Ձեր վստահելի աղբյուրը

Լրագրողական 3 կազմակերպություններ` Խոսքի ազատության պաշտպանության կոմիտեն, Մեդիա նախաձեռնությունների կենտրոնը և Երևանի մամուլի ակումբը մշակել են  «Հեռուստատեսության և ռադիոյի մասին» նոր օրենքի նախագիծը։ Գործող օրենքը 29 անգամ ենթարկվել է փոփոխությունների և լրացումների։

«Դրանց արդյունքում, սակայն ոլորտում առկա լուրջ խնդիրներ լուծում չեն ստացել, բարեփոխումներ չեն իրականացվել։ Այդ պատճառով ավելի լավ էր ստեղծել նոր օրենք, քան շարունակել առանձին փոփոխությունները, որոնք դառնում էին արդյունավետ, քանի որ համակարգային մոտեցման բացակայություն կար»,-լրագրողների հետ հանդիպմանը հայտարարեց  Խոսքի ազատության պաշտպանության կոմիտեի ղեկավար Աշոտ Մելքոնյանը։

Նախագիծը հանձնել են ԱԺ կրթության, մշակույթի և սփյուռքի մշտական հարցերի հանձնաժողովի ներկայացուցիչների հետ, այն հանձնել են հանձնաժողովի ենթահանձնաժողովի ներկայացուցիչ, «Իմ քայլը» խմբակցության անդամ Վահագն Թևոսյանին։ Նախագիծը հեղինակած կազմակերպությունները մտադիր են այն հանրային լայն քննարկման դնել, 56 էջանոց նախագիծը կհրապարակվի կազմակերպությունների կայքերում։

«Ակնկալում ենք, որ օրինագծի հետ ծանոթանալուց հետո կլինեն մեծ թվով առաջարկություններ, որոնք կքննարկվեն։ Ամբողջական տեսքի ենք բերել, ամենևին չենք համարում, որ ստեղծել ենք կատարյալ օրինագիծ, սակայն մշտապես բարձրացվող խնդիրների լուծումները փորձել ենք տալ»,-ասաց Մելքոնյանը։

Կոմիտեի ղեկավարի ներկայացմամբ, նոր օրինագծով առաջարկում են հրաժարվել լիցենզավորման գործընթացից, թվային ժամանակաշրջանում կարելի է առաջնորդվել ավելի պարզ ընթացակարգով՝ հեղինակազրկումով (ավտորիզացիա) օրինակ։

«Կարծում ենք, այդպես կարելի է խթանալ մրցակցությունը, ինչն էլ իր հերթին կբերի ոլորտի զարգացմանը»,-ասաց բանախոսը։

Նախագծով առաջարկում է թույլ տալ ոլորտում զարգանալ մանր և միջին բիզնեսը՝ մասնավոր, ավելի փոքր մուլտիպեքսների ստեղծման առումով, որոնցից յուրաքանչյուրի համար տարբեր տուրք  կարելի է  վճարել։

Երրորդ կարևոր խնդիրը, ըստ հեղինակի, մարզերում գործող հեռուստաընկերությունները կարող են ընդգրկվել թվայնացման գործընթացում։

«Ցանկության ու հնարավորության դեպքում նրանք կարող են դառնալ մուլտիպեքսի տեր, արդարույան առումով մենք սա համարում ենք շատ կարևոր։ Ազատ մրցակցության պայմաններում հարց է, թե որոնք կարող են շարունակել գործել, փակվել, միավորվել, դա արդեն թող շուկան որոշի։ Բայց որ պետությունը պարտավոր է հավասար պայմաններ ստեղծել, դա միշտ պարտադիր է եղել»,-ասաց Մելքոնյանը։

Քննարկման մյուս մասնակից Երևանի մամուլի ակումբի ղեկավար Բորիս Նավասարդյանն էլ նշեց, որ 20 տարի են կորցրել ոլորտի զարգացումն ապահովող օրենսդրական դաշտի ստեղծման համար։

«20 տարում կուտակած ու խորացած խնդիրները բերեցին նրան, որ այսօր կանգնեցինք շատ արագ սկզբունքային փոփոխություններ կատարելու անհրաժեշտության առաջ։ Դա բավականաին լուրջ մարտահրավեր է թե հեղինակների, թե ոլորտի համար»,-ասաց նա։