Ծանուցագիրը չպետք է դնեի ռամկայի մեջ ու կախեի Այվազովսկու նկարի կողքին․Գագիկ Ծառուկյան
«Բարգավաճ Հայաստան» խմբակցության ղեկավար Գագիկ Ծառուկյանը Քննչական կոմիտեի՝ հարցաքննության հրավիրելու ծանուցմանը պատասխանել է իր փաստաբանի միջոցով։ Այս մասին այսօր խորհրդարանում լրագրողների հետ զրույցում հայտնեց պատգամավորն՝ անդրադառնալով իրեն հարցաքննության կանչելու մասին հարցին:
Նրա խոսքով՝ ՀՀ Սահմանադրության 96-րդ հոդվածի համաձայն, պատգամավորն իր կարծիքն ասելու համար ոչ հետապնդման, ոչ էլ պատասխանատվության կարող է ենթարկվել:
Հարցին՝ կարծում է, որ իրեն հետապնդո՞ւմ են, Գագիկ Ծառուկյանը պատասխանեց. «Ես ձեզ ասում եմ Սահմանադրության հոդվածը, իսկ ինձ ծանուցագիրը ներկայացրել են, և ես հարգելով օրենքը, իմ փաստաբանի միջոցով թուղթն ուղարկվել է այնտեղ»:
Դիտարկմանը, թե դա նշանակում է, որ հարցաքննության համար Քննչական կոմիտե չի գնալո՞ւ, պատգամավորը նշեց, որ դրա կարիքը չկար, ինչ պետք է, ինքն իր փաստաբանի միջոցով թուղթը ստորագրած ուղարկել է, որում գրված է այն, ինչ ասել է հարցազրույցում, որ դա իր կարծիքն է:
Հարցին՝ ԲՀԿ խմբակցության պատգամավոր Գևորգ Պետրոսյանը հայտարարում է, որ Գագիկ Ծառուկյանի դեմ գրոհ է կազմակերպվել, արդյոք նա տեղյակ է, թե ով է այդ գրոհը կազմակերպել, խմբակցության ղեկավարն ասաց. «Դուք էլ ինձնից լավ կիմանաք»:
Իսկ երբ լրագրողն ասաց, որ տեղյակ չէ, Գագիկ Ծառուկյանն արձագանքեց. «Ես չգիտեմ, որ իմանամ կասեմ: Ով ասել է, իրեն հարցրեք, ինձ ինչի՞ եք հարցնում»:
Առանց իր հետ խորհրդակցելո՞ւ է պատգամավորը նման բան ասել, լրագրողի հարցին վերջինս պատասխանեց. «Բոլոր պատգամավորներն ազատ են իրենց կարծիքն ասելու: Եթե հարց է լինում և մենք խմբակցությունում քննարկում ենք, ուրեմն ինչ որոշել է խմբակցությունը, դրա կողմնակիցն ենք: Իսկ պատգամավորները կարող են իրենց տեսակետը հայտնել»:
Լրագրողներին նաև հետաքրքրում էր՝ արդյոք ճի՞շտ են այն լուրերը, որ նա պատռել է Քննչական կոմիտեի ուղարկած ծանուցագիրը, Գագիկ Ծառուկյանն ասաց. «Այսինքն, որ ծանուցագիրը ուղարկում են, պիտի դնեմ ռամկայի մեջ ու կպցնեմ պատին՞: Առանց ծանուցագիր որ գնայի, չէին ընդունի՞»:
Հարցին՝ ծանուցագիր պատռելը պատգամավորին վայե՞լ պահվածք է, խմբակցության ղեկավարը պատասխանեց. «Ծանուցագիրը ոչ թե պետք է դնեի ռամկայի մեջ, կախեի Այվազովսկու նկարի կողքին...»:
«Փաստորեն Այվազովսկու նկար ունե՞ք»,-արձագանքեց լրագրողը, Գագիկ Ծառուկյանն էլ ծիծաղելով հարցի վրա՝ պատասխանեց. «Եւ ոչ միայն»։
Դիտարկման՝ դա անհարգալից վերաբերմունք չէ՞, Գագիկ Ծառուկյանն ասաց, որ առաջին հերթին դա անհարգալից վերաբերմունք էր իր հանդեպ. «Նրանք Սահմանադրության 96-րդ հոդվածի համաձայն իրավունք չունեին ինձ ծանուցագիր ուղարկելու: Ես հարգել եմ, փաստաբանի միջոցով իմ պատասխանն ուղարկել եմ»:
Հիշեցնենք, որ Աբովյանի քաղաքապետի ընտրությունների նախորդ օրը հրկիզել էին «Քաղաքացիական պայմանագիր» կուսակցության քաղաքապետի թեկնածուի նախընտրական շտաբի պետերից մեկի մեքենան և տան դուռն ու միջանցքը։ Հրկիզման դեպքի առթիվ քրեական գործ է հարուցվել՝ գույքը դիտավորությամբ ոչնչացնելու կամ վնասելու հոդվածով։
ԲՀԿ ղեկավար Գագիկ Ծառուկյանն ավելի ուշ լրագրողների հետ զրույցում ասել էր, թե դա սարքած գործ է․ «Դա շինծու, սարքած գործ է»:
Հարակից հրապարակումներ`
- Ինձ վիրավորել են ու ծանուցագիր են ուղարկել. Ծառուկյան
- Մարզպետի կարգավիճակում որևէ գործողություն չեմ ձեռնարկել. Ռոմանոս Պետրոսյան
- Աբովյանի պատճառները և հետևությունները
- Վարչապետը բացատրություններ է տալիս Աբովյանի ընտրությունների մասին
Լրահոս
Տեսանյութեր
Նկարիչների միության շենքը պետականացնելուց հետո կարող է պայման դնեն՝ Արարատը չնկարեք . Փաստաբան