Հարցն արդեն բարձրացված է. ԱԳ նախարար
«Ադրբեջանի՝ առանց հայտարարելու զորավարժություններ անցկացնելն արդյոք դեմարշ չէ՞, ոչ թե ՀՀ-ի կամ ԼՂՀ-ի նկատմամբ, այլ միջազգային հանրության և մի շարք միջազգային կազմակերպությունների նկատմամբ։ Չե՞ք պատրաստվում դիմել ՄԱԿ-ի խորհրդին Ադրբեջանի դոսյեն այս մասով վերանայելու համար»- խորհրդարանում 2018 թ. բյուջեի կատարողականի հաշվետվության ժամանակ նման հարց բարձրացրեց «Բարգավաճ Հայաստան» խմբակցության պատգամավոր Տիգրան Ուրիխանյանը՝ դիմելով ԱԳ նախարար Զոհրաբ Մնացականյանին։
«Այս մտահոգությունը տեղավորվում է տարածաշրջանային անվտանգության ու կայունության շրջանակում։ Յուրաքանչյուր հարց իր ձևաչափերն ու կոնկրետ հարթակներն ունի։ Այս հարցում ձևաչափն ու հարթակը ԵԱՀԿ-ն է, և դրա շրջանակներում հարցն արդեն բարձրացված է համապատասխան գործիքներ օգտագործելու համար», - պատասխանեց Մնացականյանը։
«Իմ քայլը» խմբակցության պատգամավոր Շիրակ Թորոսյանն էլ նշեց, որ օրերս ՄԱԿ-ի գլխավոր վեհաժողովի 73-րդ նստաշրջանում Վրաստանի կողմից ներկայացված «Աբխազիայից և Հարավային Օսիայից բռնի տեղահանված անձանց և փախստականների կարգավիճակի մասին» բանաձևից, որի քվեարկությանը ՀՀ-ն չմասնակցեց։
«Սա ՀՀ-Վրաստան փոխհարաբերությունների նոր որա՞կ է, արդյոք միջազգային հարթակներում համագործակցության հնարավորությու՞ն է, վերադա՞րձ է նախկին ջենտլմենական պայմանավորվածության և ՀՀ-ն կարո՞ղ է ակնկալել նման չեզոք վերաբերմունք իր նկատմամբ»,- հարցրեց պատգամավորը։
Ի պատասխան՝ Մնացականյանն ասաց, որ ՀՀ-ն ունի ռազմավարական գործընկերություն ՌԴ-ի հետ և ծավալուն օրակարգ։
«Մեր ձևավորված խորը հարաբերությունների օրակարգը ՌԴ-ի հետ մնում է անփոփոխ և մենք շարունակել ու շարունակելու ենք այդ հարաբերություների խորացումը, որը նաև ընդգրկված է կառավարության ծրագրում։ Հայաստանը նաև ունի կարևորագույն օրակարգ Վրաստանի հետ՝ որպես հարևան պետություն, նույնպես ընդարձակ և կարևոր օրակարգ ունենք համագործակցությունների, որոնք առնչվում են տարածաշրջանային անվտանգությանը և կայունությանը։ Մենք առաջնորդվում ենք արտաքին քաղաքականության այս երկու կարևորագույն ուղղություններով՝ համադրելով երկու շատ կարևոր բարեկամ երկրների հետ մեր հարաբերությունները կառուցելիս»,- նշեց նախարարը։
Հարակից հրապարակումներ`
- «Ուրիշ հերոս չեք ճանաչու՞մ». Նախարարը՝ պատգամավորին
- ԵՄ-ի հետ համաձայնագրի կիրարկումն ապահովող ճանապարհային քարտեզը, հավանաբար, կհաստատվի հունիսի 13-ին․ Մնացականյան