Ձեր վստահելի աղբյուրը

Կարևորելով վերականգնվող էներգիայի զարգացման միտումները Հայաստանում, Ամերիաբանկն այսօր հրավիրել էր արևային լիզինգի թեմայով կոնֆերանս՝ իր կորպորատիվ հաճախորդների և պոտենցիալ հաճախորդների համար։

Միջոցառմանը մասնակցում էին Ամերիաբանկի Կորպորատիվ և ներդրումային բանկինգի գծով տնօրեն Գագիկ Սահակյանը, Վերակառուցման և զարգացման եվրոպական բանկի  (EBRD) Հայաստանում կանաչ տնտեսության ֆինանսավորման ծրագրի (GEFF) խորհրդատու կառույցի ներկայացուցիչները, Համաշխարհային բանկի էներգետիկայի մասնագետը, մատակարար ընկերություններ և պետության ներկայացուցիչները։

Ամերիաբանկի գլխավոր տնօրեն Արտակ Հանեսյանն իր ողջույնի խոսքում ասաց.
«Այսօրվա մեր հանդիպման նպատակն է ձեզ հետ  կիսվելու արևային էներգետիկայի ոլորտում կատարվող զարզագացումներով, ներկայացնել այդ ուղղության առավելությունները, նոր տենդենցները։ Այդ նպատակով մեր կողմից հրավիրվել են համապատասխան ոլորտի մասնագետների՝ մեզ հետ համագործակցող տարբեր գործընկեր կազմակերպություններից, այդ թվում Եվրոպական զարգացման բանկից, GEFF-ից, Համաշխարհային բանկից, ոլորտը կարգավորող և վերահսկող կառավարության գործընկերների, ինչպես նաև արևային էներգիայի գործունեության ոլորտում մատակարար կազմակերպություններ։ 

Բիզնեսի ներկայացուցիչները  հնարավորություն կունենան ծանոթանալու արևային էներգիայի օգտագործման առավելություններին, արևային էլէկտրակայանների առանձնահատկություններին, ֆինանսավորման արդյունավետ սխեմաներին, առկա փորձին  և  տեղում ստանալ ամբողջական խորհրդատվություն արևային էներգիայի օգտագորման ողջ գործընթացի վերաբերյալ»։

Ամերիաբանկի գլխավոր տնօրենը հայտնեց, որ այսօրվա միջոցառմանը ներկայացվելու են նաև բանկի գործընկերների կողմից այն ֆինանսական գործիքները, որոնք որ իրենք օգտագործում են այս ոլորտում հետաքրքրություն ունեցող անհատ ձեռներեցներին և կազմակերպություններին արևային լիզինգի միջոցով ֆինանսավորելու համար։  Այս ծրագիրը  մեկնարկել է մոտ վեց ամիս առաջ։

«Ծրագրի ներքո արդեն իսկ ավելի քան 30 կազմակերպությունների տրամադրվել է ֆինանսավորում։ Իսկ այս պահին ընդհանուր մոտ 3 միլիարդ դրամի պորտֆել ունենք»,- հավելեց Արտակ Հանեսյանը։

Ամերաբանկի կորպորատիվ և ներդրումային բանկինգի գծով տնօրեն Գագիկ Սահակյանն էլ լրագրողների հետ զրույցում տեղեկացրեց, որ Ամերիաբանկի կողմից առաջարկվող արևային լիզինգը ընձեռում է հետևյալ հնարավորությունները՝ GEFF-ի հետ ունեցած համագործակցության շրջանակներում լիզինգի մայր գումարի 20 տոկոսի փոխանցում (CASHBACK) հաճախորդի հաշվին և ստացված միջոցների տնօրինում հաճախորդի հայեցողությամբ, ֆինանսավորում առանց գրավի, համագործակցության լայն շրջանակ շուկայի լավագույն մատակարարների հետ, լիզինգին զուգահեռ այլ ֆինանսական գորխիքների օգտագործում, ինչպես նաև սերտ համագործակցություն միջազգային ֆոնդերի հետ։

«Այսօր փորձում ենք մի հարթակ ձևավորել, որտեղ կհանդիպեն արևային էներգիայի սարքավորումներ մատակարարող ընկերությունները, ֆինանսավորող կազմակերպությունները, պոտենցիալ և առկա ներդրողները»,- նշեց Սահակյանը։

Նշենք, որ այսօր կլինեն նաև պանելային  քննարկումներ, որին կմասնակցեն ՀՀ էներգետիկ ենթակառուցվածքների և բնական պաշարների փոխնախարար Հակոբ Վարդանյանը, Համաշխարյաին բանկի էներգետիկայի մասնագետ Էմիլ Զալինյանը, GEFF-ի տեխնիական խորհրդատու Վարդան Խաչատրյանը, Ամերիաբանկի Լիզինգային գործառնությունների բաժնի ղեկավար Զարուհի Բոստանջյանը։