Ձեր վստահելի աղբյուրը

«Էլեկտրիկ Երևան»-ից ևս մեկ տարի է անցել, սակայն այդ ընթացքում որևէ նոր կասկածյալ, մեղադրյալ ի հայտ չեկավ այդ գործով։ ««Էլեկտրիկ Երևան»՝ 4 տարի անց. ի՞նչ փուլում է իրավունքների ոտնահարման ուղղությամբ տարվող պայքարը»  թեմայով քննարկմանն ասաց Խոսքի ազատության պաշտպանության կոմիտեի նախագահ Աշոտ Մելիքյանը։

«Ի սկզբանե երևում էր, որ Հատուկ քննչական ծառայությունը, այն ժամանակվա իշխանություններն, ընդհանրապես մտադիր չեն, որևէ լուրջ քայլ չեն ձեռնարկում այս գործը բացահայտելու, տրամաբանական ավարտի հասցելու ու բոլոր մեղավորին  պատասխանատվության ենթարկելու ուղղությամբ։ 

Ամենատարօրինական այն է, որ հետհեղափոխական  շրջանում Հատուկ քննչական ծառայությունը կասեցրեց այդ գործի վարույթը, դա ուղղակի մեզ համար  անսպասելի էր, քանի որ մենք այլ տեսակետ ունեինք, ակնկալիք ունեինք, որ շատ արագ կբացահայտվի, առաջընթաց կարձանագրվի»,- նշեց նա։

Ա. Մելիքյանն ասաց, որ դիմել էին դատախազություն՝ բողոքարկելով ՀՔԾ քննիչի որոշումը, Դատախազությունն էլ կասցրել է այդ որոշումը, գործը վերադարձրել՝ պարտադրելով վերսկսել քննությունը։

ԱԺ պատգամավոր, Մարդու իրավունքների և հանրային հարցերի մշտական հանձնաժողովի անդամ Թագուհի Թովմասյանն ասաց, որ իր համար մի փոքր անակնկալ էր, որ հետհեղափոխական Հայաստանում քրեական գործերի ելքով ունեն այն իրավիճակը, ինչ ունեին նախկինում։ Նա նշեց, որ առաջիկայում քննարկում կնախաձեռնի։

«Ցանկացած մեկը, ով ձեռք է բարձրացրել լրագրողի վրա կամ որևէ ոտնձգություն է իրականացրել մասնագիտական գործունեություն իրականացնելիս, պիտի խստագույնս պատժվի»,-ասաց  «Իմ քայլը» խմբակցության անդամը։

Նա նշեց, որ քննչական մարմինների ազատ գործունության լայն  հնարավորություն է տրված, եթե այս պայմաններում էլ ունեն խոչընդտոներ, լրագրողների նկատմամբ  ոտնձգությունների դեպքերի բացահայտման ուղղությամբ կամքի  բացակայություն, ուրեմն շատ ավելի խորքային խնդիրներ ունեն, քան պատկերացնում են։

«էլեկտրիկ Երևանի» գործով տուժող ճանաչված լրագրող Թեհմինե Ենոքյանն ասաց, որ ՀՔԾ քննիչը որոշել էր կասցնել քրեական գործի վարույթն այն պատճառաբանությամբ, որ որպես մեղադրյալ ներգրավման ենթակա անձիք հայտնի չեն։ Նա նշեց, որ տարատեսակ աղբյուրներից հնարավոր է եղել բացահայտել մի քանի անձանց ինքնությունը։ Թ. Ենոքյանի խոսքով, հունիսի 23-ին նկարահանել էր 40 անձի դեմքեր՝ քաղաքացիական հագուստով ոստիկանների, այնուհետև համեմատել է այլ աղբյուրներում առկա լուսանկարների հետ, այս պահի դրությամբ նրանք աշխատում են որպես վարչության պետեր, վարչության պետերի տեղակալներ։

«Իրավունքների պաշտպանություն առանց սահմանների» ՀԿ-նախագահ Հայկուհի Հարությունյանի խոսքով, վստահություն չունի, որ երեք ամիս  անց գործը կրկին չի կասցվելու, որովհետև իրավական տեսանկյունից  քննիչը գտնում է, որ սպառել է հնարավոր բոլոր գործողությունները։

2015 թ. հունիսի 23-ին Երևանի Բաղրամյան պողոտայում և հարակից տարածքներում էլեկտրաէներգիայի սակագնի բարձրացման դեմ փողոց դուրս եկած քաղաքացիների խաղաղ ցույցերը ոստիկանները ցրել էին: Այդ ժամանակ տուժել էին նաև լրագրողները։ Ընդհանուր առմամբ, այդ օրը տուժել է տարբեր ԶԼՄ-ների 24 աշխատակից՝ լրագրողներ, օպերատորներ, լուսանկարիչներ։ Այդ դեպքերով հարուցված քրեական գործով տուժող են ճանաչվել ԶԼՄ-ների 21 ներկայացուցիչներ։ Առայսօր մեղադրանք է առաջադրվել և դատական վճիռ է կայացվել ընդամենը 4 ոստիկանի նկատմամբ։