Դեմոկրատական կուսակցության երրորդ բանավեճը. տասնյակի բախումը
Դեմոկրատական կուսակցության երրորդ բանավեճը տեղի ունեցավ սեպտեմբերի 12-ին: Միայն 10 թեկնածուներ էին համապատասխանում առաջադրված պահանջներին պայքարը շարունակելու համար։ Այդ թեկնածուներն են Ջո Բայդենը, Էլիզաբեթ Ուորենը, Բերնի Սանդերսը, Քորի Բուքերը, Ջուլիան Կաստրոն, Փիթ Բութիջիջը, Քամալա Հարիսը, Բետո Օ’Ռուրկը, Էմի Քլոբուշարը և Էնդրյու Յանգը։ Միայն նրանք կարողացան մասնակցել 3-րդ բանավեճին, քանի որ 21 հարցումներից 4-ում կարողացան հավաքել առնվազն 2% ձայն և ստանալ նվիրատվություններ ավելի քան 130,000 անհատ նվիրատուներից։ Մրցապայքարից դուրս մնացած թեկնածուների թվում է Թուլսի Գեբբարդը՝ ամենահայամետ թեկնածուն։ Վերջինս կարողացավ նվիրաբերումներ ստանալ ավելի քան 150,000 անհատ նվիրատուներից, բայց չկարողացավ հաղթահարել 4 հարցումներում 2%-ի շեմը։
Բանավեճը այս անգամ էլ հիմնականում կենտրոնացած էր ներպետական խնդիրների վրա, հատկապես առողջապահական ապագովագրության և զենքի վերահսկողության: Մինչ Էլիզաբեթ Ուորենն ու Բերնի Սանդերսը ցանկանում են «Obamacare»-ը փոխարինել «Medicare» բոլորի համար ծրագրով, Ջո Բայդենը ցանկանում է զարգացնել «Obamacare»-ը։ Գլխավոր թեկնածու Ջո Բայդենի հիմնական փաստարկն այն է, որ իր ծրագիրը շատ ավելի քիչ կարժենա, քան Ուորենի և Սանդերսի առաջարկը՝ $740 միլիարդ և $30 տրիլիոն համապատասխանաբար։ Էլիզաբեթ Ուորենն ամեն կերպ խուսափեց պատասխանել այն հարցին, թե արդյոք իր ծրագիրը կարող է հանգեցնել միջին դասի ընտանիքների համար հարկերի բարձրացման։
Ինչ վերաբերում է զենքի վերահսկողության խնդրին, Բետո Օ’Ռուրկը այս հարցում ամենից ակտիվն էր, որը կարելի է բացատրել նրանով, որ վերջինս Էլ Պասոյից է, որտեղ 2019թ․ օգոստոսի 3-ին տեղի ունեցավ մասսայական հրաձգություն։ Նա պնդում է, որ կառավարությունը պարտավոր է ետ գնել այնպիսի զինատեսակներ, ինչպիսիք են AR-15 և AK-47-ը։ Բանավեճի ամբողջ ընթացքում բոլոր թեկնածուները շատ ավելի ակտիվ էին, քան նախորդ բանավեճերի ընթացքում։ Հարկ է անդրադառնալ Ջուլիան Կաստրոյին, ով բանավեճի ամբողջ ընթացքում ոչ մի առիթ բաց չթողեց քննադատելու Ջո Բայդենին։ Նախ, նա կասկածի տակ դրեց Բայդենի կարողությունը հիշել իր 2 րոպե առաջ ասածը, այնուհետև մեղադրեց նրան, որ վերջինս Օբամայի վարչակազմի հաջողությունների պարագայում նշում է, որ «ինքն այնտեղ է եղել», իսկ անհաջողությունների դեպքում հղում կատարում նախագահին։
Հաջորդ կարևոր քննարկված թեման Աֆղանստանից զորքերի դուրսբերման հարցն էր։ Առավել ուշագրավ էր Էլիզաբեթ Ուորենի պատասխանը, ով հայտարարեց Աֆղանստանից զորքերի դուրս բերելու պատրաստակամության մասին, անգամ առանց որևէ համաձայնության հաստատման, նշելով, որ «Մենք չենք կարող խնդրել մեր զինվորականներին շարունակել լուծել խնդիրներ, որոնք չեն կարող լուծվել ռազմական ճանապարհով»։ Բերնի Սանդերսը հակադրվեց Ջո Բայդեին, երբ քննարկում էին Իրաքից զորքերի դուրսբերման հետևանքների հնարավոր կրկնությունը Աֆղանստանի պարագայում (նկատի ունենալով 9/11)։ Սանդերսը հայտարարեց, որ ինքը միակ թեկնածուն է, որ երբեք չի հավատացել Բուշին և Չինիին և դեմ է եղել Իրաքի պատերազմին։
Մյուս թեկնածուների մեջ առանձնանում է ձեռներեց Էնդրյու Յանգը։ Բանավեճի հենց սկզբից նա խոստացավ մեկ տարվա ընթացքում իր քարոզարշավից $1000 տալ 10 ամերիկացի ընտանիքների այն պայմանով, որ նրանք պետք է Yang2020.com կայքում հիմնավորեն, թե ինչպես կարող է այդ գումարն իրենց օգնել լուծելու իրենց խնդիրները։ Նա այստեղ կանգ չառավ ։ Հաջորդ խոստումն այն էր, որ յուրաքանչյուր ամերիկացու պետք է տրվի 100 «ժողովրդավարության դոլար», որը մարդիկ կկարողանան տալ այն թեկնածուին կամ այն խնդրի բարձրաձայնմանը, որն իրենց համար կարևորություն ունի։ Ըստ Յանգի՝ սա կօգնի ձերբազատվել լոբբիստների ազդեցությունից։
Դեմոկրատական կուսակցության երրորդ բանավեճից հետո Ջո Բայդենը շարունակում է մնալ առաջատար թեկնածուն, որին հետևում են Էլիզաբեթ Ուորենն ու Բերնի Սանդերսը:
Վերլուծության աղբյուրը՝ Ամերիկյան հետազոտությունների հայկական կենտրոն