Եթե փող եք ուզում, իրավունքներ տվեք. Մարուքյանը՝ փոխնախարարին
Ազգային ժողովն առաջին ընթերցմամբ քննարկում է «Փաստաբանության մասին» ՀՀ օրենքում փոփոխություններ և լրացումներ կատարելու մասին օրենքի նախագիծը։
«Լուսավոր Հայաստան» կուսակցության պատգամավոր Էդմոն Մարուքյանը հիմնական զեկուցող ՀՀ արդարադատության նախարարի առաջին տեղակալ Արտակ Ասատրյանից հետաքրքրվեց փաստաբանների կասեցված արտոնագրերի համար վճարվող գումարների դիմաց տրվող արտոնություններից։
«Հիմա Փաստաբանների պալատն ի՞նչ է ուզում անի, ասում է՝ արտոնագրերը կասեցրել եք անպայման գոնե վճարեք մեզ, այսինքն հիսուն տոկոսի չափով։ Հիմա իմ արտոնագիրը կասեցված է, ես անդամավճար չեմ վճարում, բայց պալատի գործերին չեմ էլ խառնվում, որ սկսեցի վճարել, սկսելու եմ նաև խառնվել գործերին։ Հիմա ուզում եմ հասկանալ՝ ի՞նչ իրավունքներ եք մեզ տալիս, երբ որ մեր կասեցրած արտոնագրից ուզում եք մենք անպայման վճարենք։ Այդ արտոնագրով ես հիմա գումար չեմ աշխատում, դուք որ ուզում եք այդ արտոնագրի համար մենք հիսուն տոկոսը վճարենք, ի՞նչ արտոնություններ եք մեզ տալիս»,- հարցերց պատգամավորը։
Փոխնախարարը պատասխանեց, որ կասեցման համար առաջիկա հինգ տարում որևէ վճար չի գանձվում. «Այստեղ խոսքը վերաբերում է այն դեպքերին, որ հինգ տարին լրանալուց հետո այդ կասեցված անդամավճարի վերականգնման խնդրանքով փաստաբանը դիմում է պալատին և այս դեպքում ասում ենք, եթե դուք ցանկություն ունեք վերականգնել ձեր կասեցրած արտոնագիրը, ապա հինգ տարին անցնելուց հետո ոչ թե լրիվ անդամավճար եք վչարում, այլ նախատեսում ենք կարգավորում անդամավճարի հիսուն տոկոսի չափով։ Գործող փաստաբանի հետ տարբերությունն այն է, որ նա կիսով չափ պետք է վճարի, հետևաբար լիազորությունները ևս ծավալային առումով պետք է որոշակի փոփոխություններ ունենան։ Ինչու պետք է գործող և չգործող փաստաբանները նույն իրավունքներն ունենան»։
Պատգամավորն արձագանքեց. «Հիմա իմ արտոնագիրը կասեցված է, պալատի ղեկավար մարմինների ընտրությանը չեմ մասնակցում, ոչ մի բանի էլ չեմ խառնվում։ Հիմա ասում է՝ արի վճարի, ի՞նչ իրավունք եք տալիս իմ վճարի դիմաց, երբ ես այդ արտոնագրով փող չեմ աշխատում։ Կարո՞ղ ենք պալատի ընտրություններին մասնակցել, գալ դասընթացներին մասնակցել, եթե փող եք ուզում, իրավունքներ տվեք»։
Արտակ Ասատրյանը ասաց, որ նրանք իրավունք ունեն անվճար դասընթացներին մասնակցելու, բայց տրամաբանական է, որ այլ իրավունքներ չունենան. «Ինչ վերաբերում է արտոնագրի կիսով չափ վճարելուն, բազմաթիվ կասեցված փաստաբանների հետ քննարկվել է հարցը, որևէ խնդիր չեն տեսնում, նույնիսկ ուրախ են, որ նման հնարավորություն է տրվում, և իրենք հետագայում վերականգնելու համար ստիպված չեն լինի փաստաբանների դպրոցում սովորելու, մեծ գումարները վճարելու, բարդ պրոցեսներն անցնելու, իսկ այս պրոցեսը հնարավորություն է տալու հետագայում շարունակելու փաստաբանական գործունեությունը»։
Ելույթների ժամանակ ԱԺ ամբիոնից ԲՀԿ պատգամավոր Գևորգ Պետրոսյանը հայտարարեց, որ իրենց կուսակցությունը դրական է տրամադրված նախագծին։
Մարուքյանն էլ ելույթի ժամանակ ասաց. «Պարզ է, որ կան փաստաբաններ, որոնց արտոնագրերը կասեցված են, և նրանք շահագրգռված են նման հնարավորություն ստանալու համար։ Բայց եթե այդ փաստաբանը հինգ տարի կասեցրել է, արտոնագիրը դադարում է գործել և պետք է գնա նորից սովորի, բայց կներեք, եթե այդ փաստաբանը օմբուդսմեն է կամ պատգամավոր է, ով գիշեր-ցերեկ օրենք է կարդում, գրում։ Այդ աբսուրդ դրույթը ընդամենը հանեիք, ասեիք, որ նրանք, ովքեր կասեցրել են, բայց իրավունքի բնագավառում են աշխատում, իրենց վրա չի տարածվում։ Հարցը չլուծեցինք, հիմա ասում եք՝ եկեք մեզ փող տվեք»։
Նա նշեց, որ առաջին ընթերցմանը կողմ կքվեարկեն, բայց հետո պետք է անպայման քննարկումներ ունենան այս հարցի շուրջ։
Փոխնախարարն էլ հավելեց, որ առաջինից երկրորդ ընթերցում կարող են բարձրացված հարցը քննարկել։