Ձեր վստահելի աղբյուրը

Մանվել Գրիգորյանը հրաժարվում է որևէ տեսակի բուժօգնությունից, դեղամիջոցներ ընդունելուց։ Այս մասին այսօր խորհրդարանում լրագրողների հետ զրույցում ասաց Մարդու իրավունքների պաշտպան Արման Թաթոյանը:

Նրա խոսքով՝ երբ «Նաիրի» ԲԿ-ից Մանվել Գրիգորյանին տեղափոխել են  քրեակատարողական հիմնարկ, տեղեկությունը ստանալու առաջին պահից սկսած, հարցը եղել է ՄԻՊ-ի ուշադրության կենտրոնում։ 

«ՄԻՊ աշխատակիցները, ներկայացուցիչներն անընդհատ իրականացրել են այցեր, անընդհատ սկզբունքով փաստաբանի հետ կապի մեջ են եղել, ես ինքս խոսել եմ նաև փաստաբանի հետ։ Մեր նպատակն էր հատկապես առողջական վիճակի հետ կապված հարցեր պարզելը։ Այս գիշեր Մանվել Գրիգորյանը տեղափոխվել է քաղաքացիական բուժհաստատություն՝ պայմանավորված առողջական վիճակով, նա հիմա հրաժարվում է որևէ տեսակի բուժօգնությունից, դեղամիջոցներ ընդունելուց, այդ թվում՝ շաքարային դիաբետի հետ կապված, և դա շատ վատ է անդրադառնում նրա առողջական վիճակի վրա»,- ասաց Արման Թաթոյանը։

Նա նաև հայտնեց, որ ՄԻՊ ներկացուցիչները դեռ երեկ են այցելել  Մանվել Գրիգորյանին, իսկ այսօր էլ ինքը արդարադատության նախարարին ուղղված նամակում հարցեր է առաջադրել, թե արդյոք ՔԿՀ-ի պայմաններում կան հնարավորություններ Մանվել Գրիգորյանին ցուցաբերելու անհրաժեշտ բուժօգնությունը, եթե կան, որոնք են դրանք, եթե չկան, քննարկել պատշաճ բուժօգնության տրամադրման հարցը։

Արման Թաթոյանը նաև ասաց, որ Մանվել Գրիգորյանին հետազոտել է իր նախընտրած բժիշկը, որի եզրակացության հետ կապված ևս հարցեր են առաջադրել, հիմա սպասում են գործընկերների պատասխանին, որից հետո եզրահանգումներ կանեն։

Հարցին՝ նրա առողջական վիճակը որքա՞ն պետք է վատանա,  որ խափանման միջոցը փոխելու հարց բարձրացվի, Արման Թաթոյանը պատասխանեց. «Եթե մեր գործընկերների հետ աշխատանքի արդյունքում հանգենք այն եզրակացության, որ կա անհամատեղելիության հարց, մենք հարցը կբարձրացնենք, բայց քանի որ դատական վարույթ է, սա մեզ շատ կաշկանդում է։ Ես դատարանի վարույթին միջամտելու իրավունք չունեմ, երկրորդ՝ այս պահին այդ հարցը չեմ բարձրացրել, դրան գնալու համար պետք է մի քանի քայլեր կատարել, որից հետո բարձրացնել այդ հարցը։ Փաստաբանը կարող է այդ հարցը բարձրացնել, իսկ ՄԻՊ-ը կոնկրետ կարգավիճակ ունի, որով սահմանափակված է»։