Ձեր վստահելի աղբյուրը

Երևան քաղաքի ընդհանուր իրավասության դատարանի Շենգավիթի նստավայրում, դատավոր Մեսրոպ Մակյանի նախագահությամբ, այսօր շարունակվեց ՊՊԾ գնդի գրավման գործով «Սասնա ծռեր» խմբի 10 անդամների դատավարությունը։ Նիստում հետազոտվեցին գործում առկա իրեղեն ապացույցները։

«Ես հիշում եմ, որ ոստիկան Յուրի Տեփանոսյանի քավորը դիահերձման ներկա է եղել, գնդակը տեսել է, իր նկարագրած  գնդակը չի համապատասխանում նրան, ինչին որ հիմա ականտես  եղանք։ Խնդրում եմ քավորը ներկա լիներ, որպեսզի կարողանա գնդակը տարանձատել»,- իրեղեն ապացույցների զննման ժամանակ ասաց «Սասնա ծռերի» անդամ Պավել Մանուկյանը։ 

Նա նշեց, որ շատ կասկածելի էր գնդակների բաղադրությունը, Յ. Տեփանոսյանի բերանից հանցած գնդակը։

«Շատ փնթի պատվեր է կատարվել։ Այստեղ չեմ տեսնում որպես իրեղեն ապացույց և Գագիկ Մկրտչյանի, և Յուրի Տեփանոսյանի պահով»,- ասաց Պ.Մանուկյանը։

Նրա պաշտպան Զարուհի Փոստանջյանի խոսքով,  համաձայն փորձաքննության եզրակացության, պարզ չէ, թե ինչպիսի  հրազենից է ստացել մարմնական վնասվածքներ ավագ ենթասպա Գագիկ Մկրտչյանը,  անհամապատասխանություններ  կան նաև նրա շարժի հետ կապված։

«Նրա շապիկից, որպես իրեղեն ապացույց, ակնհայտ  էր, որ տեղի էր ունեցել մեխանիկական միջամտություն, հավանաբար մկրատի միջոցով։ Ակնհայտ է, որ կտրել են ցույց տալու համար, թե իբրև այդպես է եղել հրազենային վնասվածքի հետևանքը։ Այսինքն կեղծիք է տեղի ունեցել»,- հայտարարեց նա։ 

«Սասնա ծռերի» անդամ Գագիկ Եղիազրյանն ասաց, որ այսօրվա հետազոտած այսպես կոչված ապացույցները որևէ բան չեն կարող ապացուցել, ոչնչի մասին չեն կարող խոսել։

Մեղադրող դատախազը նշեց, որ ամեն օր լսում են հայտարարություններ, կարծիքներ, որոնք որևէ կապ չունեն քրեական գործի, քրեական  գործով ձեռք բերված փաստական հանգամանքների հետ. «Պաշտպանական կողմը գիծ է բռնել՝ ամեն անգամ դատական վիճաբանությունների փուլի վերածել դատական քննության փուլը։ Դատական վիճաբանությունների փուլին բոլոր հայտարարություններին անդրադառնալու եմ՝  մասնրամասն վերլուծության  ենթարկելով գործով ձեռք բերված ցանկացած փաստական տվյալ»։ 

Նա հայտարարեց, որ քրեական  գործով հսկողություն է իրականացրել հարուցման պահից, այս փուլում դատարանում մեղադրանք է պաշտպանում, պատասխանատու է  գործով ձեռք բերված ցանկացած ապացույցի համար։

«Դատարանում հնչեցված հետազոտված ապացույցների վերաբերյալ բոլոր հայտարարությունները մերկապարանոց են, չեն բխում քրեական գործով ձեռք բերված  ապացույցներից»,- ասաց դատախազը։

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։