Զելենսկու կուսակցությունը ստանում է Ռադայի տեղերի ավելի քան 42 տոկոսը
Նախօրեին Ուկրաինայում տեղի ունեցած արտահերթ խորհրդարանական ընտրությունների արդյունքներով 5 քաղաքական ուժեր կուսակցական ցուցակներով մուտք կգործեն Գերագույն ռադա: Այս մասին են վկայում Ուկրաինայի ԿԸՀ-ի արձանագրությունները, որը մշակել է արդեն քվեաթերթիկների 30.9%-ը։
Առաջին տեղում է նախագահ Վլադիմիր Զելենսկու «Ժողովրդի ծառա» կուսակցությունը, որը ստացել է քվեների 42,12 տոկոսը: Երկրորդ տեղում է Յուրի Բոյկոյի, Վիկտոր Մեդվեդչուկի ու Վադիմ Ռաբինովիչի «Ընդդիմադիր հարթակ՝ կյանքի համար» կուսակցությունը, որը ստանում է քվեների 12,69%:
Այսպիսով, Զելենսկին, որի կուսակցությունը նախնական տվայլներով կստանա Ռադայի տեղերի 240-ից 245-ը, կկարողանա կազմել կառավարություն, որի համար բավարար էր անգամ 226 մանդատը։ Սակայն սահմանադրական մեծամասնություն՝ պատգամավորների երկու երրորդը, ունենալու համար Զելենսկուն անհրաժեշտ կլինեն նաև դաշնակիցներ։
Այնուհետ նախկին նախագահ Պետրո Պորոշենկոյի «Եվրոպական համերաշխություն» կուսակցությունն է՝ 8.7%-ով, ապա նախկին վարչապետ Յուլիա Տիմոշենկոյի «Բատկիվշինա»-ն՝ 8.2%, 5-րդ տեղում է երաժիշտ Սվյատոսլավ Վակարչուկի «Ձայնը» կուսակցությունը` 6.4%-ով։
Նշվում է, որ կիրակի օրը տեղի ունեցած Ռադայի ընտրություններն անցել են համամասնական և մեծամասնական խառը ընտրակարգով։ Կուսակցական ցուցակներով խորհրդարան անցած կուսակցությունները կստանան 225 մանդատները, իսկ 199 մանդատը կստանան մեծամասնական ընտրակարգով ընտրված անձինք։