Ձեր վստահելի աղբյուրը

«Դատախազության տարածած հաղորդագրությամբ  կարծես չհերքվեց, որ դատավորի համակարգչից առգրավվել են պարոն Քոչարյանի գործին առնչվող նյութերը։ Դա արդեն շատ լուրջ ազդակ է մեզ համար, որպեսզի անհանգստություն ունենանք մեր գործի վերաբերյալ»,-դատական նիստի ընդմիջումից հետո լրագրողների հետ ճապազրույցում հայտարարեց Ռոբերտ Քոչարյանի փաստաբան Հովհաննես Խուդոյանը։

Նա հիշեցրեց, այսօր փաստաբանական խումբը հանդես է եկել հայտարարությամբ,  տարակուսանք հայտնել, որ դատավորի աշխատասենյակի խուզարկությունը համընկել է գրավի միջնորդությունը քննելու համար նյութերը ներկայացնելու հետ։

«Դա ենթադրում է, որ պարոն Գրիգորյանը պետք է անհապաղ քննության առներ Ռոբերտ Քոչարյանի խափանման միջոցը փոխելու վերաբերյալ միջնորդությունը՝ ունենալով արդեն մեր կողմից ներկայացված նյութերը, ինչը ենթադրաբար վերցրել են։ Բայց խնդիր չէ, մենք մեկ անգամ էլ կներկայացնենք, այդ նյութերից շատ ունենք»,-ասաց փաստաբանը։

Նա նշեց, որ իր պաշտպանյալը՝ Ռոբերտ Քոչարյանն անհագստացած չէ խուզարկությամբ, այս գործով անտրամաբանական զարգացումներից էլ արդեն չեն զարմանում։

«Նորմալ ոչ իրավական, բայց ակնկալվող ընթացք է»,-ասաց Խուդոյանը։