Ձեր վստահելի աղբյուրը

ԱԺ նախկին պատգամավոր, գեներալ Մանվել Գրիգորյանը «Մարտի 1»-ի քրեական գործով բացատրություն կամ ցուցմունք չի տվել։ Լրագրողների հետ հանդիպմանն ասաց Մ. Գրիգորյանի պաշտպաններից Լևոն Բաղդասարյանը։ 

Անդրադառնալով «Մարտի 1»-ի գործով տուժողի իրավահաջորդի ներկայացուցչի կողմից վերջերս արված հայտարարությանը՝ կապված Մանվել Գրիգորյանի հետ, մասնավորապես ասել է՝ ««Մարտի 1»-ի քրեական գործի նյութերում առկա է մի փաստաթուղթ, ապացույց, որով երևում, որ  Ռոբերտ Քոչարյան այդ օրերին բոլոր շահագրգիռ անձանց հրավիրում է «Մարտի 1»-ի հետ կապված խորհրդակցություն, սակայն Մանվել Գրիգորյանը չի մասնակցում խորհրդակցությանը, որտեղ Ռոբերտ Քոչարյանն ասում է՝  «Հեսա տեսեք՝ մայրիկն ինչպես եմ լացացնելու»», փաստաբանն ասաց. «Եթե դա իրոք այդպես է, փաստեմ, որ «մայրիկը լացացնելը» իրավաբանական կատեգորիա չէ։

Այո, Մանվել Գրիգորյանը լավ գիտակցելով, թե ինչ ցուցումներ պետք  լինեն և  լինելով այդ ըմբոստ տեսակը, որոշակի անօրինական գործառույթներից զերծ մնալու պատճառաբանությամբ ուղղակի չի գնացել  խորհրդակցությանը և երկրի առաջին դեմքի՝ գերագույն գլխավոր հրամանատարի  հրամանը չի կատարել։
Թուրքն անգամ Մանվել Գրիգորյանի մայրիկը չի կարողացել լացացնել։ Եվ առաջին, և երկրորդ, և երրորդ նախագահների օրոք եղել են դեպքեր, որ հաշվի առնելով վերջինս անհատականությունը,  նախագահները ցանկացել են  լացացնել վերջինիս մայրիկը, բայց դա չի ստացվել։ Այսօր էլ, մեր  պաշտպանական կողմի կարծիքով, հնարածին գործ են ցանկանում կարել։ Լիահույս եմ, որ օբյեկտիվ գնահատական է տրվելու»։

Խոսելով Մ. Գրիգորյանի առողջական վիճակի մասին, Լ. Բաղդասարյանն ասաց, որ կալանքը կրելու ընթացքում նրա առողջական վիճակը հասել է այնպիս աստիճանի, որ վերջինս ընդհանրապես չի կարողանում քայլել, անդամալույծի կարգավիճակ է ստացել։

«Սա տիպիկ խոշտանգման օրինակ է, երբ անձը գտնվում է  կալանքի տակ, պաշտպանական կողմը բարձրաձայնում է՝ հիվանդություններն ահամատեղելի են կալանքի հետ, թույլ տվեք, որպեսզի անձնավորությունը հնարավորինս արժանապատիվ ձևով  ներկայանա արդարադատության, եթե ապացուցվի վերջինս մեղասագրված արարքը, թող ստանա համապատասախան պատիժը, գնա համապատասխան ազատարազրկման վայրում իր պատիժն անցկացնի,  բայց նման պայմաններում, իմ կարծիքով,  միտումնավոր  փորձում են անձին պահել կալանքի տակ։ Արդեն տեղի բժիշկներն են բարձրաձայնում,  որ անձի կյանքին ոչ միայն վտանգ  է սպառնում, այլ նաև անձի մոտ դիտվում է վատթարացում»,- նշեց նա։

Լ. Բաղդասարյանի խոսքով, եթե ներպետական ատյաններում անմիջապես, մասնավորապես գործը դատարանի տիրույթում է, Մ. Գրիգորյանի կալանքը չփոխարինվի ալտերնատիվ միջոցով, հաջորդ օրը ևեթ դիմելու են ՄԻԵԴ՝ կիրառելու հաջորդ անհապաղ միջոցառումը։

«Ոչ միայն խոշտանգման  տիպիկ օրինակ ենք տեսնում, այսօր անձը գտնվում է անդամալույծի կարգավիկաճում։ Նման պայմաններում պահել անձին կալանքի տակ, ուղղակի, սա իմ կարծիքն է, հաշվերահարդ է, թե ում կողմից, ինչպես, թե միտում կա, թե ցուցանիշ են ուզում ապահովել, թե սխալ են զեկուցում, դա այլ գնահատման խնդիր է»,- ասաց փաստաբանը։

Լ. Բաղդասարյանը հայտնեց, որ  վերջինս  հետազոտել է հոգեթերապևտը և այդ հարթության վրա տասնյակից ավելի հիվանդություններ է ախտորոշել։

«Նման պայմաններում բժիշկը խորհուրդ չտվեց նրա հետ նուրբ թեմաների մասին խոսել»,–ասաց նա։

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։
Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանների  մի քանի անգամ դիմել են խափանման միջոց կալանքը գրավով փոխելու միջնորդությունները, սակայն մերժվել են։