Նիկոլ Փաշինյան. Մեզ հետ կռվի բռնվելու արդյունքը մեկն է՝ Հայաստանի անվերապահ հաղթանակը
Հայաստանը խաղաղասիրական պետություն է, խաղաղության հիմնական երաշխիքը բանակն է, Զինված ուժերը։ ՀՀ պաշտպանության նախարարությունում ռազմաուսումնական հաստատությունների շրջանավարտների դիպլոմների հանձնման արարողությանն ունեցած ելույթում ՀՀ վարչապետ Նիկոլ Փաշինյանը։
«Բայց ես ուզում եմ ընդգծել, թե մեզ ինչպիսի խաղաղություն է պետք։ Չինական զինվորական ռազավարմությունն արձանագրում է՝ տաղանդավոր գեներալները հաղթում են առանց պատերազմի։ Ես ուզում եմ ասել, որ մեզ ահա այսպիսի խաղաղություն է հարկավոր։ Մեզ հարկավոր են այնպիսի Զինված ուժեր, պետություն, հասարակություն, որ բոլոր պոտենցիալ հակառակորդները հասկանան, որ մեզ հետ կռվի բռնվելն իմաստ չունի, մեզ հետ կռվի բռնվելու արդյունքը և հետևանքը մեկն է՝ մեր բոլոր թշնամիների ու հակառակորդների պարտությունը, Հայաստանի, նրա ժողովրդի և Զինված ուժերի անվերապահ հաղթանակը։ Մենք բոլորս, անկախ նրանից՝ ինչ համազգեստ ենք կրում, այս հաղթանակների նվիրված զինվորներն ենք։ Մեզանից յուրաքանչյուրն՝ առաջնագծից մինչև Ազգային ժողով և կառավարության շենք, պետք է ծառայենք այդ առաքելությանը։ Մենք բոլորս, անկախ նրանից, թե ինչ տեսանելի ուսադիրներ ենք կրում, մենք բոլորս կրում ենք մեր ժողովրդի, մեր պատմության, մեր նախնիների, մեր սերունդների մեր ուսերին դրված ուսադիրները։
Կեցցենք մենք, որ փառքով ենք կրում, փառքով ենք կրելու այդ ուսադիրները»,- նշեց Նիկոլ Փաշինյանը։
Ռազմաուսումնական հաստատությունների շրջանավարտների դիպլոմների հանձնման արարողությանը ներկա է ԱԱԾ տնօրեն Արթուր Վանեցյանը, ոստիկանապետ Վալերիյ Օսիպյանը, ԱԳ նախարար Զոհրաբ Մնացականյանը և այլ պաշտոնատար անձիք։
Իր ելույթում Նիկոլ Փաշինյանն ասաց, որ սպայական ծառայությունը թերևս կամային ամենաբարձր հատկանիշներ պահանջող ծառայության տեսակ է, դա պահանջում է կամք, անվերապահ և առանց քննարկման ի կատար ածել հրամանները, անվերապահ և առանց քննարկման ապահովել սեփական հրամանների ի կատար ածումը։ Նրա խոսքով, սա բարոյական, ինտելեկտուալ, հոգեբանական ահռելի ուժ պահանջող գործունեություն է։
«Այսօր ձեր ներկայությունն այս հրապարակում վկայում է, որ դուք կայացրել եք որոշում, ունեք սեփական ուժերի նկատմամբ բավարար վստահություն, որ կարող եք կրել այդպիսի անկրելի թվացող բեռներ։ Լինել սպա, լինել հրամանատար, նշանակում է երբեմն այնպիսի գործողությունների ուղարկել սեփական ենթականերին, որտեղից վերադառնալու հավանականությունը մեծ չէ։
Լինել սպա՝ նշանակում է անվերապահորեն ստանձնել այդպիսի հանձնարարությունների կատարումը, որոնցից վերադառնալու հավանականությունը մեծ չէ։ Սա նշանակում է, որ յուրաքանչյուր հրամանի ձևակերպում առանձնակի պատասխանատվություն է պահանջում ձեզնից յուրաքանչյուրից, որովհետև հրամանները պետք է լինեն խելամիտ, արդարացված, իրավիճակի ճշգրիտ գնահատականից բխող և այնպիսին, որ ծառայեն Հայաստանի Զինված ուժերին, Հայաստանի Հանրապետությանը և նրա ժողովրդին։ Սա նշանակում է, որ յուրաքանչյուր սպայի հեղինակությունը շատ ավելի մեծ պետք է լինի, քան նրա ուսադիրների զինվորական նշանակությունը։ Ավելին՝ ուսադիրների արժեքը մեծանում է յուրաքանչյուր սպայի նկատմամբ ենթակաների ունեցած հարգանքով», - ասաց վարչապետը։
Նա նշեց, որ առանձնահատուկ ողջունում է կանանց ներգրավածությունը, որն արդեն բավական երկար տարիներ տեղի ունենում է Զինված ուժերում. «Սա մեր հանրության վերափոխման կարևորագույն ցուցիչն է, որովհետև Հայաստանում կանայք ունենք հսկայական ներուժ, կանայք բնակչության մեծամասնություն են, պարտավոր ենք ստեղծել բոլոր հնարավորությունները, որպեսզի կարողանան արդյունավետ և արժանապատիվ ծառայության մատուցել Հայաստանին»։
Լրահոս
Տեսանյութեր
Համլետ Վիրաբյան. Այսօր ես ավելի հաճախ հիշում եմ կարսեցի տատիս պատմությունները
