Կառավարությունն առաձնահատուկ ուշադրություն պետք է դարձնի ԱԻՆ աշխատողների սոցիալական պաշտպանվածությանը. վարչապետ
«Այս տարի ԱԻՆ աշխատողի օրը նշում ենք առանձնահատուկ պայմաններում, երբ բոլորս ականատես եղանք հրշեջ-փրկարարների հսկայածավալ աշխատանքին, որոնք նրանք իրականացրին և շարունակում են իրականացնել հանրապետության ողջ տարածքով»,- այս մասին այսօր ԱԻՆ աշխատակցի օրվան նվիրված տոնական միջոցառման ժամանակ իր ելույթում ասաց ՀՀ վարչապետ Նիկոլ Փաշինյանը:
Նրա խոսքով՝ կարող են առանց չափազանցության արձանագրել, որ այս տարի փրկարար ծառայության աշխատողները, արտակարգ իրավիճակների աշխատողները, հրշեջներն իրենց անձնուրաց աշխատանքով կառավարել են այնպիսի ռիսկեր, որոնք կարող էին երկիրը և ժողովրդին կանգնեցնել բավականին լուրջ աղետների առաջ:
«Եւ ես ուզում եմ՝ այսօրվա առիթով ևս մեկ անգամ շնորհակալություն հայտնել Ձեր կատարած անձնուրաց աշխատանքի առիթով, ուզում եմ հույս, ցանկություն և համոզմունք հայտնել, որ առաջիկայում էլ այդ աշխատանքում կլինեք նույնքան նվիրված»,-նշեց Նիկոլ Փաշինյանը։
Ըստ նրա, նոր ժամանակներում՝ կապված կլիմայական փոփոխությունների հետ, արտակարգ իրավիճակների նոր մարտահրավերների առաջ ենք կանգնում, և Կառավարության օրակարգում արտակարգ իրավիճակներին արդյունավետ հակազդելու, դրանք արդյունավետ կառավարելու հարցը պետք է լինի մշտական ուշադրության կենտրոնում:
Վարչապետի խոսքով՝ Կառավարությունն առաձնահատուկ ուշադրություն պետք է դարձնի արտակարգ իրավիճակների աշխատողների սոցիալական պաշտպանվածության և երաշխիքների խնդրին: Բացի այդ, ըստ նրա, պետք է առանձնահատուկ ուշադրություն դարձնեն ԱԻՆ փրկարար ծառայության տեխնիկական հագեցվածության խնդրին, ինչպես նաև նույնքան մեծ ուշադրություն պետք է դարձնեն արտակարգ իրավիճակների նկատմամբ քաղաքացիների իրազեկվածության աստիճանի բարձրացմանը։
«Որքան էլ արձանագրենք՝ կլիմայական փոփոխությունները արտակարգ իրավիճակների ռիսկերը մեծացնում են, միևնույն ժամանակ պետք է նշենք, որ այդ ռիսկերը դառնում են կոնկրետ մարտահրավերներ բացառապես մարդկային գործոնի բերումով: Այս առումով ԱԻՆ փրկարար ծառայության կարևոր առաքելություններից մեկը պետք է լինի հանրության շրջանում իրազեկվածության բարձրացումը, որ յուրաքանչյուր քաղաքացի կարողանա գիտակցել, թե իր, առաջին հայացքից անմեղ թվացող պահվածքը ինչպիսի ծանր հետևանքներ կարող է ունենալ։ Մենք առավել մեծ ռեսուրսներ և ժամանակ պետք է ծախսենք այս խնդրի լուծման համար, քանի որ կանխարգելման աշխատանքներ իրականացնելն ավելի արդյունավետ է, պակաս ծախսատար է»,- ասաց վարչապետը։
Նիկոլ Փաշինյանի խոսքով՝ մեծանում է ծառայության դերը նաև առօրյա կյանքում, քանի որ հանրապետությունում բազմաթիվ ավտովթարներ, կենցաղային բազմաթիվ իրավիճակներ են տեղի ունենում, և քաղաքացիները դիմում են փրկարարների օգնությանը:
«Շատ կարևոր է արձանագրել, որ այս տարիների ընթացքում Փրկարար ծառայության վարկանիշը, վստահելիության մակարդակը հանրության շրջանում գնալով անընդհատ մեծացել է: Սա կարծում եմ՝ Ձեր կատարած աշխատանքի ամենակարևոր գնահատականն է։ Պետք է արձանագրել, որ քաղաքացիների, հանրության վստահությունն այն ամենակարևոր արժեքն է, որը ձեռք բերելը չափազանց դժվար է, իսկ կորցնելը՝ չափազանց հեշտ։ Այս առումով համոզված եմ, որ բոլորդ կշարունակեք ձեր նվիրական ծառայությունը ՀՀ-ին և ժողովրդին»,- նշեց վարչապետը։