Ձեր վստահելի աղբյուրը

«Նորք Մարաշ» զինված խմբի առաջնորդ Արթուր Վարդանյանն այսօր 1 միլիոն դրամ գրավի դիմաց ազատ է արձակվել։ Երևան քաղաքի ընդհանուր իրավասության դատարանը (նախագահող դատավոր Մեսրոպ Մակյան) բավարարել է Ա. Վարդանյանի՝ գրավով ազատ արձակելու միջնորդությունը։

Panorama.am-ի հետ զրույցում Ա. Վարդանյանի պաշտպաններից Լևոն Բաղդասարյանն ասաց, որ դատական ակտը հեղինակավոր և իրավաչափ է։

«Բազմիցս պաշտպաններս բարձրաձայնել ենք, որ Արթուրն արդեն 4 տարի ոչ թե կալանք է կրում, այլ պատիժ է կրում։ Այսօրվա դատական ակտը ժամանակին և իրավաչափ եմ տեսնում։ Արթուր Վարդանյանն ազատության մեջ է»,- ասաց փաստաբանը։

Լ. Բաղդասարյանը նշեց, որ վերջինիս խափանման միջոց կալանքի հիմքերն ուղղակի բացակայում էին, վերացական դատողություններով անհիմն անազատության մեջ պահելն, այն էլ չորս տարի, ուղղակի անթույլատրելի էր։

«Դատարանը, ըստ էության, նպատակահարմար գտավ կիրառել գրավ»,- նշեց նա։

Լ. Բաղդասարյանի խոսքով, Արթուր Վարդանյանը կալանքը կրելու ընթացքում առողջության հետ կապված որոշակի խնդիրներ է ձեռք բերել, և այս ընթացքն առաջնային կօգտագործի առողջությունը փոքր ինչ վերականգնելու համար։

Ինչ վերաբեում է ընդհանուր քրեական գործին, պաշտպանի կարծիքով, այն հեռանկար չունի, ուղղակի հետագայում մեղադրողները հետևություն կանեն իրենց առաջ դրած մեղադրանքը փոփոխելու հետ կապված։

Արթուր Վարդանյանին մեղադրանք է առաջադրվել այն բանի համար,որ նա 2015թ. ապրիլից գտնվելով Հայաստանի Հանրապետության տարածքում, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել,պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից: