Ձեր վստահելի աղբյուրը

Այսօր ԱԺ պաշտպանության, անվտանգության, ներքին գործերի մշտական հանձնաժողովի նիստում քննարկվում էր ԱԺ «Լուսավոր Հայաստան» խմբակցության ներկայացրած «Գնումների մասին» օրենքում փոփոխությունների նախագիծ, որով առաջարկվում է ՀՀ վարչապետի, նախագահի և ԱԺ նախագահի ծախսերը թափանցիկ դարձնել։ Քննարկման ժամանակ թեժ բանավեճ սկսվեց «Լուսավոր Հայաստան» խմբակցության  պատգամավոր Գևորգ Գորգիսյանի և «Իմ քայլը» խմբակցության պատգամավոր Քրիստինե Պողոսյանի միջև։ Գորգիսյանի ելույթից հետո Քրիստինե Պողոսյանը հայտարարեց. «Պաշտոնապես ասում եմ, որ դուք պոպուլիստ եք պարոն Գորգիսյան և այստեղ պոպուլիզմով եք զբաղվում»:

Գորգիսյանն առաջարկեց սահմանափակել նրա ելույթը, քանի որ կանոնակարգից դուրս է: Ք. Պողոսյանն ասաց. «Դուք ինձ չեք կարող արգելել, որ ելույթ ունենամ: Վերջին երեք նիստերին դուք անընդհատ շահարկում եք 2016-ի ապրիլը: Եթե ուզում էիք հարցը քննարկել, գոնե մեկ քննարկում կարող էիք անել: Իսկ ձեզ հետ դաշինքը «Քաղաքացիական պայմանագրի» ամենամութ մասն է»:

«Դուք ով եք, որ ինձ արգելեք։ Դուք ինքներդ ձեր անցյալը մի վիճարկեք»,- արձագանքեց Գորգիսյանը։

Նիստը վարող Անդրանիկ Քոչարյանը հայտարարեց, որ հիմա նախագիծը կդնեն քվեարկության և կպարզեն՝ շամպանսկին է կարևոր, թե անվտանգությունը:

«Ես իմ վարողի իրավունքով կասեմ, որ դուք փորձեցիք այս քննարկումը անվտանգության տիրույթից տեղափոխել պոպուլիզմի տիրույթ»,- ասաց նա։

«Լուսավոր Հայաստանի» կողմից ներկայացված նախագիծը մերժվեց։ 

«Կխնդրեմ մյուս հարցերի քննարկման ժամանակ մենք շարժվենք մեր  պետականության և անվտանգության շահերով»,- ասաց Ա. Քոչարյանը։

«Իսկ ե՞րբ չենք շարժվում»,- արձագանքեց Գորգիսյանը։

«Այ հենց հիմա չենք շարժվում»,- պատասխանեց Ա. Քոչարյանը։

«Քֆուր կանեմ նրան, ով կկասկածի»,- ասաց Գ. Գորգիսյանը։

Գորգիսյանին փորձեց հանգստացնել պատգամավոր Սասուն Միքայելյանը, իսկ Քրիստինե Պողոսյանը շարունակեց. «Ես պահանջում եմ հեռացել պարոն Գորիգսյանին։ Ի՞նչ է նշանակում՝ քֆուր կանեմ, կարո՞ղ է փողոցում եք գտնվում կամ «Լուսավոր Հայաստանի» գրասենյակում, այս ի՞նչ խոսելաոճ է»,- ասաց Պողոսյանը։

Նա առաջարկեց  Գորգիսյանին հեռացնել։ Սակայն Անդրանիկ Քոչարյանն առաջարկեց անցնել օրակարգի հաջորդ հարցին կամ ընդմիջում հայտարարել։

«Թող մարդը դուրս գա քֆուր անի, հանգստանա, հետ գա»,- ասաց Ք. Պողոսյանը։

Սակայն ընդմիջում չհայտարարվեց և նիստը շարունակվեց։