Ձեր վստահելի աղբյուրը

Վարչապետ Նիկոլ Փաշինյանն աշխատանքային հանդիպում է անցկացնում Երևանի քաղաքապետ Հայկ Մարությանի հետ: Հանդիպումը վարչապետը  հեռարձակում է իր ֆեյսբուքյան էջում:

Քաղաքապետի հետ վարչապետը քննարկում է Երևանի աղբահանության խնդիրը:

Վարչապետը Մարությանին հիշեցրեց, որ մինչ քաղաքապետ դառնալը նա ասում էր՝ մայրաքաղաքում աղբահանության հետ կապված լուրջ խնդիրներ կան:

«Հիմա ինչո՞ւ է մեր քաղաքում աղբահանության հետ կապված խնդիր առաջացել»,- հարցրեց Նիկոլ Փաշինյանը:

Հայկ Մարությանը նշեց, որ ընտրություններից առաջ բոլոր կուսակցությունների  նախընտրական ծրագրի հիմնական կետը վերաբերում էր աղբահանությանը: Այսինքն, ըստ քաղաքապետի, այդ պահին դա  լուրջ խնդիր էր. «Ավելի վատ էր, քան հիմա»:

Քաղաքապետի խոսքով՝ քաղաքային նախկին իշխանությունների սխալը եղել է այն, որ մեկ ընկերության են թույլ տվել աղբահանությամբ զբաղվել: 

Հայկ Մարությանը նշեց, որ «Սանիթեք» ընկերության հետ նորմալ պայմանագրեր են կնքված,  ձեռնտու է եղել թե  քաղաքապետարանին, թե «Սանիթեք»-ին:

«Հավասարակշված պայմանագիր է, երկու կողմն էլ լավ պաշտպանված են, եթե կատարում են իրենց պարտականությունները»,- ընդգծեց նա:

Այդուհանդերձ, ըստ նրա, «Սանիթեք» ընկերությունը չի կարողանում կատարել իր առջև դրված պարտականությունը: Նրա խոսքով՝ ընկերությունը աղբահանության գործը ձախողել է, իսկ ձախողման օբյեկտիվ պատճառներից մեկն այն է, որ «Սանիթեք»-ը  լավ չի տիրապետում ոլորտին: 

Նիկոլ Փաշինյանն էլ հետաքրքրվեց՝ քաղաքապետարանն իր պարտավորությունները կատարո՞ւմ է, Հայկ Մարությանը պատասխանեց. «Քաղաքապետի միակ պարտավորությունը գումարը տալն է: Մենք ժամացույցի պես վճարել ենք գումարը, ինձ թվում է, որ մեզանից առաջ էլ է այդպես եղել: Այնպես չէ, որ գումարը չկա, գումար կա, որը հաստատված է բյուջեով: Այս տարվա համար նախատեսված է մոտ 5,2 մլրդ դրամ ու ժամացույցի պես փոխանցվում է։ Իսկ ընկերությանը մնում է միայն անել իր աշխատանքը»:

Վարչապետի հարցին՝ այդ դեպքում ինչո՞ւ ընկերությունը չի կատարում իր պարտավորությունները, քաղաքապետն ասաց, որ օբյեկտիվ պատճառներից է նաև այն, որ ընկերությանը պատկանող շարժակազմը շարքից դուրս է եկել,  քանդված է։ Ըստ նրա՝ պայմանագրում նշված է, որ ընկերությունն ամեն տարի մայրաքաղաքում պետք է տեղադրի  16 հազար մետաղական աղբաման, մինչդեռ հիմա տեղադրված աղբամաններից ընդամենը 99-ն է մետաղական, իսկ ընդհանուր առմամբ մայրաքաղաքում կա շուրջ 5000 աղբաման։

Հայկ Մարությանը նշեց նաև, որ պայմանագրի համաձայն, աղբամանները 80%-ից ավելի լցվածություն չպետք է ունենան, իսկ եթե դրանից ավելի է, ապա պետք է հավաքվի, եթե չհավաքվեց, համարվում է, որ աշխատանքը չի կատարվել: Դրանից հետո քաղաքապետարանը զգուշացնում է ընկերությանը և եթե դարձյալ  չի կատարվում, ապա տուգանում են ընկերությանը:

Այսպիսով, ըստ քաղաքապետի, ծառայության վատ մատուցման համար «Սանիթեք»-ին  տուգանել են. «Իրենք ասում են, որ տուգանքներն անհիմն են և մեզ դատի են տվել: Ասում են՝ տուգանքներն ազդել են մեր աշխատանքի վրա, բայց մեր տուգանքները կազմում են մեր կողմից  տրված գումարի ընդամենը 3 տոկոսը: Նրանք ասում են՝ տուգանքներն անհիմն են, իսկ ես ասում եմ՝ 1 մլն բնակիչ ամեն օր դուրս է գալիս ու տեսնում է, որ այդ տուգանքը հիմնավոր է, քանի որ 3 տոկոս տուգանքը նվազագույնն է, ինչ քաղաքապետարանն անում է։ Բացելով չակերտներն՝ ասեմ, որպեսզի իրենք վերջնական մահանան, դրա համար մենք չենք գնում ավելի կոպիտ, կտրուկ գործողությունների»: