ՀՔԾ-ն ու ԱԱԾ-ն անում են ամեն ինչ, որ բացահայտեն Մարտի 1-ի գործն ամբողջությամբ. Արթուր Վանեցյան
Հավաստիացնում եմ, որ ՀՔԾ-ն ու ԱԱԾ-ն, միմյանց հետ համագործակցելով, անում են ամեն ինչ, որ բացահայտեն Մարտի 1-ի գործն ամբողջությամբ։ Այս մասին այսօր խորհրդարանում լրագրողների հետ զրույցում ասաց ԱԱԾ տնօրեն Արթուր Վանեցյանը։
Անդրադառնալով Մարտի 1-ի քրեական գործի շրջանակներում ոստիկանության նախկին բարձրաստիճան պաշտոնյայի ձերբակալությանը՝ ԱԱԾ տնօրենը նշեց, որ քրգործը Հատուկ քննչական ծառայության վարույթում է, ՀՔԾ-ն երեկ տարածել է համապատասխան հաղորդագրություն, որից առավել բան ասել չի կարող։
Հարցին, թե եղած տեղեկատվությունով հնարավո՞ր է մարտի 1-ի բոլոր սպանությունների հեղինակներին բացահայտել, Արթուր Վանեցյանն ասաց, որ ինքը կանխատեսումներով չի կարող զբաղվել, կլինեն փաստեր ու բացահայտումներ, որի մասին կտեղեկացնեն։
Լրագրողները նաև հարցրեցին՝ ԱԱԾ-ից անհետացած նյութերն արդյոք վերաբերու՞մ են Մարտի 1-ին ու դրա վերաբերյալ քրեական գործ հարուցվե՞լ է, ԱԱԾ տնօրենը պատասխանեց. «Քրեական գործ չի հարուցվել, քանի որ դա յուրահատկություններ պարունակող գործ է, որը պետք է ամբողջությամբ բացահայտվի, որպեսզի որևէ կասկած որևէ մեկի մոտ չմնա, որ մենք փորձել ենք կոծկել այդ փաստաթղթերի անհետացումը կամ այդ փաստաթղթերի անհետացման հետ կապված ինչ-ինչ գործեր չեն բացահայտվի»։
Արթուր Վանեցյանի խոսքով՝ շատ մեծ ծավալի աշխատանք է տարվում ԱԱԾ տեսչական և ներքին անվտանգության վարչության կողմից և, կարծում է, որ առաջիկայում այն կավարտվի ու կփոխանցվի քննչական մարմին։
Դիտարկմանը՝ անհետացած փաստաթղթերը կապ ունե՞ն Մարտի 1-ի գործի հետ, ԱԱԾ տնօրենն ասաց, որ չի կարող այդ հարցին պատասխանել, բայց տեղյակ է, թե դրանք ինչ փաստաթղթեր են։
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