Ձեր վստահելի աղբյուրը

Թուրքագետ Հակոբ Չաքրյանն անսպասելի է համարում Թուրքիայի Կենտրոնական ընտրական հանձնաժողովի՝ Ստամբուլի ընտրությունները չեղարկելու վերաբերյալ որոշումը։ 

«Նորընտիր քաղաքապետն արդեն նույնիսկ հացի գներն էր իջեցրել։ Բայց այստեղ Էրդողանի համար մի վտանգավոր բան կա, եթե նոր ընտրություններում կրկին Ժողովրդահանրապետական կուսակցության թեկնածուն հաղթի, ապա Էրդողանն ավելի ծանր վիճակում կհայտնի, քան հիմա է»,-Panorama.am-ի հետ զրույցում ասաց Չաքրյանը։

Նա հիշեցնում է, որ մինչ ընտրությունները Թուրքիայի նախագահ Ռեջեփ Թայիփ Էրդողանը հայտարարել էր. «Եթե մենք կորցնենք Ստամբուլը, նշանակում է կորցնելու ենք ամբողջ Թուրքիան, եթե սայթաքենք Ստամբուլում, ապա կխորտակվի ամբողջ Թուրքիան»։

Թուրքագետի խոսքով, Էրդողանը միանձնյա տիրակալ է դարձել, ինչ-որ ասում է, անում է, կուսակցությունն էլ նրան ենթարկվում է, քանի որ ոչ հարազատ կուսակցությունում, ոչ էլ ընդդիմադիր կուսակցություններում խարիզմատիկ այլ գործիչներ չկան։

«Էրդողանին հետաքրքրում է Ստամբուլը, որը համարվում է Թուրքիայի մշակույթի, ֆինանսական կենտրոնը, ունի մոտ 16 մլն բնակչություն, քաղաքապետը նախարարից ազդեցիկ է։ Եթե ընտրված քաղաքապետը նորմալ աշխատեր, ապա իր կուսակցության համար կապահովվեր միլիոնավոր ձայներ հաջորդ ընտրություններում»,-Էրդողանի վախերն այսպես մեկնաբանեց Չաքրյանը։

Նկատենք, որ Թուրքիայի ԿԸՀ այս որոշումը խիստ քննադատության է արժանացել ինչպես Թուրքիայում, այնպես էլ դրա սահմաններից դուրս։ Ստամբուլում նոր ընտրություններ անցկացնելու որոշմանը դեմ են արտահայտվել նաև Թուրքիայի նախկին նախագահ Աբդուլահ Գյուլը, նախկին ԱԳ նախարար Դավութօղլուն, եվրոպական կառույցների ու երկրների տարբեր պաշտոնյաներ, նրանք պնդում են, որ ԿԸՀ-ն մինչ այս պահը դեռ չի նշել որևէ համոզիչ փաստարկ, թե ինչու է անհրաժեշտ կազմակերպել նոր ընտրություններ։

«Ստամբուլի ընտրությունները չեղյալ հայտարարվեցին: Ժողովրդավարության դագաղին մի մեծ մեխ ևս խփվեց»,-այսպես էր որոշմանն արձագանքել Թուրքիայի մեջլիսի ազգությամբ հայ պատգամավոր Գարո Փայլանը։

Քննադատողների մեծ մասն ընդգծում են,  Թուրքիայում ընտրությունները պետք է նորից անցկացվեն միայն այն պատճառով, որ իշխող կուսակցությունն այդ ընտրություններում պարտվել է։
Թուրքական մամուլի արձագանքներին Չաքրյանը հետևել է, սակայն հիասթափվել։

«Էրդողանը մամո՞ւլ է թողել։ Բոլորը վախեցած են, Էրդողանին են գովում։ Օրը երկու տեղ ելույթ է ունենում մի քանի ժամ տևողությամբ։ Երեկ էլ միացրել եմ լուրերը նայեմ, ընդհատեցին, Էրդողանի ելույթը դրեցին։ Վախեցած են, նաև այդ պատճառով է, որ բողոքի ակցիաներ չկան»,-ասաց թուրքագետը։

Մարտի 31-ին Թուրքիայում կայացած ՏԻՄ ընտրություններում երկրի խոշոր քաղաքներում, այդ թվում՝ Ստամբուլում հաղթել էր ընդդիմադիր «Ժողովրդահանրապետական» կուսակցությունը (ԺՀԿ-CHP)։

Ստամբուլում ընդդիմադիր «Ժողովրդահանրապետական կուսակցության» (CHP-ԺՀԿ) թեկնածու Էքրեմ Իմամօղլուն ստացել է 4.159.650 ձայն, իսկ «Արդարություն և զարգացում կուսակցության» (AKP-ԱԶԿ) թեկնածու Բինալի Յըլդըրըմը` 4.131.751 ձայն:

Ստամբուլում պարտված իշխող «Արդարություն և զարգացում կուսակցությունը» (AKP-ԱԶԿ) քաղաքի տարբեր շրջանների արդյունքները բողոքարկելուց հետո ԿԸՀ էր ներկայացրել քաղաքապետի ընտրությունը չեղարկելու և նոր ընտրություն անցկացվելու պահանջով դիմումը: Դրանից օրեր անց ԿԸՀ-ը որոշում կայացրեց չեղարկել ընտրությունները՝ չեղյալ հայտարարելով 16.000 ձայնի առավելությամբ քաղաքապետ ընտրված ընդդիմադիր ԺՀԿ-ի թեկնածու Էքրեմ Իմամօղլուի մանդատը:

Թուրքիայի խոշորագույն քաղաքի քաղաքապետի նոր ընտրությունների օր է նշանակվել հունիսի 23-ը: