Վերջին հրաժեշտը՝ Արման Կիրակոսյանին
Կոմիտասի անվան կամերային երաժշտության տանը տեղի ունեցավ Մեծ Բրիտանիայի և Հյուսիսային Իռլանդիայի Միացյալ Թագավորությունում Հայաստանի Հանրապետության արտակարգ և լիազոր դեսպան Արման Կիրակոսյանի հրաժեշտի արորողությունը, որին ներկա են հասարակական, քաղաքական գործիչներ, դիվանագետներ, հարազատներն ու ընկերները։
ՀՀ արտաքին գործերի նախարար Զոհրապ Մնացականյանն իր ելույթում ասաց, որ Արման Կիրակոսյանի գործունեությունը մշտապես ծավալվել է արտաքին քաղաքականության գերակա ուղղություններում, իր դիվանգիտական գործունեության ընթացքում նա առաջնային ներգրավածություն է ունեցել ՀՀ համար վճռական նշանակություն ունեցող գործընթացներում և դրանց դիվանագիտական հատվածում արձանագրած կարևորագույն ձեռքբերումներում ուղղված մեր տարածաշրջանում խաղաղության և կայունության ամրապնդմանը։
«Արման Կիրակոսյանի կենսագրությունն անկախ Հայաստանի դիվանագիտության կայացման կենսագրությունն է»,- նշեց նախարարը։
Զ. Մնացականյանի խոսքով, Արման Կիրակոսյանը կարողացել է հստակ ընկալել, ձևակերպել, ապա հետամուտ լինել միջազգային հարաբերություններում Հայաստանի ազգային շահերին, սակայն, ինչպես վայել է իսկական դիվանագետին, ազգային շահերը պաշտպանելիս նա եղել է ոչ թե պատերազմի, այլ խաղաղության մարտիկ։
Նախարարը կարևորեց Արման Կիրակոսյանի մանկավարժական ձիրքը, գիտական, պատմաբանի վաստակը. «Արման Կիրակոսյանին հաջողվեց խորացնել Հայոց ցեղասպանագիտության գիտական շրջանակը՝ դրանց մեջ ընդգրկելով ամերիկյան և բրիտանական մամուլի միջոցների ուսումնասիրությունը։ Կարևոր նշանակություն ունի նաև Հայկական հարցի հետցեղասպանական շրջանի ուսումնասիրությունները հատկապես Երկրորդ համաշխարհային պատերազմից հետո ձևավորված իրավիճակում»։
Զ.Մնացականյանը Արման Կիրակոսյանին բնութագրեց անբասիր, համեստ, բարի։
«Այս մարդկային որակներով նա շահեց ընկերների, բարեկամները մի հսկայական շրջանակ իր դիվանագիտական աշխատանքը կատարելիս»,- ասաց նախարարը։
Նա նշեց, որ Կիրակոսյանին սիրում էին բոլորը, որովհետև նրա կողքին բոլորն իրենց գնահատված և սիրված էին զգում։
Արման Կիրակոսյանը մահացել է հուլիսի 6-ին, 63 տարեկան։
Արման Կիրակոսյանը ծնվել է 1956թ․, Երևանում։ 1977թ. ավարտել է Խաչատուր Աբովյանի անվան Հայկական պետական մանկավարժական ինստիտուտի պատմության և աշխարհագրության ֆակուլտետը, իսկ 1980թ․՝ համանուն ինստիտուտի ընդհանուր պատմության ամբիոնի ասպիրանտուրան։
1991թ․-ից ներգրավվել է դիվանագիտական ծառայության մեջ․ 1991-1994թթ. եղել է ՀՀ արտաքին գործերի նախարարի առաջին տեղակալ, 1992-1993թթ.` ՀՀ արտաքին գործերի նախարարի պաշտոնակատար։ 1994-1999թթ. դիվանագիտական ծառայությունը շարունակել է Հունաստանում՝ որպես ՀՀ արտակարգ և լիազոր դեսպան, 1995-1999թթ․ համատեղության կարգով նշանակվել է Կիպրոսում, Սլովենիայում, Խորվաթիայում, Ալբանիայում և Հարավսլավիայի Դաշնային Հանրապետությունում ՀՀ դեսպան, 1999-2005թթ.` ԱՄՆ-ում ՀՀ արտակարգ և լիազոր դեսպան, Ամերիկյան պետությունների կազմակերպությունում ՀՀ մշտական դիտորդ, 2005-2011թթ․ զբաղեցրել է ՀՀ արտաքին գործերի նախարարի տեղակալի պաշտոնը։ 2011-2018թթ․ նշանակվել է Ավստրիայի Հանրապետությունում Հայաստանի Հանրապետության արտակարգ և լիազոր դեսպան, ԵԱՀԿ-ում ՀՀ առաքելության ղեկավար, Վիեննայում Միավորված ազգերի կազմակերպության գրասենյակում և այլ միջազգային կազմակերպություններում Հայաստանի Հանրապետության մշտական ներկայացուցիչ, 2016-2019թթ.՝ համատեղության կարգով Խորվաթիայում Հայաստանի Հանրապետության արտակարգ և լիազոր դեսպան։ 2018թ․ նոյեմբերին նշանակվել է Մեծ Բրիտանիայի և Հյուսիսային Իռլանդիայի Միացյալ Թագավորությունում Հայաստանի Հանրապետության արտակարգ և լիազոր դեսպան։
Արման Կիրակոսյանը պատմական գիտությունների դոկտոր է, բազմաթիվ գիտական աշխատությունների և հոդվածների հեղինակ։ Հայկական հարցի և Հայոց ցեղասպանության մասին Արման Կիրակոսյանի մեծարժեք աշխատությունները թարգմանվել են նաև օտար լեզուներով և կարևոր դեր ունեցել այս հարցերի հանրայնացման գործում։
Արման Կիրակոսյանն արժանացել է կառավարական և հասարակական բազմաթիվ պարգևների․ 2017թ․ պարգևատրվել է «Հայրենիքին մատուցած ծառայությունների համար» 1-ին աստիճանի մեդալով։
Հարակից հրապարակումներ`
- Արման Կիրակոսյանի հոգեհանգստի արարողությունը կկայանա հուլիսի 12-ին
- Արման Կիրակոսյանի մահվան առիթով կբացվի սգո մատյան
- Բակո Սահակյան. Մեծ է Արման Կիրակոսյանի ավանդն Արցախի շահերի պաշտպանության գործում
- Մահացել է դեսպան Արման Կիրակոսյանը
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին