Էդուարդ Սնոուդենի գիրքը՝ գրախանութներում եւ համացանցում
ԱՄՆ-ի Կենտրոնական հետախուզական վարչության նախկին աշխատակից Էդուարդ Սնոուդենը, հույժ գաղտնի տվյալներ հրապարակելու պատճառով ԱՄՆ-ում ձերբակալվելու հնարավորությունից խուսափելու համար 2Օ13 թվականին ապաստան ստացավ Ռուսաստանում։
Ռուսաստանում բնակվող Սնոուդենն այսօր հրատարակում է իր հուշերի մասին գիրք, որից հետո ԱՄՆ-ի արդարադատության նախարարությունը դատական գործ է հարուցում ընդդեմ նրա։ «Մշտական տեղեկագիր» անվանումը կրող գիրքը, երեքշաբթի օրը գրախանութներում հայտնվելով ապացուցեց, որ ունի մեծ պահանջարկ։ Այն կարելի է ձեռք բերել նաեւ «Ամազոն»-ի կայքում։ Այս մասին գրում է Ամերիկայի Ձայնը։
Ի դեպ, ԱՄՆ-ի կառավարությանը պատկանող որևէ հաստատություն չի ստացել գրքի նախնական օրինակը, և արդարադատության նախարարությունը հայտարարել է, որ չնայած չի փորձելու կանխել դրա վաճառքը, սակայն միջոցներ է ձեռնարկելու, որ Սնոուդենը գրքի վաճառքից չստանա շահույթ։ Նախարարությունը դա պատճառաբանում է նրանով, որ Սնոուդենը ոտնահարել է գաղտնիքները չհրապարակելու մասին Կենտրոնական հետախուզական վարչության և Ազգային անվտանգության գործակալության հետ կնքած պայմանագրերը։
Իսկ ահա Գերմանիայի գրախանութներից մեկին հղված տեսակապով Սնոուդենն ասել է, որ, այո, կա գաղտնիության մասին պայմանագիր, «սակայն միևնույն ժամանակ տվել եմ Սահմանադրությունը պաշտպանելու երդում», ասել է նա ու ավելացրել, թե այն գաղտնիքները, որոնք իշխանությունները պահանջում են չհրապարակել, այն մասին են, որ հենց կառավարությունն է ոտնահարում Սահմանադրությունը և աշխարհի տարբեր հատվածներում մարդկանց իրավունքները։
Սնոուդենը մեծաթիվ աջակիցներ ունի աշխարհի տարբեր հատվածներում, որտեղ նրան հաճախ են համարում հերոս՝ իր կառավարությանը քննադատելու խիզախություն ունենալու համար։ Սակայն շատերն էլ նրան համարում են դավաճան ու հանցագործ։ ԱՄՆ-ի դաշնային դատախազությունը նրան մեղադրում է պետության սեփականությունը հափշտակելու և Լրտեսության ակտով նախատեսված պայմանները ոտնահարելու մեջ։ Այն ժամանակ նախագահ Բարաք Օբաման էր հորդորել Սնոուդենին վերադառնալ հայրենիք ու կանգնել դատարանի առջև։
«Եթե նա վստահ է, որ այն ինչ արել է, եղել է ճիշտ, ուրեմն թող որպես ամերիկացի գա այստեղ ու դատարանի առջև իր փաստաբանների օգնությամբ ապացուցի իր անմեղությունը»,- ասել էր Օբաման։
Սնոուդենի խոսքերով, ինքը չի վախենում դատարանի առջև կանգնելուց, սակայն պիտի վստահ լինի, որ դատը կանցնի արդար ու հանրության համար բաց։ Սակայն կառավարությունը հայտարարում է, որ եթե լինի դատավարություն, այն պիտի անցնի հատուկ ընթացակարգով և փակ դռների հետևում։ Դրան ոչ Սնոուդենն է համաձայն, ոչ էլ նրա աջակիցները։
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