Քաղաքապետարան. Խնդիրները հաշվառված են, սակայն ֆինանսական միջոցներ չկան
Երևանի ծայրամասերում ապրող բնակիչների խնդիրներին Panorama.am-ը հետևողական անդրադառնում է։ 2012-ին հրապարակված «Երևանի ծայրամասեր. Մութ, փոշոտ փողոցներ, աղաղակող վերելակներ» վերնագրով նյութից հետո էլ խնդիրները չեն պակասել։ Մալաթիա-Սեբաստիա վարչական շրջանի կազմում գտնվող Հաղթանակ թաղամասի բնակիչներն ահազանգում են՝ փողոցները սարսափելի վիճակում են, կոյուղատար համակարգ չկա։
Հաշվի առնելով քաղաքապետարանի պաշտոնյաների՝ Երևանի բյուջեն մի քանի մլրդ դրամով ավելանալու մասին հայտարարությունները, փորձեցինք ճշտել, հնարավո՞ր է, թաղամասում բարձրացված հարցերը լուծվեն։ Պարզվեց՝ ոչ։
Panorama.am-ը հարցերն ուղղել է Երևանի քաղաքապետ Հայկ Մարությանին։
Հարց- Մալաթիա-Սեբաստիա վարչական շրջանում գտնվող Հաղթանակ թաղամասի վերջին փողոցները՝ 11-րդ, 13-րդ և այլն, ասֆալտապատված չեն։ 2019-ի բյուջեով դրանց ասֆալատապատման աշխատանքներ նախատեսվա՞ծ են։ Եթե ոչ, ինչո՞ւ, դրանցից ավելի վատ վիճակում գտնվող փողոցներ կա՞ն Երևանում։
Պատասխան-Երևանի քաղաքապետարանի 2019թ. գրունտային ճանապարհների հիմնանորոգման ծրագրերով նախատեսված ծավալները խիստ սահմանափակ են և ծրագիրն արդեն հաստատված է: Հաղթանակ թաղամասի 11-րդ և 13-րդ հողային պաստառով փողոցներն ընդգրկված չեն այդ ծրագրում: Փողոցների հիմնանորոգման խնդիրը հաշվառվել է և հարցին հնարավոր կլինի անդրադառնալ լրացուցիչ ծավալների առկայության դեպքում:
Միաժամանակ հայտնում եմ, որ 2018թ. Երևանի քաղաքապետարանի՝ փողոցների հիմնանորոգման ծրագրերի շրջանակներում Հաղթանակ թաղամասում իրականացվել են հողային պաստառով ճանապարհների շուրջ 22000 քմ ասֆալտապատման աշխատանքներ:
Հարց- Նույն թաղամասի մի քանի փողոցներ չունեն կոյուղատար համակարգ։ Բնակիչները նախորդ տարիներին դիմել են թե քաղաքային իշխանություններին, թե վարչական շրջանի ղեկավարներին, թե «Վեոլա Ջուր» ընկերությանը։ Խնդիրը լուծում չի ստացել։ Դուք ունե՞ք վիճակագրություն, էլ որ թաղամասերում նման խնդիր կա, Երևանում քանի՞ տնտեսություն չունի կոյուղատար, ինչպե՞ս եք տեսնում խնդրի լուծումն ու ի՞նչ գործուն քայլեր եք կատարելու։ Բնակիչների խոսքով, խնդիրն ունի նաև առողջապահական նշանակություն, քանի որ հատկապես ամռան ամիսներին, ինչպես հաստատել են առողջապահության նախարարությունից, վարակի առաջացման ու տարածման վտանգ կա։ Կոյուղու համար փորված փոսերը փողոցում են, բնակիչների բակերում, որոնվ մոտ երեխաներ են խաղում։
Պատասխան-Ջրամատակարարման և ջրահեռացման ցանց կառուցելու խնդիրների վերաբերյալ տեղեկացնում եմ, որ Երևան քաղաքում հաշվառված են շուրջ 60 թաղամասեր, որոնք ունեն նմանատիպ խնդիրներ: Միայն Աջափնյակ վարչական շրջանում կան նմանատիպ խնդիրներով հաշվառված թվով 6 հասցեներ (թաղամասեր):
Տեղեկացնում եմ, որ երկու նոր ձևավորված՝ Նորք վարչական շրջանի տարածքում գտնվող Դավիթ Բեկ փողոցին հարակից և Աջափնյակ վարչական շրջանի տարածքում գտնվող Փիրումյան նորակառույց թաղամասերում 2019թ. Երևանի քաղաքապետարանի ծրագրերով նախատեսված է կոյուղագծերի և ջրագծերի կառուցման աշխատանքներ, որոնց համար ընթացքի մեջ են նախագծա-նախահաշվային փաստաթղթերի պատվիրման աշխատանքները:
Մասնավորապես, Դավիթ Բեկ թաղամասի հարակից տարածքում նախատեսված է կոյուղագծերի կառուցման, իսկ Փիրումյան թաղամասում՝ ջրագծերի կառուցման աշխատանքներ:
Մնացած հաշվառված թաղամասերի՝ այդ թվում Հաղթանակ թաղամասի նմանատիպ աշխատանքները (ջրագծերի, կոյուղագծերի կառուցման) հաշվառվել են և համապատասխան ֆինանսական միջոցների առկայության դեպքում կքննարկվեն:
Հարց- Թաղամասի փողոցներում մայթեր չկան։ Խնդիրն առավել մտահոգիչ է թաղամաս մտնող գլխավոր փողոցի դեպքում, որտեղ երթևեկությունն ակտիվ է, հետիոտնը՝ շատ։ Մայթերի բացակայությունը վտանգավոր է հետիոտնի համար։ Նախատե՞սվում է մայթի կամ մայթերի կառուցում Հաղթանակում, եթե այո՝ ի՞նչ ժամկետներում, ո՞ր փողոցներում, եթե ոչ՝ ինչո՞ւ։
Պատասխան-Երևանի քաղաքապետարանի 2019թ. աշխատանքային ծրագրերով մայթերի կառուցման աշխատանքներ չեն նախատեսվել: Հաղթանակ թաղամասի մայթերի կառուցման խնդիրը հաշվառվել է և համապատասխան ծրագրերի առկայության դեպքում՝ կքննարկվի:
Հարակից հրապարակումներ`
- «Հրապարակ». Մալաթիա-Սեբաստիայի Հաղթանակ թաղամասի բնակիչների խնդիրը պետք է լուծի «Վեոլիա ջուրը՞», թե՞ թաղապետարանը
- Հաղթանակ թաղամասի բնակիչներն ահազանգում են. Աղբավայրի այրումից գարշահոտություն է տարածվում
- Երևանի ծայրամասերում բնակվող քաղաքացիները սպասում են «մի օրվան»
- Երևանի ծայրամասերի բնակիչների կյանքն իսկական տառապանք է
- Երևանի ծայրամասեր. Մութ, փոշոտ փողոցներ, աղաղակող վերելակներ