Ձեր վստահելի աղբյուրը

«Առնվազն այս պահի դրությամբ մենք չունենք Ամուլսարի հանքի շահագործումը արգելելու որևէ իրավական հիմնավորում, բայց հասկանալի է նաև, որ մենք չենք կարող հաշվի չառնել հանրության շրջանում առկա անհանգստությունները»,- այս մասին այսօր ֆեյսբուքի ուղիղ եթերում հայտարարեց վարչապետ Նիկոլ Փաշինյանը։

Մյուս կողմից, ըստ վարչապետի,  չեն կարող հաշվի չնստել նաև Հայաստանի տնտեսական հանրության անհանգստությունների հետ:

«Տնտեսական հանրության անհանգստությունն արտահայտվում է հետևյալ կերպ. ինչպես գիտեք, վերջերս «Մուդիս» վարկանշային կազմակերպությունը բարձրացրել է Հայաստանի վարկանիշը, ինչը նշանակում է, որ Հայաստանը և մասնավոր կազմակերպություններն, այդ թվում՝ բանկերը, կարող են ավելի էժան ֆինանսական միջոցներ ներգրավվել։ Ամուլսարի շուրջ ստեղծված իրավիճակում մենք ունենք որոշակի ազդակներ, որոնք վկայում են՝ եթե այս իրավիճակը ճիշտ չկառավարենք, ապա դա կարող է հանգեցնել Հայաստանի վարկանիշի վատթարացման, ինչի հետևանքները մենք կարող ենք զգալ, լայդ թվում նաև մեր կողմից ստացվող վարկերի տոկոսների արժեքի տրամաբանությամբ»,- նշեց վարչապետը։

Նիկոլ Փաշինյանը նաև ասաց՝ կա նաև հետևյալ խնդիրը, որն ահագնանում է նույն կերպ. «Եթե մենք ենթադրենք ասում ենք՝  ուղղակի թույլ չենք տալիս Ամուլսարի հանքը շահագործել, շատ պարզ հարց է առաջանում՝ ինչո՞ւ, բնապահպանական մտավախություններից ելնելո՞վ, այո, իհարկե դրանից ելնելով: Այստեղ ծագում է հաջորդ հարցը, թե ինչո՞ւ եք թույլ տալիս Թեղուտի, Զանգեզուրի պղնձամոլիբդենային կոմբինատի հանքերը շահագործվեն, արդյոք դրանք համապատասխանում են միջազգային բոլոր ստանդարտներին և բնապահպանական խնդիրներ չեն առաջացնում, արդյոք դրանք գործում են ըստ այն ստանդարտների, որոնք գոյություն ունեն Հայաստանում»,- ընդգծեց նա։

Նիկոլ Փաշինյանի խոսքով՝ այս առումով Հայաստանը կարող է ունենալ միջազգայնորեն լուրջ խնդիր, եթե պարզվի, որ ցուցաբերում են խտրական մոտեցում:

«Մենք չենք կարող արհամարհել նաև մեր երկրի տնտեսության անվտանգության, արտաքին անվտանգության, ուղղակի անվտանգային միջավայրի հետ կապված խնդիրները, որոնք նույնպես որոշակի կարևորություն ունեն Ամուլսարի հարցը քննարկելիս»,- նշեց վարչապետը՝ հավելելով, որ հիմա չի կարող այս թեմայի վերաբերյալ ավելի մանրամասն խոսել, թեև, ըստ նրա, եթե յուրաքանչյուրն իր վերլուծություններն անի, պարզ կլինի, թե ինչու է անվտանգության հարցն այս համատեքստում հիշատակում։

Այսպիսով, ըստ Նիկոլ Փաշինյանի, չեն կարող անտեսել բնապահպանական ռիսկերը, որոնք կան. «Իմ դիրքորոշումն այն է, որ եթե հանքի շահագործումն անվտանգ չէ, այն չի կարող շահագործվել։ Հիմա ընկերությունն ամենաբարձր մակարդակով խոստանում է ապահովել անվտանգությունը և պահպանել բոլոր չափանիշները»։

Նշենք, որ ուղիղ եթերի ժամանակ Նիկոլ Փաշինյանը նաև ասաց, որ վերջին օրերին Ամուլսարի հանքի շահագործման թեմայով քննարկումներ են ունեցել, որոնք տեսաձայնագրվել են և կհրապարակվեն:  Նրա  խոսքով՝ «Լիդիան» ընկերությունը այդ քննարկումների ժամանակ հավաստիացրել է, որ ինչպես ՇՄԱԳ-ում գրել է, պարտավորվում է հանքը 100 տոկոս անվտանգ շահագործել։

«100 տոկոս անվտանգ շահագործում նշանակում է, որ ոչ մի լիտր ջուր չի արտահոսի արտաքին միջավայր, օդի որակը չի փոխվի, այսինքն՝ փոշի, այլ թունավոր նյութեր չեն լինի, ստորերկրյա ջրերը, մակերեսային ջրերը չեն աղտոտվի, շրջակա միջավայրի բազմազանության հետ կապված խնդիրներ չեն առաջանա։ Նույնիսկ քննարկումներից մեկի ժամանակ ասել եմ, որ մոտակա արոտավայրերի վրա փոշի է նստելու և դա ազդելու է կենդանիների մսի որակի վրա, նրանք հավաստիացրել են՝  այդ ամենը նույնպես հաշվի են առել։ Այսինքն՝ «Լիդիան»-ը պաշտոնապես, ամենաբարձր մակարդակով արձանագրում է, որ իրենք կկատարեն իրենց ստանձնած պարտավորությունը։ Շրջակա միջավայրը ինչպես կա, բացի բուն հանքի շահագործման տարածքից, ոչինչ չի փոխվելու»,- նշեց վարչապետը։

Նիկոլ Փաշինյանը միաժամանակ ասաց, որ ինքը նաև զգուշացրել է՝ եթե շեղումներ լինեն, ապա ՀՀ օրենսդրությամբ բխում են որոշակի գործողություններ, մասնավորապես, շեղումների պարագայում տրվում է 90 օր ժամանակ, եթե այն  չի վերացվում, ապա հանքը փակվում է։