Ձեր վստահելի աղբյուրը

«Կանանց խնդիրների թեման չափազանց կարևոր եմ համարում։ Բարդ, հաճախ շահարկվող, միաժամանակ չափազանց նրբանկատություն են պահանջում կանանց խնդիրները»,-Հայաստանի տարբեր բնակավայրերում կանանց հիմնախնդիրներին նվիրված ՀՀ աշխատանքի և սոցիալական հարցերի նախարարության կազմակերպած քննարկմանն ասաց ԱԺ փոխնախագահ Լենա Նազարյանը։

Նա նշեց, որ ԱԺ-ում ի դեմս իրեն, նաև իր գործընկեր պատգամավորների, հետևողական աշխատանք են տանում խնդիրներին լուծում տալու համար։

«Վստահ եմ, որ քննարկումների շնորհիվ ու համատեղ  ջանքերով լուրջ արդյունքներ ենք գրանցելու Հայաստանում կանանց խնդիրների ինստիտուցիոնալ հաղթահարման ուղղությամբ»,- ասաց Լ. Նազարյանը։

Մայիս-հունիս ամիսների ընթացքում ՀՀ աշխատանքի և սոցիալական հարցերի նախարարի տեղակալ Ժաննա Անդրեասյանն այցելել է ՀՀ բոլոր մարզեր՝ յուրաքանչյուրում հանդիպելով տեղի հասարակական կազմակերպությունների և քաղաքացիների հետ, քննարկելով այն հիմնական խնդիրները, որոնց հանդիպում են կանայք Հայաստանի տարբեր բնակավայրերում։

Իրականացված 10 մարզային այցելությունների արդյունքում վեր են հանվել մի շարք ընդհանուր և տեղային բնույթի խնդիրներ, որոնք առնչվում են ինչպես ՀՀ աշխատանքի և սոցիալական հարցերի, այնպես էլ այլ նախարարությունների իրավասության շրջանակներում գտնվող հարցերին։
Ժաննա Անդրեասյանն ասաց, որ հանդիպումների ընթացքում 175 մարդու հետ են զրուցել։ Ամենատարածված խնդիրներն են՝ աշխատանքի և զբաղվածության, սոցիալ –տնտեսական, վեր են հանվել կարևոր հարցեր առողջապահության, կրթության, գենդերային խտրականության, որոշումների կայացման գործընթացում կանանց ներգրավածության ցածր մակարդակի և բռնության մասով։

Փոխնախարարն ասաց, որ առաջին խնդիրը,  որը հանդիպել են, աշխատատեղերի  բացակայությունն է, մասնագիտությամբ աշխատելու սահմանափակ հնարավորությունը, վեր են հանվել խնդիրներ, որոնք առնչվում են աշխատանքի ընդունվելու ընթացքում խտրականության դրսևորմանը։

«Էլ ավելի խտրական վերաբերմունք ենք տեսնում կոնկրետ խմբերի  կանանց նկատմամբ, օրինակ հաշմանդամություն ունեցող կանանց, որը գտնվում են շատ ավելի խոցելի վիճակում։ Լուրջ խնդիր է նաև տարիքային խտրականությանը, միջին և ավելի բարձր տարիքի կանայք, ըստ էության, հայտնվում են մի իրավիճակում, երբ ստիպված են կատարել միայն ամենացածր որակավորում  պահանջող և ամենաչպաշտպանված աշխատանքը կամ ընդհանրապես չունենալ աշխատանք»,- ասաց փոխնախարարը։

Ժ. Անդրեասյանի խոսքով, կարևոր խնդիր է գյուղաբնակ կանանց և գյուտետեսական աշխատանքով զբաղված կանանց աշխատանքային իրավունքների խնդիրը։

Գյուղաբնակ աղջիկների կողմից բարձրացվել է մասնագիտական կրթություն ստանալու խնդիրը։ Արագածոտնի մարզում բարձրացվել է ընդհանրապես մասնագիտական ուսումնական հաստատությունների բացակայության խնդիրը, ինչը հավելյալ ծախսեր է առաջացնում այն ընտանիքների համար, որոնք որոշում են շարունակել կրթությունը, դրա համար ստիպված են հասնել մայրաքաղաք կամ տեղափոխվել այլ վայր։ Հանդիպումների ժամանակ բարձրացվել է եզդի աղջիկների կրթության իրացման խնդիրը։

Փոխնախարարն ասաց, որ գենդերային խտրականության խնդիրն առկա է ամենուր, շարունակում են ահազանգել   սեռով պայմանավորված հղիության արհեստական ընդհատման մասին։

«Ծնողավարման  հմտությունների պակաս ունենք։ Պետք է աշխատենք այս ուղղությամբ։   Հաճախ այն կարծրատիպային մոտեցումը, որ կիրառում են, գիտակցված չեն, ընդունված են միակն ու նորմալը, այս պարագայում աշխատանք կա տանելու հենց ընտանքիների, ծնողների հետ»,- ասաց Ժ. Անդրեասյանը։

Փոխնախարարն ասաց, որ  կանայք գրեթե չեն մասնակցում իրենց համայնքներին վերաբերող խնդիրների լուծմանը, իսկ ակտիվ կանայք էլ հեշտ թիրախավորվում են կամ պիտակավորվում։

«Համայնքապետարանները պետք է ավելի ակտիվորեն ներգրավեն բնակչությանը համայքներում իրականացվող ծագրերի շրջանակներում, ակտիվորեն ներառել կանանց, որոնք տարբերվող կարծիք են ունենում»,- նշեց Ժ. Անդրեասյանը։

Նրա խոսքով, տարբեր խմբերի կանանց՝  միայնակ մայրեր, տարեց կանանց, հաշմանդամություն ունեցող կանանց, ուղղված ծրագրերի կարիք ունեն։

Փոխնախարարն ասաց, որ ամենախոցելի իրավիճակում գտնվում են ամուսնալուծված կանայք, երբ զրկվում են ապրուստի միջոցից, բնակարանից, հաճախ դուրս են մնում նպաստի համակարգից, որովհետև չունեն բնակության կայուն վայր։

«Բացի նրանից, որ ունենք հանրային ընկալման խնդիր, ամենալուծվող կնոջ նկատմամբ փաստացի խոցելիության աստիճանը մեծանում է»,- ասաց փոխնախարարը։

Նա նշեց, որ Գեղարքունիքի մարզում ցավալի խնդիր է բարձարցվել. հաճախ ամուսինները գնում են արտագնա աշխատանքի, տղամարդն ունենում է որոշակի հաջողություններ, ամուսնալուծվում է, կնոջը հետ ուղարկում՝ զրկելով երեխաներին տեսնելու, երեխաների հետ շփվելու հնարավորությունից, թողնելով առանց ապրուստի։

«Ցավալի խնդիր է։ Ի՞նչ կարող ենք անենք մենք այս իմաստով այս կանանց պաշտպանելու համար»,- ասաց Ժ.Անդերասյանը։