Ձեր վստահելի աղբյուրը

Հունահռոմեական ըմբշամարտի Հայաստանի ազգային հավաքականի գլխավոր մարզիչի պաշտոնից հրաժարականի մասին հայտարարած Լևոն Ջուլֆալակյանից լրագրողները հետաքրքրվեցին՝ արդյոք իր որոշումը, ֆեդերացիայում ստեղծված տարաձայնությունները պայմանավորված չե՞ն հավաքականի անդամներ Մաքսիմ Մանուկյան-Արման Շահինյան, Արսեն Ջուլֆալակյան-Կարապետ Չալյան պայքարով։

Լևոն Ջուլֆալակյանն ի պատասխան ասաց, եթե հարցը տվել են, ապա պարզ կասի՝ 87 կգ քաշային կարգում Մաքսիմ Մանուկյանն առ այսօր ոչ մի մեդալ չունի։

«Բոլորդ գիտեք, որ իր արդյունքները նա ունեցել է 80-82 կգ քաշային կարգում, դարձել է աշխարհի չեմպիոն 82 կգ քաշային կարգում։ Լավ մարզիկ է, տաղանդավոր տվյալներով, բայց կա և Արթուր Շահինյան, որ երկու անգամ  բրոնզե մեդալակիր է դարձել Եվրոպայի առաջնությունում, Աշխարհի վերջին առաջնությունում։ Այնպես որ, եթե կա պայքար, դրանից պետք չէ որևէ մեկը խուսափի»,-ասաց հավաքականի մարզիչը։

Նա անկեղծացավ, դեմ է եղել, որ Մաքսիմ Մանուկյանը մասնակցի Եվրոպայի առաջնությանը։

«Երևի շարժը սկսել  է այստեղից։ Բայց որոշում կայացվեց ձայների առավելությամբ, որոշում կայացվեց, որ Մաքսիմ Մանուկյանը մասնակցի։ Թե ոնց մասնակցեց, բոլորդ տեղյակ եք։ Ինձ համար, բացարձակ տարբերություն չկա մարզիկների միջև, ինձ հետաքրքրել է հաղթանակները, մեդալները։ Ես գործով եմ ապացուցել, որ կողմնապահություն չեմ անում, գնում եմ մեդալների»,-ասաց նա։

Ինչ վերաբերում է Արսեն Ջուլֆալակյան-Կարապետ Չալյան հակասություններին, ապա հավաքականի գլխավոր մարզիչն ասաց, Արսեն Ջուլֆալակյանը 13 մեդալ ունի՝ տարբեր գույների, եթե մեդալ էլ չի վերցրել 4-րդ կամ 5-րդ տեղում է  եղել։

«Կարապետ Չալյանի լավագույն արդյունքը եղել է 2016-ի Եվրոպայի առաջնությանը, բոլորս գիտենք, որ օլիմպիական խաղերից առաջ Եվրոպայի առաջնությունները զիջում են մյուսներին, քանի որ ուժեղ մարզիկները պատրաստվում են Օլիմպիական խաղերին։  Ստացել է բրոնզե մեդալ։

Ապա 2017-ին հնարավորություն է տրվել  Եվրոպայի, աշխարհի առաջնություններին, շատ անհաջող, մի տեղ մի շրջան է մասնակցել, մի տեղ՝ երկու շրջան։ Նույն պատմությունը կրկնվել է 2018-ին, պարտվել է։ Եթե մարզիկը երկու տարի անընդմեջ չի կարողանում իր հնարավորություններն օգտագործել, Արսեն Ջուլֆալակյանը 2019-ին  մասնակցում է  Եվրոպայի առաջնությանը, վերադառնում է բրոնզե մեդալով։ Հիմա, դուք ում կտա՞ք առավելությունը»,-ասաց Ջուլֆալակյանը։