Ձեր վստահելի աղբյուրը

«Մալայանի անվան ակնաբուժական կենտրոն»-ում դեղի ներարկման հետևանքով տեսողությունը կորցրած ութ հիվանդները լավ են, նրանցից վեցը վիրահատվել են, երկուսը դեղորայքային բուժում են ստանում։ Panorama.am-ին հայտնեց աչքի կլինիկայի տնօրեն  Ալեքսանդր Մալայանը։

Հիշեցնենք, երեկ լուր տարածվեց, որ «Նատալի ֆարմ»   ընկերության ներկրած  Avastin դեղամիջոց է ներարկվել հիվանդներին, ինչի հետևանքով նրանց տեսողությունը կտրուկ վատացել է։ Նախարարությունը պարզաբանեց, որ պացիենտների մոտ ախտորոշվել է հետսրսկումային ինֆեկցիոն ախտահարում։

«Նրանք բացարձակ տեսողություն չունեին, որովհետև բոլորն էլ դիաբետով տառապող հիվանդներ էին՝ հիվանդության բոլոր դրսևորումները, հատկապես ցանցաթաղանթի խնդիրներն առկա էին։ Դրանց կապակցությամբ սրսկումներ են ստացել ընդունված ձևով և կարգով։ Մենք չենք կարող խոսել տեսողության ամբողջական վերականգնման մասին։ Եթե վերականգնվի գոնե իրենց ունեցած տեսողությունը, մենք դա կհամարենք հարյուր տոկոսանոց արդյունք»,-ասաց կենտրոնի տնօրենը։

Ա. Մալայանից Panorama.am-ը հետաքրքվեց, այս պահի դրությամբ ի՞նչ է պարզվել։

«Թե ինչ է պատահել, ճիշտն ասած բավականին երկար պատմություն է, երկու բառով ինֆեկցված սրսկումներից հետո ինֆեկցված աչքեր։ Հիմա թե մեր կենտրոնի, թե նախարարության կողմից պարզաբանվում է, խնդիրը  դեղի՞, թե ներարկման հետ է կապված եղել»,-ասաց Մալայանը։

Հայտնի ակնաբույժի խոսքով,  դեղամիջոցի, դրա առաջացրած խնդիրների վերաբերյալ արտասահմանցի, տեղացի գործընկերներից որևէ  բողոք կամ մտահոգիչ տեղեկություն չեն ստացել։ Դեղամիջոցը հանձնվել է լաբորատոր փորձաքննության, որի արդյունքները պարզ կլինեն այսօրվա ընթացքում։

Ուշագրավ է, դեղամիջոցը ներկրած  «Նատալի ֆարմ» ընկերության հայտարարությունը, ըստ որի դեղամիջոցը նախատեսված չէ ներակնային ներարկման համար, ընկերությունն էլ պատասխանատվություն չի կրում պատահածի համար։

«Մենք տեղեկացանք, որ խոսքը Շվեյցարական Ռոշ ընկերության Avastin դեղամիջոցի մասին է, որը կիրառվել է ներակնային ներարկման եղանակով։

Նախ պետք է փաստենք, որ տվյալ դեղամիջոցը ըստ ՀՀ-ում գրանցված կիրառման ցուցումների՝ նախատեսված չէ ներակնային ներարկման համար և, եթե բժիշկը ստանձնում է դրա ներարկումը, ապա ինքն է ամբողջությամբ կրում բոլոր բարդությունների և կողմնակի ազդեցությունների պատասխանատվությունը։

Երկրորդ, պետք է նշել, որ դեղի մեկ սրվակի պարունակությունը կարող է կիրառվել մի քանի հիվանդի համար, սակայն, դեղը պետք է կիրառել անմիջապես սրվակը բացելուց հետո և դեն նետել։ Եթե պրոցեդուրան չի արվել նույն պահին, այլ դեղը կիրառվել է մի քանի օրվա ընթացքում, ապա, այո, բաց սրվակի մեջ կարող էր ինֆեկցիա փոխանցվել։

Նշված հետազոտությունը, հավանաբար, արվել է հենց տվյալ բաց սրվակից, սակայն, փակ սրվակն ուսումնասիրելու պարագայում եթե կրկին հաստատվի վարակի առկայությունը, ինչը քիչ հավանական է՝ հաշվի առնելով դեղն արտադրող ընկերության բարձր վարկանիշն ու փորձը, ապա անհրաժեշտ կլինի խնդիրը ներկայացնել ոչ թե «Նատալի ֆարմ» ընկերությանը, այլ անմիջապես դեղն արտադրողին՝ Շվեյցարական «Ռոշ» ընկերությանը։

Ցանկացած դեպքում «Նատալի ֆարմ» ընկերությունը ոչ մի պատասխանատվություն չի կրում, քանի որ այն հանդիսանում է զուտ ներկրող ընկերություն։

Ցավում ենք հիվանդներին հասցված առողջական վնասի համար և մաղթում ենք շուտափույթ ապաքինում»,-ասված է ընկերության հայտարարության մեջ։