այլ նրանց չխանգարելը,  կառավարության խնդիրը ոչ թե մարդկանց կամքը ձևավորելն է, այլ մարդկանց քաջալերելը, նրանց ստեղծարար ընդունակություններն ու հմտությունները զարգացնելը»,- ընդգծեց Նիկոլ Փաշինյանը: