Բռնոցի Երևանի փողոցներում
Եվրախորհրդի նախագահ Դոնալդ Տուսկը, ում պաշտոնավարումն ավարտվում է աշնանը, ով նախորդ օրը Բաքվում կարևորել էր Ադրբեջանի տարածքային ամբողջականությունը, ով Երևանին կոչ արեց խաղաղության նախապատրաստվել՝ հուլիսի 10-ին ճաշեց Հյուսիսային պողոտայում․այն Հյուսիսային պողոտայում, որ կառուցել էր Ռոբերտ Քոչարյանը։ Նրան ուղեկցում էր Փաշինյան Նիկոլը, ով Հայաստանում վարչապետի պաշտոնը զբաղեցնելով՝ մեկ տարի շարունակ ոտնակոխ է անում օրենք ու օրինականություն՝ փակի տակ պահելով Ռոբերտ Քոչարյանին։
Հյուսիսային պողոտայում էին նաև Ռոբերտ Քոչարյանի աջակիցները, ովքեր ուզում էին Տուսկին տեղեկացնել ՀՀ երկրորդ նախագահի դեմ ապօրինությունների մասին և իրենց մտահոգությունները հայտնել Լեռնային Ղարաբաղի հարցում նրա հնչեցրած թեզերի առումով։ Այնտեղ էին նաև ՀՀ հպարտ ոստիկանները, ովքեր չարաշահելով իրենց իրավունքները՝ երեք-չորս պատով արգելում էին ցուցարարներին մոտենալ եվրոպաշտոնյային ու Նիկոլին։ Իհարկե Տուսկը հեռվից էլ տեսավ ՀՀ էքս-նախագահի նկարներով պլակատները, լսեց «վենդետա» վանկարկումը և հատուկ իր համար անգլերենով հնչող լոզունգները։ Փաշինյան Նիկոլն էլ երևի գեղավարի մտածեց՝ թող տեսնի ինչքան ժողովրդավար ենք․․․ հոգ չէ, որ հրապարակավ իրեն վախկոտ ու խաբեբա անվանեցին, իսկ աջակիցների հետ կապ չունեցող մի քաղաքացի բղավեց նրա երեսին՝ «մարտի 1-ի կազմակերպիչը դո՛ւ ես»։
Պարզ տրամաբանությամբ, եթե Փաշինյանը մի փոքր քաղաքական հոտառություն ունենար՝ Հյուսիսային պողոտայում չէր կերակրի խավիարասեր Տուսկին՝ իմանալով, որ Ռոբերտ Քոչարյանի աջակիցները ցույց ու երթ են անելու։ Չէի՞ն զեկուցել, թե ներքուստ մնացել էր մեկ տարի առաջվա ամբոխ կառավարելու իր մագնետիկ ուժի հուշերում։ Ցանկացած դեպքում հաշվարկը սխալ էր, որովհետև Նիկոլն ու իր մերձավորները ստիպված են ընդունել, որ պարոն Քոչարյանի աջակիցները ամբոխ չեն։ Նրանք հասարակության խիղճն ու ոգին են, որ թույլ չեն տա երկիրը քաոսի վերածել, քանի որ հիանալի հասկանում են՝ ճնշված ու կամակատար դատաիրավական համակարգը պետության կործանման ամենաուղիղ ճանապարհն է։
Վառ վկայությունն են օրվա «զարդը» հանդիսացած Երևանի կենտրոնում քրտնաջան վազվզող ոստիկանները։ Ցուցարաների թիվը գրեթե 6-7 անգամ գերազանցող ոստիկանները արգելում էին ազատ քաղաքացիների ազատ տեղաշարժը՝ փակելով նրանց ճանապարհը և հարկ չհամարելով անգամ սպառիչ իրավական բացատրություն մոգոնել։ Երևի ավելի ազնիվ կլիներ միանգամից հայտարարել՝ «սև հակահեղափոխականների մուտքը Հյուսիսային պողոտա այսօր արգելված է»։
Գնալով ավելի ակնհայտ է դրսևորվում հայ ոստիկանների խտրական վերաբերմունքը ՀՀ քաղաքացիների նկատմամբ։ ԼԳԲՏ կողմից ծեծ ուտող ու Գասպարիի հայհոյանքը հանդուրժող ոստիկանը լկտի գոռոցով քաշքշում է Ռոբերտ Քոչարյանի աջակցին ու աջակցուհուն։ Ախր ո՞ւմ եք ումից պաշտապանում։ Իսկ նույն ոստիկանը պատրա՞ստ է վաղը իր տղային տեսնել ուրիշ տղայի հետ համբուրվելիս, և իր վրդովմունքին ի պատասխան լսել՝ «բա դո՞ւ չէիր նրանց ու նրանց տերերին պաշտպանում»։
Հետաքրքիր է, որ առնվազն վերջին 5-6 տարիներին տարբեր կարգի ցուցարարների հետ լավ լեզու գտնող Վալերիյ Օսիպյանը ոստիկանապետ դառնալով՝ ենթականերին չի փոխանցել իր բանակցային հմտությունները։ Ափսոսո՞ւմ է, թե՞ իրականում իրեն հրաման տվողներն էին խելացի։ Մնում է միայն գժական հրամաններ կատարելով՝ ոստիկանները սև-սպիտակ գծանշումներ անեն Երևանի փողոցներում, խանութներում, բանկերում և ամենուր․․․ վերջում էլ Սևերի համար գետո սարքեն։ Երազում չե՛ք տեսնի։ Ավելին՝ յուրաքանչյուր նման ծայրահեղացված ու անհեռատես արարք ավելի է մոտեցնում այս լակոտոկրատիայի վախճանը։
Բարդ օր էր հուլիսի 10-ը։ Հակառակի պես էլ էներգետիկ համակարգի խոշոր վթարի հետևանքով համատարած հոսանքազրկումներ եղան, ինչն ավելի ուժգնացրեց 90-ականների դաժան հիշողությունների հոսքը։
Լիա Իվանյան, հրապարակախոս
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում
