Ձեր վստահելի աղբյուրը

Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովում այսօր քննարկվում է կառավարության կողմից ներկայացված «Փաստաբանության մասին» ՀՀ օրենքում փոփոխություններ և լրացումներ կատարելու մասին օրենքի նախագիծը։

Հիմնական զեկուցող ՀՀ արդարադատության նախարարի առաջին տեղակալ Արտակ Ասատրյանը նշեց, որ նպատակ է դրվել որոշակիացնել, հստակեցնել փաստաբանության ինստիտուտի, դրա առանձին ստորաբաժանումների, կառույցների կարգավիճակը։ Մասնավորապես առաջարկվում է նաև արտոնագրի կասեցման հիմքերի հետ կապված հարաբերությունները և կարգավորումները։

«Անցումային դրույթներով հնարավորություն ենք տալիս նախկինում կասեցված այն փաստաբանների արտոնագրերը, որոնք ժամկետը հինգ տարուց ավելի կասեցված է եղել, սույն օրենքի ընդունումից հետո վեց ամսվա ընթացքում դիմում ներկայացնել և վերականգնել իրենց արտոնագրի գործողությունը»,- ասաց փոխնախարարը։

Նա նշեց, որ նախկինում վեց ամսվա փոխարեն եղել է երեք ամիս. «Նման փոփոխություն առաջարկում ենք, քանի որ ինչ-ինչ պատճառներով կարող է երեք ամսվա մեջ չհասցնել»։
Նախագիծը հանձնաժողովում դրական եզրակացություն ստացավ և մտավ լիագումար նիստների օրակարգ։

Այնուհետև լրագրողների հետ զրույցում Փաստաբանների պալատի նախագահ Արա Զոհրաբյանն ասաց. «Նախագծով նաև առաջարկվում է, որ բացի հանրային պաշտպաններից, որոնք ստանում են ամսական աշխատավարձ և ծանրաբեռնված են, ստեղծվում է նոր հարթակ, որի համաձայն հանրային պաշտպան չհանդիսացող փաստաբանները, ովքեր կցանկանան նվազագույն գներով ծառայություններ մատուցել անվճարունակ անձանց, կներառվեն այդ ցանկի մեջ։ Նրանց վճարելու համար պետական ֆոնդ է լինելու, որը գոյանալու է օրենքով նախատեսված որոշակի աղբյուրներից։ Այսինքն, եթե անվճարունակ անձը գալիս դիմում է հանրային պաշտպանի գրասենյակ և եթե գրասենյակը ծանրաբեռնված է և չի հասցնում սպասարկել իրեն, ապա արդեն սպասարկում է այդ ֆոնդի միջոցով»։

Նա նաև հավելեց, որ իրենք ունեն զտման մեղանիզմներ, որոնց միջոցով փորձելու են անճարունակ ներկայացող վճարունակ քաղաքացիներին բացահայտել և ծառայությունները դադարեցնել և փոխհատուցում պահանջել։

Ինչ վերաբերում է վարչապետի կոչից հետո Փաստաբանների պալատի կողմից արված զսպվածության կոչին և հարցին, թե արդյո՞ք դրանից հետո կառավարությունից զանգեր չեն եղել, Զոհրաբյանն ասաց. «Մեզ մոտ շատ հաճախ մոդայիկ է դարձել, ասում են՝ ինչու այն ժամանակ այդպես չէիք ասում, ումեմն ասեմ, որ ՓՊ խորհուրդը այս տիպի հրատապ նաև այնցկացրել է 2018 թվականի ապրիլի 23-ին, երբ Նիկոլ Փաշինյանը ձերբակալվել էր և նրա տեղը հայտնի չէր։ Մինչև Սերժ Սարգսյանի հրաժարականը պալատի խորհուրդը հրատապ նիստ անցկացրեց, դատապարտեց պետական մարմինների այն գործելակերպը, որով Նիկոլ Փաշինյանի տեղը ծածուկ էին պահում և թույլ չէին տալիս իր փաստաբանի հետ կոնտակտի մեջ մտնի։ Նույնը հիմա՝ մենք տեսանք ահազանգ, խնդիր դատական իշխանության անկախության նկատմամբ։ Փաստաբանների պալատը անկախ է, մեր նկատմամբ որը մեկը չի կարող ճնշում չի կարող գործադրել»։