Վկա. «Գագիկն ասել է՝ ինձ խփել է «Սասնա ծռերի» անդամներից մեկը, ու շատ մոտիկից» (լրացված)
14։33
Դատավորը հարցրեց. «Ձեր խոսքում ասացիք, որ ձեր որդուն, ձեր կարծիքով, սպանել են նրա համար, որպեսզի կազմակերպեն գնդի վրա հարձակում։ Ձեր որդին սպանվել է 2016 թվականի հուլիսի 30-ին։ Հայտնի է, որ խմբի անդամները հանձնվել են դրա հաջորդ օրը՝ հուլիսի 31-ին։ Ձեր տրամաբանությունից ելնելով, ինչո՞ւ հարձակում տեղի չունեցավ գնդի վրա»։
Վ. Տափանոսյանն ասաց. «Մարդ ուղարկեցի մեր մոտիկներից, ասացի՝ բա խի՞ «Սասնա ծռերը» հանձվեցին, ասաց՝ պարոն Տեփանոսյան, եթե երեք օր էլ մնային, օրը մեկ-երկու հատ ոստիկան կխփեին ոստիկանները։ Այդ մարդիկ բարիություն արեցին, հանձնվեցին, որ Յուրոյով սահմանափակվեն»։
14։07
Երևան քաղաքի ընդհանուր իրավասության դատարանի Շենգավիթի նստավայրում, դատավոր Մեսրոպ Մակյանի նախագահությամբ, այսօր շարունակվեց ՊՊԾ գնդի գրավման գործով «Սասնա Ծռեր» խմբի 10 անդամի դատավարությունը։ Նիստին հարցաքննվեց ՊՊԾ գնդի տարածքում վիրավորում ստացած, մի քանի օրից հիվանդանոցում մահացած ոստիկան Գագիկ Մկրտչյանի քույրը՝ գործով վկա Մերի Մկրտչյանը։
Նա պատմեց՝ երբ իմացել են, որ Գ. Մկրտչյանը վիրավոր է, գնացել են «1-ին համալսարանական» հիվանդանոց. «Այդ օրերին համացանցում իրարամերժ տեղեկություններ էին տարածվում։ Գրում էին, իբր Գագիկը վիրավորվել է ոստիկանի փամփուշտից։ Բայց մենք սպասում էինք, որ Գագիկն արթնանա և պատմի։ Գագիկը մի քանի օրից արթնացավ։ Առաջին հարցը, որ տվել եմ Գագիկին՝ ո՞վ է իր վրա կրակել, արդյո՞ք ոստիկաններն են։ Ասաց, որ ոչ, իրեն խփել է «Սասնա ծռերի» անդամներից մեկը, թե ով, չեմ կարող ասել, ինքը շատ կծկտուր էր խոսում, պատմեց, որ երկու կամ երեք հոգով դուռը կոտրել են, մտել են, ասել են պառկի, կրակոցը մոտիկից է եղել։ Կպել է թևին։ Նկարագրեց, որ ահավոր ցավեր ուներ, թևը պոկվել, կախվել է։ Նրանք իր շորով կապել են թևը, բայց թույլ չեն տվել, որ դուրս գա։ Ասել է՝ արնաքամ եմ լինում, խնդրում եմ թողեք դուրս գամ, չեն թողել, ասել են սպասիր։ Ահագին ժամանակ հետո նոր թողել են, ծառայակից ընկերներից մեկին կանչել են, օգնել են, որպեսզի դուրս գա»։
Մ. Մկրտչյանն ասաց, որ եղբորը համացանցում ցույց է տվել «Սասնա ծռերի» անդամներից մի քանիսի նկարները, հարցրել, թե նրանցից ով է կրակել. «Պավլիկ Մանուկյանի նկարն եմ ցույց տվել, մեկ էլ բանդանայով, ակնոցներով, սուր քթով, ավելի երիտասարդ մեկի նկարը։ Գագիկը ասել էր՝ մարդիկ էին մտել, գլխին ինչ- որ բան և այլն, դրա համար բանդանայով տղայի նկարը ցույց տվեցի, ասաց՝ չէ։ Այստեղ այդ տղան չկա»,- նշեց վկա Մ. Մկրտչյանը։
Նա կրկնեց. «Գագիկն ասել է՝ ինձ խփել է «Սասնա ծռերի» անդամներից մեկը, ու շատ մոտիկից։ Այսինքն կրակահերթ, կռիվ, ինչ-որ պաշտպանական բաներ չեն եղել, որովհետև ինքը զենք չի ունեցել»։
