Փոխվարչապետը՝ իշխանությունում ձևավորված թևերի, պետական կառավարման համակարգում սպասվող կրճատումների մասին
Փոխվարչապետ Տիգրան Ավինյանը հերքում է այն տեղեկությունները, թե գործադիր իշխանությունում թևեր են ձևավորվել։
«Չգիտեմ՝ ինչ թևերի մասին է խոսքը։ Ինձ թվում է՝ դա նորմալ պրակտիկա է, երբ մամուլը նմանատիպ լուրեր է տարածում: Եվ մեկ-մեկ ինձ թվում է, որ այդ լուրերը շատ ավելի հետաքրքիր են և թրենդային սերիալներից ավելի մեծ ինտրիգներ են պարունակում»,- կառավարության նիստից հետո լրագրողների հետ զրույցում ասաց փոխվարչապետը:
Նրա կարծիքով՝ կառավարությունը որպես մեկ թիմ է գործում. «Լինում են հարցեր, որոնց հետ մի խումբ մարդիկ են համակարծիք լինում, այլ հարցերի շուրջ այլ մարդիկ են համակարծիք լինելում, բայց որ ասեմ՝ հստակ խմբավորումներ կան կառավարության ներսում, ես համենայնդեպս այդպիսի բան չեմ նկատել»:
Փոխվարչապետն անդրադարձավ նաև պետական կառավարման համակարգում սպասվող կրճատումներին: Նա նշեց, որ նախարարությունների կրճատումը ընդհանուր քաղծառայության համակարգի բարեփոխումների առաջին նախնական փուլն է:
«Քաղծառայության ռեֆորմն իրենից ենթադրելու է մի քանի փուլ: Առաջին հերթին մենք որդեգրելու են ընդհանուր ռազմավարություն՝ քաղծառայության համակարգի զարգացման, օպտիմալացման ու արդյունավետության բարձրացման համար»,- ասաց նա:
Հարցին, թե նախարարությունների միաձուլումից հետո գերնախարարություններում քանի փոխանախարար կլինի, Տիգրան Ավինյանը դժվարացավ պատասխանել: Նրա խոսքով՝ գործառույթներից ելնելով է պայմանավորված լինելու: Մասնավորապես, գնահատելու են, թե ինչ ֆունկցիաներ են նախկինում եղել փոխնախարարների վրա, թերբեռնված կամ գերբեռնված են եղել, թե՞ ոչ, ըստ այդմ էլ քանակները կհստակեցվեն:
Ինչ վերաբերում է կրճատումներին, փոխվարչապետն ասաց, որ դեռևս զանգվածային կրճատումներ չկան և չեն պլանավորվում: Նա միաժամանակ նշեց, որ առաջին հերթին կրճատվելու են նախարարներ, փոխնախարարներ:
Տիգրան Ավինյանը նաև ասաց, որ «Աշխատիր Հայաստան» ծրագրի շրջանակներում որոշ միջոցառումներ կնախաձեռնեն այն քաղծառայողների համար, որոնք դուրս կմնան քաղծառայության համակարգից. «Բոլոր վերլուծությունները ցույց են տալիս՝ պետական ծառայության համակարգը արդյունավետ չի գործում և այն վերանայումների կարիք ունի»:
Հարակից հրապարակումներ`
- «Ժողովուրդ». Օպտիմալացումների հետևանքով քանի՞ մարդ է կրճատվելու, որքա՞ն գումար է տնտեսվելու
- Հաշվարկ չկա, թե օպտիմալացման արդյունքում որքան գումար կտնտեսվի. Զեյնալյան
- Խնդիր չկա, եթե կրճատում են, թող մարդկանց աշխատանքով ապահովեն. Գագիկ Ծաուկյան
- Նախարարությունների միավորման հետևանքով հնարավոր է 150-200 մարդ կրճատվի
Լրահոս
Տեսանյութեր
Փաշինյանի կնոջը «Նիկոլ ցեղասպան» վանկարկումով դիմավորեցին Ծիծեռնակաբերդի հուշահամալիրում