Ձեր վստահելի աղբյուրը

Չինաստանի դերն այսօր աշխարհում բացառիկ է, դարձել է գլոբալ գերտերություն, գլոբալ տնտեսական նախագծեր իրականացնող  պետություն, Հայաստանն այս առումով պետք է փորձի ամեն ինչ անի, որպեսզի ներգրավածություն  ունենա Չինաստանի այս կամ այն նախագծերում։ Լրագրողների հետ հանդիպմանն ասաց միջազգայնագետ Սուրեն Սարգսյանը։

«Չափազանց բարդ է՝  հաշվի առնելով մեր աշխարհագրությունը, հարաբերությունները հարևանների հետ, բայց պետք է հնարավորինս  օգտվենք այս ամենից, կարողանանք Չինաստանի հետ կառուցել տնտեսական այնպիսի հարաբերություններ, ինչպիսն են մեր քաղաքական հարաբերությունները, որոնք մշտապես գտնվել են բարձր մակարդակի վրա»,- նշեց բանախոսը։

Ս. Սարգսյանն ասաց, որ  Հայաստանի երեք նախագաներն էլ պաշտոնական այցով եղել են Չինաստանում, Հայաստանի և Չինաստանի քաղաքական օրակարգերում չկան այնպիսի հարցեր, որոնք հակասում են։ Նա նշեց, որ Չինաստանը շատ հավասարակշռված դիրքորոշում ունի Արցախի խնդրի վերաբերյալ։

Միջազգայնագետն ասաց, որ եթե հետևողական աշխատանք տարվի, հնարավոր է  հայ-չինական հարաբերությունների տնտեսական բաղադրիչը խորանա և զարգանա։

«Իհարկե  Չինաստանի հետ բավականին ակտիվ առևտուր կա, բայց, կարծում եմ, դեռ շատ մեծ պոտենցիալ կա բիզնես ծրագրերի, նախագծերի տեսանկյունից»,- ասաց նա։

Ս. Սարգսյանն ընդգծեց, որ Չինաստանը Հայաստանի արտաքին քաղաքականության կարևորագույն առաջնահերթություններից պետք է հռչակվի։ Նրա խոսքով, Չինաստանը Հայաստանում կառուցում է  ամենախոշոր դեսպանություններից մեկը, ինչը նշանակում է, որ ունենալու է մեծ աշխատակազմ, ակտիվ աշխատող դիվանագիտական  ներկայացուցչություն,  այսինքն՝ որոշակի հետաքրքրություն ունի։

«Չինաստանը ապագան է, Չինաստանի հետ  հարաբերությունները նաև մեր երկրի տնտեսական հաջողության գրավականն են ու ապագան»,- ընդգծեց Ս. Սարգսյանը։

Միջազգայնագետը նշեց, որ պետք է ամերիկյան ուղղությամբ նույնպես շարունակական աշխատանքներ տանել, որովհետև բարձր մակարդակի հանդիպումներ ընդհանրապես  չկան, մինչդեռ Ադրբեջանի պաշտպանության նախարարն ու ԱԳ նախարարը համատեղ հանդիպել են ԱՄՆ պետքարտուղարին։

Հարցին, թե ԱՄՆ-ում ինչպե՞ս են վերաբերում ՀՀ վարչապետ Նիկոլ Փաշինյանի ռուսական լրատվամիջոցին տված հարցազրույցի ժամանակ արած հայտարարությանը, որ բազմիցս քննադատել է Ամերիկային, Ս. Սարգսյանն ասաց, որ նոր է վերադարձել Վաշինգտոնից, որտեղ պետական, գիտական կենտրոններում, մեդիայի հետ հանդիպումներ է ունեցել, բացասաբար է ընդունվել այն, չեն հասկացել, թե ինչ է ցանկացել ասել վարչապետը։

«ԱՄՆ-ն համարում է, որ իրենք վերջին ժամանակահատվածում ակտիվ օգնել են։ Այս ամենը հաշվի առնելով՝ ԱՄՆ-ում չեն հասկանում այդ հայտարարության իմաստը։ Կարծում եմ, որ այդ հայտարարության նպատակն այն էր, որպեսզի ուշադրություն հրավիրվի, որ մենք ավելի մեծ աջակցություն էինք ակնկալում,  ԱՄՆ որպես ժողովրդավարության աջակցող պետություն ավելի մեծ ֆինանսական միջոցներ տրամադրեր Հայաստանին»,- ասաց բանախոսը։

Անդրադառնալով նախօրեին իր ֆեյսբուքյան գրառմանը, որ՝ «երեկ տեղեկություն տարածվեց այն մասին, որ ԱԽՔ Արմեն Գրիգորյանը մեկնելու է ԱՄՆ, հանդիպումներ է ունենալու մի շարք պաշտոնյաների՝ այդ թվում ЦРУ-ի և ФБР-ի ղեկավարների հետ։... Հերքում չեղավ։ Հպարտանում և պարծենում եմ մեր ԱԽՔ-ով։ Նա կլինի նախագահ Տեր-Պետրոսյանից հետո առաջին հայ բարձրաստիճան պաշտոնյան, ով կհանդիպի ЦРУ-ի ղեկավարի հետ՝ 1994 թվականից ի վեր։ Անհամբեր սպասում եմ հանդիպմանը», Ս. Սարգսյանն ասաց. «Իրականում մամուլում տեղեկատվություն տարածեցին, որ նման հանդիպում է նախատեսվում։ Պարոն Գրիգորյանը չհերքեց այդ հանդիպման հնարավորությունը։ Բայց այդպիսի հանդիպում չի լինելու։ Նման հանդիպում չի կարող լինել մի շարք պատճառներով»։