Սևազգեստ խմբերին պետք է ծաղկավոր «բաբչկա» կապել և ճանապարհել քաղաքակիրթ կյանք. վարչապետ
Մեկ տարի առաջ Հայաստանում տեղի ունեցավ ոչ բռնի թավշյա ժողովրդական հեղափոխություն, որից հետո մի շարք ուժեր, այդ թվում նախկին կոռուպցիոն համակարգի հետ ուղղակի կամ անուղղակի կապ ունեցող, փորձեցին իրենց համար ՀՀ-ում քաղաքական գործունեության որոշակի դաշտ ստեղծել, ինչը բնական է ու նորմալ ժողովրդական ցանկացած երկրի համար: Այս մասին այսօր գործադիրի նիստում ասաց ՀՀ վարչապետ Նիկոլ Փաշինյանը։
Սակայն, ըստ նրա, մեկ տարվա փորձերի ու գործունեության արդյունքում այդ ուժերը վերջնականորեն հասկացան՝ անդառնալիորեն հայտնվել են քաղաքական լուսանցքում։ Նա նշեց, որ վերջին շրջանում տեսնում են հետևյալ դրսևորումները, որ ըստ ամենայնի, քաղաքական աջակցություն ստանալու հեռանկարով, որոշ շրջանակներ որոշել են ՀՀ-ում իրականացնել բռնության և բռնության քաղաքական լեգիտիմացման քարոզ:
«Այս առումով նույնիսկ տեղի են ունենում կազմակերպված ակցիաներ, որոնց հիմնական ասելիքն այն է, որ իրենք պատրաստ են Հայաստանում բռնությամբ քաղաքական հարցեր լուծել: Այս ասելիքը, հռետորիկան գնալով ավելի կազմակերպված բնույթ է ստանում: Նույնիսկ մենք օպերատիվ տեղեկություններ ունենք, որ այդ շրջանակների որոշ հատվածը որոշել է սևազգեստ մարդկանց խմբեր ձևավորել, որոնք քաղաքում կշրջեն, կփորձեն որոշակի տրամադրություն ստեղծել, լկտի պահվածքով աչքի ընկնել և այլն: Այս ամենի համատեքստում ես ուզում եմ արձանագրել՝ այն երկրում, որտեղ հաղթել է ոչ բռնի, թավշյա հեղափոխությունը, որտեղ տեղի են ունենում բռնության կոչեր, այս պայմաններում իրավապահ համակարգը չի կարող լինել թավշյա։ Եւ իրավապահ համակարգը պետք է շատ կոշտ հակահարված տա բոլոր նման երևույթներին՝ սկսած այն երևույթից, որ օրինակ, Երևանի Ազատության հրապարակն ինչ-որ ժամի ինչ-որ մարդիկ փորձում են դարձնել երթևեկելի գոտի, ավտոմեքենաներով մտնել ճռիկներ անել: Ավտոմեքենաներ վարել մայթերով, և սա, ըստ էության, որոշակի նպատակով է արվում՝ ցույց տալու համար, որ երկրում իբր հաստատված է անիշխանություն, չկա իրավակարգ, կամ այն թույլ է»,- ասաց Նիկոլ Փաշինյանը։
Վարչապետի խոսքով՝ նման դեպքերում ՀՀ իրավապահ համակարգը պետք է խնդրին վերաբերվի ոչ թե որպես երթևեկության կանոնների խախտում, սա բացահայտ արհամարհանք է հանրության, օրինականության և պետական կարգի նկատմամբ:
«Բոլոր այս դեպքերով պետք է զբաղվի ոչ միայն ՃՈ-ն, այլ հասարակական կարգի և անվտանգությամբ զբաղվող ուժերը, և նման պահվածքով հանդես եկող ցանկացած անձ պետք է լրջորեն փոշմանի իր կատարած արարքի համար»,-ասաց նա։
Նիկոլ Փաշինյանը նշեց, որ այդ թեմայով առավոտյան զրուցել է ՀՀ ոստիկանապետի հետ: Ինչ վերաբերում է սևազգեստ խմբերին, վարչապետն ասաց. «Նրանց պետք է տեղորոշել, սև շորերի հարցը լուծել, ծաղկավոր բաբչկան կապել և ճանապարհել քաղաքակիրթ օրինական կյանք»։
Այնուհետև դիմելով ԱԱԾ տնօրենին և ոստիկանապետին՝ ասաց, թե արդյոք խնդիրը պարզ է առաջադրված, վերջիններս դրական պատասխան տվեցին. «Պարզ է, կկատարվի»։
Վարչապետը ՀՀ գլխավոր դատախազ Արթուր Դավթյանին էլ ասաց՝ ճիշտ կլինի, որ դատախազությունը նույնպես այս երևույթներին ոչ միայն մոտենա քրեական օրենսգրքի այս կամ այն հոդվածի առանձին վերցրած մեկնաբանությամբ, այլև հանրային անվտանգության տեսակետից, քանի որ կոնկրետ գործողություններ են արվում փողոցում քայլող քաղաքացիների շրջանում՝ պաշտպանվածության զգացումը խաթարելու համար. «Սա հանրային և ազգային անվտանգության խնդիր է»։
Նա Վալերիյ Օսիպյանին հանձնարարեց ձևավորել խումբ, որ քաղաքացիների ահազանգերին սովորականից տասն անգամ արագ կարձագանքի։
«Շատ լավ, առավոտյան Ձեզ հետ զրույցից հետո անմիջապես տվել եմ հանձնարարական, նաև կառավարության նիստից հետո նույնպես կլինեն հատուկ հանձնարարություններ», - ասաց ոստիկանապետը։
Մարդու իրավունքների պաշտպան Արման Թաթոյանն էլ նշեց, որ ողջունում է բռնության քարոզի դեմ պայքարի պատրաստակամությունը, սակայն կարևորեց խոսքի ազատությունը նաև: Նա նշեց, որ պատրաստ է համագործակցել իրավապահ համակարգի գործընկերների հետ։
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
