Ձեր վստահելի աղբյուրը

Առողջապահության նախարարը օտարարեկրյա ներդրողին է ամբողջությամբ հանձնել ստրատեգիական նշանակություն ունեցող ճառագայթային բժշկության ոլորտը։

«Թող արդեն իրավապահները պարզեն, թե այդտեղ ի՞նչ է կատարվել, ինչո՞ւ են այդտեղի մասնագետները հեռանում մասնավոր սեկտոր՝ մեկ բժիշկ, երկու լավագույն տեխնիկ և մեկ ֆիզիկ։ Ճառագայթային բժշկության համար դա նույն է, ինչպես գինեկոլոգիայից հեռանան 500 մասնագետ»,-լրագրողների հետ հանդիպմանը հայտարարեց ուռուցքաբան Գևորգ Թամամյանը, ով նախարար Արսեն Թորոսյանի՝ դահլիճը լքելուց հետո նստեց նրա տեղն ու անցկացրեց սեփական ասուլիսը նախարարության շենքում։

Թամամյանը նախարարից հետաքրքրվեց՝ պետպատվերը բաշխելիս ի՞նչ սկզբունքերով է առաջնորդվել, ինչպե՞ս է եղել, որ նախարարի կնոջ ղեկավարած բուժհաստատությանը, որը մատուցում է միայն ՄՌՏ ու ԿՏ ծառայություններ,  տրամադրած գումարները կրկնապատկվել են։

«Եթե այդքան լավն էր, տասնապատկեիք, թող ամբողջ ժողովուրդն այնտեղ գնար։ Ընդհանրապես, ինչպե՞ս եք բաշխում ու ի՞նչ շահ ունեք։ Ինչո՞ւ մասնավոր կենտրոնին մի միլիարդով ավելացրեցիք պետպատվերը՝ սարքելով 2.7 մլրդ, մինչդեռ ամբողջ Հայաստանի պետպատվերը մեկ միլիարդի չի հասնում։ Էդ ի՞նչ չափորոշիչներով եք առաջնորդվում, սրա մասին որևէ հոդաբաշխ բացատրություն չի եղել»,-ասաց Թամամյանը։

Անդրադառնալով հաջորդ հարցին, Թամամյանն ասաց, շատ կուզեր հարցը հնչեցներ Թորոսյանի դեմքին նայելով. «Սակայն չկարողացավ դիմանալ։ Այս տարվա փետրվար ամսին Հայաստանում տեղի ունեցավ խոշորագույն  կոնգրես մանկական քաղցկեղի վերաբերյալ, որին մասնակցում էին 40 երկրներ։ Նման կոնգրես Հայաստանում դեռևս չէր եղել, ոչ նախարարը, ոչ նախարարության որևէ աշխատակից ներկա չի եղել այդ միջոցառմանը։ Ես այս հարցը տալիս եմ, որովհետև եղել եմ կոնգրեսի կազմկոմիտեի ղեկավարը և տարիներ շարունակ տանջվել եմ, որ այդ կոնգրեսը գա Հայաստան։ Բացի նրանից, որ նա չեկավ, նաև նրա օգնականները մի քանի անգամ ճշտել են, եթե ներկա է լինելու Բժշկական համալսարանի ռեկտորը և ցիտում եմ բառացի, տերտերներ, ես չեմ գա։ Լավ հասկացանք, որ դուք ատում եք ռեկտորին ու Հայաստանում կայացած բոլոր բժիշկներին, բայց ատում եք նաև եկեղեցի՞ն։ Ցիտում եմ բառացի։ Դա իր իրավունքն է, հավատալ կամ չհավատալ, բայց նման պաշտոն զբաղեցնող անձը չի կարող բացահայտ նման վերաբերմունք ցույց տալ եկեղեցու նկատմամբ ու նման արտահայտություններ անել»։

Բանախոսն ասաց, իրականությանը չի համապատասխանում Թորոսյանի այն հայտարարությունները, որ հիվանդանոցներին պետությունն ամեն ինչ տալիս է, ամեն ծառայություն անվճար է։

