Ծովինար և հարակից համայնքների բնակիչները թույլ չեն տվել կայանա հանրային քննարկում
Գեղարքունիքի մարզի Ծովինար և հարակից համայնքների բնակիչները թույլ չտվեցին, որ Ծովինար համայնքում կայանա Գեոմայնինգ ՍՊԸ-ի Գեղարքունիքի մարզի Վարդենիսի բազմամետաղների հանքերևակման սահմաններում 2019-2021թթ երկրաբանական ուսումնասիրության աշխատանքների նախնական գնահատման հայտի վերաբերյալ հանրային քննարկում։ Այս մասին տեղեկանում ենք «Մարտունի Ինֆոտուն» ֆեյսբուքյան էջ։
Հանրային քննարկումը կազմակերպելու նպատակով համայնք էին այցելել Գեոմայնինգ ՍՊԸ-ի ներկայացուցիչները։ Ներկա էր նաև ներկայացուցիչ Շրջակա միջավայրի նախարարությունից։ Հանրային քննարկման չկայացման վերաբերյալ կազմվեց արձանագրություն, որի տակ ստորագրեցին ներկաները, կնիքվեց համայնքապետարանի կողմից, ապա հանձնվեց Շրջակա միջավայրի նախարարության ներկայացուցչին։
«Գեղարքունիքի մարզի Ծովինար համայնքի բնակիչները, և ոչ միայն, դեմ են «Գեոմայնինգ» ՍՊԸ-ի Գեղարքունիքի մարզի Վարդենիսի բազմամետաղների հանքերևակման սահմաններում 2019-2021թթ երկրաբանական ուսումնասիրության աշխատանքների նախնական գնահատման հայտի վերաբերյալ հանրային որևէ քննարկման»,- նշված է «Մարտունի Ինֆոտուն» ֆեյսբուքյան էջում։
Ավելի վաղ «Մարտունու կանանց համայնքային խորհուրդ» հասարակական կազմակերպության նախագահ Անահիտ Գևորգյանը կոչով դիմել էր Ծովինար համայնքի բնակիչներին. «Սիրելի՛ ծովինարցիներ, սեպտեմբերի 12-ին, ժամը` 12։00-ին մեկ մարդու նման ոչ եք ասում հանքահեններին։ Նրանք գալիս են ձեր անարատ բնությունը ավերելու, ձեր սեփականությունը ձեզանից խլելու, ձեզ կեղեքելու համար։ Եթե նույնիսկ դուք կանգնած լսեք նրանց, նրանք այդ փաստը կներկայացնեն որպես հանրային լսում։ Ուրեմն թույլ չպետք է տալ ոչ մի երկխոսություն։ Տե՛ր եղեք ձեր հարստությանը և սեփականությանը։ Մենք ձեզ հետ ենք։ Հիշե՛ք, որ մեր սարերը ամբողջությամբ ուրանի հանքեր են, հետևանքները անդառնալի կարող են լինել։ Հիշե՛ք՝ ոսկու տենդը կուրացնում է»։