Ամբաստանյալներից Վարուժան Ավետիսյանը հետաքրքրվեց, թե հիվանդանոցում գտնվելու ժամանակ արդյո՞ք Գ. Մկրտչյյանին այցելել է Վալերի Օսիպյանը կամ այլ հայտնի ոստիկան, Մ. Մկրտչյանը պատասխանեց. «Ես անձամբ չեմ տեսել, որ մտել են Գագիկի մոտ։ Բայց մեզ բոլորի մոտ շատեն են եկել, գնացել»։
Որպես վկա հարցաքննվեց ՊՊԾ գնդի գրավման ժամանակ սպանված ոստիկան Յուրի Տեփանոսյանի հայրը՝ Վահրամ Տեփանոսյանը, պատմեց, որ երբ իմացել է, թե ինչ եղել, գնացել է ՊՊԾ գնդի տարածք, սկսել է հայհոյել «Սասնա ծռերի» անդամներին։
«Մի լավ ոստիկան մոտեցավ, ասաց՝ հարգելիս մի քրֆի իրենց, քո տղուն իրանք չեն խփել։ Հիմա որ դու քրֆում ես, քո քֆուրի համար քեզ կխփեն, կլինի որ տղուն ու հորը խփել են։ Ասաց, որ տղուդ կողքից վիրավորել են, տարել են հիվանդանոց»,-պատմեց նա։
Տեփանոսյանը պնդում է, որ իր որդուն կրակել են ոստիկանները. «Տղուս սպանելուց հետո ես ասել եմ, որ միլիցեքն են խփել իմ տղուն, ոչ թե «Սասնա ծռերը»։ Մի 60 օրինակ կարող եմ բերել, ապացուցել, ապացույցն էլ կա»։
Ամբաստանյալներից Պավլիկ Մանուկյանի փաստաբան Զարուհի Փոստանջյանը դիմելով նրան հարցրեց՝ դուք շարունակում եք պնդել, որ ձեր որդուն ոչ թե 7,62 տրամաչափի գնդակով են սպանել, այլ ուրիշ զենքից, որպես ծնող համամիտ կլինե՞ք, որ տեղի ունենա արտաշիրիմում, նոր փորձաքննություն նշանակվի, Վ. Տեփանոսյանն ասաց. «Այո, իհարկե, հանկարծ չուզենան այս մարմինները, պիտի տղուս հանեմ, բերեմ, մարդ բերեմ դրսից, եվրադատարանից, որ գլխի գյուլեն ասեն 7,62 տրամաչափի է, թե Մակարով, թե արտասահմանյան զենք։ Միանշանակ այո»։
Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝ պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։
Հարակից հրապարակումներ`
- ՊՊԾ գնդի գործով դատական նիստը ընդամենը մի քանի րոպե տևեց
- Երբ այս մարդկանց բաց թողեցիք բանտից, մեր ընտանիքը գլխիվայր շուռ եկավ. ՊՊԾ գնդի տարածքում սպանված ոստիկանի այրի
- ՊՊԾ գնդի գրավման գործով տուժող. Երեխաները ուժեղ սթրեսի մեջ էին
- Դատավորը չբացառեց՝ Յուրի Տեփանոսյանի հայրը կարող է ընդգրկվել դատակոչի ցուցակում
- «Թուրքի նման գիշերվա կեսին հարձակվելը ...». ՊՊԾ գնդի նախկին հրամանատարի հարցաքննությունից
- Դատարանում վիճեցին «Սասնա ծռերի» անդամներն ու ՊՊԾ գնդի նախկին հրամանատարը
- ՊՊԾ գնդի գրավման գործով դատական նիստին զուգահեռ՝ բողոքի ակցիա
- ՊՊԾ գնդի գրավման գործով դատավարությունը կրկին դռնբաց է
- Վալերի Օսիպյանը դատարանում պատմեց, թե ինչ է կատարվել ՊՊԾ գնդում
- ՊՊԾ գնդում հերթապահած բուժքույրն իրեն տուժող չի ճանաչում
- Թող մինչև վերջ էլ նստի ու պատասխան տա. ՊՊԾ գնդի գրավմանը սպանված ոստիկանի կին
- Վալերի Օսիպյանը հերքում է Յուրի Տեփանոսյանի հոր հայտարարությունը