«Սրանով նախարարը հիվանդին ու բժշկին հանում է իրար դեմ։ Դուք ընդհանրապես տեղյա՞կ եք, պարոն նախարար, թե ինչքան աշխատավարձ է ստանում պոլիկլինիկայի մանկաբույժը, որ հայտարարում եք 10 հազար դրամով բարձրացրեցինք, ձեր ամեն սանրվածքը, որ լաքած գալիս եք, էդքան կարժենա»,-բարկացավ ուռուցքաբանը։

Նա խորհուրդ տվեց ուսումնասիրել բժշկական կենտրոնների խորհուրդները, դրանցում հիմնականում Թորոսյանի ծանոթներն ու մտերիմներն են։

«Նախարարի ամենամոտ աշխատակիցները՝  վերին էշելոնում իմ ներկայությամբ և ոչ միայն, բազմիցս հայտարարել են, որ նախարարությունում տիրում է, ցիտում եմ, բացարձակ բարդակ։ Ոչ ոք ոչնչից տեղյակ չի լինում։ Նշում են, որ բազմավաստակ մասնագետներին նվաստացնելով երկար սպասեցնում է ընդունարանում։ Ի՞նչ կարծիք ունի իր մասին, էս ի՞նչ խաղեր են, գուցե մանկական տրավմաներ է ունեցել, որ փորձում է այլոց վրա ինքնահաստատվել»,-ասաց մասնագետը։

Թամամյանն ասաց, վերջերս գլխի ուռուցքով երեխային հերթագրել են, ասել են՝ գնացեք նոյեմբերին կգաք, նշեց, իր խոսքը կհաստատի նաև փոխնախարար Ավանեսյանը։

«Զանգել ենք, փոխնախարարին խնդրել են, ինքն է սկսել զբաղվել։ Պատկերացրեք, որ մարդիկ կապ չունեն նախարարության հետ, ի՞նչ են անելու»,-ընդգծեց ուռուցքաբանը։

Հայաստանի մանկական քաղցկեղի և արյան հիվանդությունների կենտրոնի ղեկավարը նաև հիշեց, երբ Արսեն Թորոսյանը լրագրողների ներկայությամբ «Կոլխիցին» կոչվող դեղամիջոցը հանեց ու ցույց տվեց։

«Երբ մարդկանց մոտ թափահարում էր դեղն ու հույզեր առաջացնում, ասում էր՝ ես հիվանդ տղա եմ, ինձ բանակից ազատել են... Բանակում ծառայել է որպես բժիշկ, որպես պիսեր՝ գրագիր, այսպես ասեմ։ Ստեփանակերտի գենշտաբում գրագիր է ծառայել։ Ես ուզում էի իրեն հարցնել, էդ ի՞նչն էր բարդություն է, որ   Ստեփանակերտում չեք կարողանում գրագրություն անել, հիմա եկել եք Հայաստանում անում եք։ Եթե վերականգնվել եք, գնացեք Ձեր մեկ տարին ծառայեք։

Մարդկանց էմոցիաների վրա խաղալով, մարդկանց խղճահարություն հայցելով... այդպես չէ, մենք բժիշկ ենք, շատերս կարող ենք խնդիրներ ունենալ, բայց դրա մասին չասել։ Հարցրեք նախարարին, եթե հիվանդ է, ո՞նց դոնորություն արեց կամ արե՞ց արդյոք, որ իր էջում նշեց դոնոր եմ եղել։ Հարցրեք, խնդրում եմ»,-խնդրեց ուռուցքաբանը։

Նա նշեց, շատ մասնագետներ այս հարցերին կավելացնեն իրենցը, քանի որ չեն կարողանում արտահայտվել։

«Ոլորտում կան բազմաթիվ մարդիկ, ովքեր հարցերը կքառապատկեն։ Այն ֆեյքերի բանակը, որ հարձակվում է մարդկանց վրա, թույլ չի տալիս, որ մարդիկ խոսեն, թույլ չեն տալիս, որ ասում են՝ ստում է։ Բարդակ է տիրում, միանշանակ, պահանջում եմ Թորոսյանի հրաժարականը, նման նախարար Հայաստանին պետք չէ, ով ատում եկեղեցին ու կայացած մասնագետներին»,-մանրամասնեց նա՝ նշելով, որ հարցերի մասին բազմիցս բարձրաձայնել է, թե Թորոսյանի, թե իր աշխատակազմի ներկայացուցիչների մոտ, պատասխաններ չի ստացել։